މިއަހަރު ފަހުކޮޅު ފައިނޭންޝިއަލް އެކްސްޕޯއެއް ބޭއްވުމަށް މޯލްޑިވްސް މަނިޓަރީ އޮތޯރިޓީން ނިންމައިފިއެވެ.
މިއީ މާލީ ދާއިރާއާއި ގުޅޭގޮތުން އާއްމުން ހޭލުންތެރިކުރުމަށް ބާއްވާ މި ފައިނޭންޝިއަލް އެކްސްޕޯއެކެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ގަވަރނަރ އަޙްމަދު ނަޞީރު ވިދާޅުވި ފައިނޭންޝިއަލް އެކްސްޕޯގެ ތެރެއިން ވީހާވެސް ގިނަ ބަޔަކަށް ފުޅާ ދާއިރާއެއްގައި ފައިނޭންޝިއަލް ދާއިރާއާއި ގުޅޭގޮތުން މައުލޫމާތުދޭނެ ކަމަށެވެ.
"މިއަހަރު ފަހު ކޮޅު ފައިނޭންޝިއަލް އެކްސްޕޯއެއް ބޭއްވުމަށް ރާވާފައިވާނެ، މި ފައިނޭންޝިއަލް އެކްސްޕޯ ތެރެއިން ވަރަށް ބޮޑަށް މާލީ ކަންތައްތައްތަކާއި ގުޅޭގޮތުން ވީހާވެސް ފުޅާ ދާއިރާއެއްގައި ވީހާވެސް ގިނަ ފަރާތްތަކަށް މައުލޫމާތު ދިނުމުގެ ހަރަކާތްތަކެއް ހިންގާނަން،" ގަވަރނަރ ނަޞީރު ވިދާޅުވިއެވެ.
އާއްމު ދިރިއުޅުމާއި މާލީ ކަންތައްތަކާއި ގުޅިލާމެހިފައިވާއިރު، މާލީ ދާއިރާއާއި ގުޅޭގޮތުން ހޭލުންތެރިވެފައިވުން މުޙިއްމު ކަން ގަވަރނަރގެ ވާހަކަފުޅުގައި ވަނީ ފާހަގަކުރައްވާފައެވެ.
އެމްއެމްއޭއިން މީގެ ކުރިންވެސް ވަނީ ފައިނޭންޝިއަލް އެކްސްޕޯތަށް ވަނީ ބާއްވާފައެވެ. ރާއްޖޭގެ ފައިނޭންޝިއަލް ދާއިރާގައި ހަރަކާތްތެރިވާ ފަރާތަކާއި ގުޅިގެން ބޭއްވި މި އެކްސްޕޯއަށް އާއްމުންގެ ބޮޑު ތަރުހީބެއް ލިބިގެން ދިޔައެވެ. އަދި މާލީ ކަންކަމަށް މީހުން ހޭލުންތެރި ކުރުވުމުގެ ގޮތުން މިއަހަރުގެ ތެރޭގައި އެމްއެމްއޭއިން ވަނީ ގްލޯބަލް މަނީ ވީކްގެ ނަމުގައިވެސް ޚާއްސަ ޙަރަކާތެއް މާލެއާ އަތޮޅު ތެރޭގައިވެސް ކުރިއަށް ގެންގޮސްފައެވެ.