މިއަހަރުގެ ފުރަތަމަ ކުއާޓަރގައި ދައުލަތުގެ ޓެކްސް އިދާރާއަށް އާމްދަނީގެ ގޮތުގައި 4.93 ބިލިއަން ރުފިޔާ ބަލައިގަނެފިއެވެ.
މި އަދަދަކީ މިދިޔަ އަހަރުގެ ފުރަތަމަ ކުއާޓަރގައި ލިބުނު އާމްދަނީގެ އަދަދާއި އަދި މިއަހަރުގެ ފުރަތަމަ ކުއާޓަރގައި ލިބޭނެ ކަމަށް ލަފާކުރި އާމްދަނީގެ އަދަދާއި އަޅާ ބަލާއިރު ދަށް އަދަދެކެވެ.
ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ، މީރާއިން އާއްމުކޮށްފައިވާ މިއަހަރުގެ ފުރަތަމަ ކުއާޓަރގެ މާލީ ހިސާބުތައް ދައްކާގޮތުން، އެ މުއްދަތުގައި އެއޮތޯރިޓީއަށް ބަލައިގަނެފައިވާ ޓެކްސް ފައިސާގެ އަދަދަކީ އެ މުއްދަތުގައި ލިބޭނެ ކަމަށް ލަފާކުރި އަދަދަށްވުރެ 3.1 އިންސައްތަ ދަށް އަދަދެކެވެ.
ލިބުނު އާމްދަނީ ދަށްވެފައިވަނީ ބައެއް ފަރާތްތަކުން އެމުއްދަތުގައި ޓޫރިޒަމް ލޭންޑް ރެންޓް ނުދައްކާ ހުރުމުންނާއި، ބިޒްނަސް ޕްރޮފިޓް ޓެކްސް، ބީޕީޓީގެ ފައިސާ ނުދައްކާ ހުރުމުން ކަމަށް މީރާއިން ހާމަކުރެއެވެ.
ފުރަތަމަ ކުއާޓަރގެ އާމްދަނީގެ ތެރެއިން އެންމެ ބޮޑު ބައެއް ހިއްސާ ކުރަނީ ޖީ.އެސް.ޓީގެ ގޮތުގައި ލިބުނު ފައިސާއެވެ. އެގޮތުން ލިބުނު އާމްދަނީގެ 47 އިންސައްތަ ހިއްސާ ކުރަނީ ޖީއެސްޓީއެވެ. ދެން އެންމެ ބޮޑު ބައެއް ހިއްސާ ކުރަނީ ބިޒްނަސް ޕްރޮފިޓް ޓެކްސްގެ ގޮތުގައި ލިބުނު ފައިސާ އެވެ.
މިއަހަރުގެ ފުރަތަމަ ކުއާޓަރގައި ބަލައިގަނެފައިވާ ޢާމްދަނީގެ ތެރޭގައި 194.1 މިލިއަން އެމެރިކާ ޑޮލަރު ހިމެނެއެވެ. މިއީ ހުސްވި އަހަރުގެ ފުރަތަމަ ކުއާޓަރުގައި ޑޮލަރުން ލިބުނު އާމްދަނީއާއި އަޅާ ބަލާއިރު 2.8 އިންސައްތަ ދަށް އަދަދެކެވެ.