ޢީދު ޗުއްޓީއަށް ޤައުމުން ބޭރަށްދާ ޔޫ.އޭ.އީ ފަތުރުވެރިންގެ މެދުގައި ރާއްޖޭގެ މަޤްބޫލްކަން ބޮޑު

ކުރިއަށް އޮތް ފިތުރު ޢީދު ޗުއްޓީއަށް ޤައުމުން ބޭރަށްދާ ޔޫ.އޭ.އީ ފަތުރުވެރިންގެ މެދުގައި އެންމެ މަޤްބޫލް މަންޒިލްތަކުގެތެރޭގައި ރާއްޖެ ހިމެނޭ ކަމަށް އެޤައުމުގެ ޓްރެވަލް އެޖެންޓުން ހާމަކޮށްފިއެވެ.

ޔޫ.އޭ.އީއަށް މިއަހަރުގެ ފިތުރު ޢީދު ޗުއްޓީއަށް ހަފްތާއެއްހާ ދުވަސް ލިބެއެވެ. ޓްރެވަލް އޭޖެންޓުން ހާމަކުރާގޮތުގައި އެންމެ ޑިމާންޑު ބޮޑު މަންޒިލްތަކަކީ، އާމީނިއާ، ތުރުކީ، ދިވެހިރާއްޖެ އަދި ބެންކޮކްއެވެ. މި މަންޒިލްތަކުގެ ޑިމާންޑު %80 ވަނީ އިތުރުވެފައެވެ.

އަދި މި މަންޒިލްތަކަށް އޮތް ޑިމާންޑާއި އެކު ޖޫންމަހުގެ ފުރަތަމަ ހަފްތާގައި އެތަންތަނުގެ ފްލައިޓް ޓިކެޓްތަކުގެ އަގު 20 އިންސައްތަ އާއި 80 އިންސައްތަ އަށް ވަނީ އުފުލިފައި ކަމަށް ޔޫ.އޭ.އީގެ ޓްރެވަލް އެޖެންޓު ކުންފުންޏެއް ކަމަށްވާ 'އޮމެއިރު ޓްރެވަލް އެޖެންސީ' އިން މައުލޫމާތުދެއެވެ.

ޓްރެވަލް އެޖެންސީއަށް އެންމެ ގިނަ އަދަދަކަށް އަންނަނީ ޔޫރަޕްގެ ޤައުމުތަކާއި، ތައިލޭންޑު އަދި ދިވެހި ރާއްޖެއަށް ދިޔުމަށް މައުލޫމާތު އޮޅުންފިލުވައި، ދަތުރު ބުކް ކުރުމަށް ކަމަށްވެސް އެފަރާތުން މައުލޫމާތުދެއެވެ.
މިއަހަރުގެ އޭޕްރީލްމަހުގެ ނިޔަލަށް މެދުއިރުމަތީގެ ޤައުމުތަކުން ރާއްޖެއަށް ވަނީ 19،253 ފަތުރުވެރިން ޒިޔާރަތްކޮށްފައެވެ. މިއީ %17 އިތުރުއަދަދެކެވެ.

މެދުއިރުމަތީގެ ޤައުމުތަކުންގެ ތެރެއިން ދެވަނައަށް އެންމެ ގިނަ އަދަދަކަށް ރާއްޖެއަށް ފަތުރުވެރިން ޒިޔާރަތްކުރަނީ، ޔުނައިޓަޑް އަރަބް އެމިރޭޓްސް، ޔޫ.އޭ.އީ އިންނެވެ. މިއަހަރުގެ އޭޕްރިލްމަހުގެ ނިޔަލަށް ޔޫ.އޭ.އީން 3،163 ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.