އެންމެ ފުޅާ ދާއިރާއެއްގައި އޮންލައިން ވިޔަފާރިކުރާ "އަލީބާބާ"ގައި ތަކެތި ވިއްކުމުގެ ފުރުސަތު އެމެރިކާގެ ވިޔަފާރިވެރިންނަށް ހުޅުވާލުމަށް އެކުންފުނިން ނިންމައިފިއެވެ.
އެމެރިކާގެ ވިޔަފާރިތަކަށް އަލީބާބާ ހުޅުވާލުމުން އެމެރިކާގައި އޮންލައިން ވިޔަފާރީގައި އެންމެ ކުރީގައި އުޅޭ އެމޭޒަން އަދި ޝޮޕިފައި ފަދަ ކުންފުނިތަކާއި ވާދާކުރެވޭނެކަމަށް އަލީބާބާއިން ދެކެއެވެ.
ޗައިނާގެ ކުންފުންޏެއް ކަމަށްވާ އަލީބާބާގައި މީގެކުރިން އެމެރިކާގެ ވިޔަފާރިތަކަށް އެއްޗެހި ގަތުމުގެ ފުރުސަތު އޮތް ނަމަވެސް، ތަކެތި ވިއްކުމުގެ ފުރުސަތެއް ނޯވެއެވެ. ޗައިނާ އާއި އެމެރިކާއާއި ދެމެދު ވިޔަފާރީގެ ހަނގުރާމައެއް ފަށާފައިވާ ދަނޑިވަޅެއްގައި އަލީބާބާއިން މިފަދަ ނިންމުމެއް ނިންމުމަކީ ގިނަ ބަޔަކަށް ހައިރާންކަން ގެނުވިކަމެކެވެ. ނަމަވެސް މި ނިންމުމާއި ގުޅޭގޮތުން އަލީބާބާ ގުރޫޕުގެ ހެޑް އޮފް ނޯތު އެމެރިކަން، ޖޯން ކެޕްލަން ވިދާޅުވީ ޗައިނާއާއި އެމެރިކާއާއި ދެމެދު ކުރިއަށްދާ ވިޔަފާރީގެ ހަމަނުޖެހުންތަކާއި މެދު ހާސްނުވާ ކަމަށެވެ.
އޭނާ ދެކޭ ގޮތުގައި ދުނިޔޭގެ ހުރިހާ ހިސާބެއްގެވެސް ކުދި ވިޔަފާރިތައް ހިންގާ ފަރާތްތަކުން ބޭނުންވަނީ އެމީހުންގެ މުދާ ވިއްކުމަށް ކަމަށެވެ. އަދި އެމެރިކާގެ ވިޔަފާރިތަަކަށް އަލީބާބާގައި ތަކެތި ވިއްކުމުގެ ފުރުސަތު ހުޅުވާލުމުން ރަނގަޅު ތަރުޙީބެއް ލިބިގެންދާނެކަމަށް ޤަބޫލުކުރާކަމަށް ކެޕްލަން ވިދާޅުވިއެވެ.
އަލީބާބާއަކީ ޗައިނާގެ ޖެކް މާ ނަމަކަށް ކިޔާ މީހެއް 1999 އަހަރު ފެށި ވިޔަފާރިއެކެވެ. ފާއިތުވި އަހަރުތަކުގައި އެކުންފުނީގެ މަޤްބޫލްކަން އެތައް ގުނައަކަށް އިތުރުވެ، ދުނިޔޭގެ އެންމެ ވަރުގަދަ އޮންލައިން ވިޔަފާރިކުރާ ޕްލެޓްފޯމްތަކުގެ ތެރޭގައި އަލީބާބާ މިހާރު ހިމެނެއެވެ.