ފަތުރުވެރިންގެ ގޮތުގައި އަންނަ ކުޑަކުދިންނަށް ރާއްޖެއާ ގުޅޭ މަޢުލޫމާތު ލިބޭނެ ގޭމް ފޮތެއް ތަޢާރަފްކޮށްފި
ފަތުރުވެރިންގެ ގޮތުގައި ރާއްޖެއަށް އަންނަ ކުޑަކުދިންނަށް ރާއްޖެއާއި ރާއްޖޭގެ ސަޤާފަތާއި ދިއިއުޅުމުގެ އާދަކާދައިގެ މަޢުލޫމާތު ލިބޭނެހެން ގޭމް ފޮތެއް ކްރޮސް ރޯޑްސްއިން ތަޢާރަފްކޮށްފިއެވެ.
"މޯލްޑިވްސް ޑިސްކަވަރީ ސެންޓަރ އެކްޓިވިޓީ ބުކް" އަކީ ބައިނަލްއަޤްވާމީ ޖަމްޢިއްޔާއެއްކަމަށްވާ "ލިވް އެންޑް ލަރން އެންވާރަމެންޓަލް އެޑިއުކޭޝަން"އިން ކްރޮސްރޯޑްއަށް ޚާއްސަކޮށްގެން ތައްޔާރުކޮށްފައިވާ ފޮތެކެވެ.
ކުޑަކުދިންނަށް ޚާއްސަކޮށްގެން ފަރުމާކޮށްފައިވާ މި ފޮތަކީ، ރާއްޖެއަށް އަންނަ ކުޑަކުދިންނަށް، ދިވެހިން އާއްމުކޮށް ބޭނުންކުރާ ބައެއް ބަސްތަކާއި، ދިވެހި ރާއްޖޭގެ ސަޤާފީ ކަންކަމާއި، ރާއްޖޭގެ ރަށްތަކާއި، ކެއިންބުއިމާއި ހެދުންއެޅުމުގެ އާދަކާދަތައްފަދަ ކަންކަމާއި ގުޅޭ މަޢުލޫމާތުތައް، ގޭމުތަކުގެ ޒަރިއްޔާއިން ދަސްކޮށްދިނުމުގެ މަޤްސަދުގައި ތައްޔާރުކޮށްފައިވާ ފޮތެކެވެ.
ފޮތް ލޯންޗްކޮށްދެއްވީ ހާޑް ރޮކް މޯލްޑިވްސްގެ ޖެނެރަލް މެނޭޖަރ ޓޮލްގަ އުނާންއެވެ. ފޮތް ލޯންޗްކޮށްދެއްވައި ވާހަކަދައްކަވަމުން ޓޮލްގާ އުނަން ވިދާޅުވީ ކްރޮސްރޯޑަކީ ވަރަށް ބޮޑަށް އާއިލާތަކަށް ޢަމާޒުކޮށްގެން ކުރިއަށްގެންދާ ފަތުރުވެރިކަމުގެ ވިޔަފާރިއަކަށްވެފައި، ތުއްތު ކުދިންނަށް ރާއްޖެއާއި ރާއްޖޭގެ ތިމާވެއްޓާއި ގުޅޭ މަޢުލޫމާތު އެނގުމަކީ ކުދިންގެ މަޢުލޫމާތު މުއްސަނދިވެ، ދިވެހިރާއްޖެފަދަ ނާޒުކު ތިމާވެށިތައް ރައްކާތެރި ކުރުމުގެ މުހިންމުކަން ކުދިންނަށް އެނގިގެންދާނެ ކަމެއްކަމަށެވެ. އަދި މި ފޮތުގެ ޒަރިއްޔާއިން ދިވެހިންގެ ދިރިއުޅުން ހުންނަ ގޮތާއި ތާރީޚް އެނގި ރާއްޖެއާމެދު ބޭރު ޤައުމުތަކުގެ ކުދިންގެ ޝަޢުގު އުފެދިގެން ދާނެކަމަށްވެސް އޭނަ ވިދާޅުވިއެވެ.
"މަޖާ ގޭމް ތަކެއްގެ ތެރެއިން މި މަޢުލޫމާތު ދެވެނީ. ކޮންމެ ކުޑަކުއްޖަކަށްވެސް މި ގޭމްތައް ކުޅެލާ ދަސްކުރެވޭނެ. މި ފޮތް ކިޑްސް ކްލަބާއި، މެރީނާއާއި، ލައުންޖްތައް އަދި ގްރޫޕް އެކްޓިވިޓީސްތަކުގައިވެސް ބޭނުންކުރާނަން." ހާޑްރޮކްގެ ޖެނެރަލް މެނޭޖަރ ވިދާޅުވިއެވެ.
މި ފޮތަކީ ބައިނަލްއަޤްވާމީ ޖަމްޢިއްޔާއެއްކަމަށްވާ ލިވް އެންޑް ލަރން އެންވާރަމެންޓަލް އެޑިއުކޭޝަންއިން އުފެއްދި ފޮތެކެވެ. ފޮތް ލިޔެފައިވަނީ މަރިޔަމް ޝަޒްނާއާއި ޒަމީލާ އަޙްމަދުއެވެ. އަދި ފަރުމާކޮށްފައިވަނީ އަޙްމަދު އަލްހާމް އާދިލްއެވެ. ފޮތާއި ގުޅޭގޮތުން ވާހަކަދައްކަވަމުން ފޮތް އުފެއްދި ޖަމްޢިއްޔާގެ ކަންޓްރީ މެނޭޖަރ ޒަމީލާ އަޙްމަދު ވިދާޅުވީ އެ ޖަމްޢިއްޔާއިން އަބަދުވެސް މަސައްކަތްކުރަނީ ކުޑަކުދިންނަކީ ކަންކަމަށް ހޭލުންތެރި، މަޢުލޫމާތު ހުރި ބަޔަކަށް ހެދުމަށްކަމަށެވެ. މި ގޭމް ފޮތަކީ 20 ސަފްހާގެ ގޭމް ފޮތެކެވެ.
"ކުދިންނަށް ކަންކަން އުނގަންނައިދޭނެ އާ ގޮތްތައް ހޯދާ ތަޢާރަފްމިކުރަނީ. މަޖާ ހަރަކާތްތަކުގެ ތެރެއިންވެސް މި ދެވެނީ މުހިންމު މަޢުލޫމާތުތައް. އަދިވެސް މިފަދަ ފޮތްތައް ތަޢާރަފްކުރާނަން." ޒަމީލާ ވިދާޅުވިއެވެ.
ކްރޮސްރޯޑްސްގައި ހިމެނޭ ރިޒޯޓްތައް މިއަހަރުގެ ތެރޭގައި ހުޅުވުމަށް އަންނަނީ ތައްޔާރުވަމުންނެވެ.