ސަރުކާރުން އެމްޑީޕީއާއެކު ބާއްވާ ތިންވަނަ ބައްދަލުވުން މިރޭ ބޭއްވުމަށް ނިންމަވައިފިއެވެ.ރައީސް އޮފީހުގެ ތަރުޖަމާނު މިއަދު ކުރެއްވި ޓްވީޓެއްގައި ވިދާޅުވެފައިވަނީ މިބައްދަލުވުން އޮންނާނީ މިރޭ 10:30ގައި ރައީސް އޮފީހުގައި ކަމަށެވެ.މިރޭ ބޭއްވުމަށް ހަމަޖެހިފައިވާ މަޝްވަރާތަކުގައި އޮންނާނީ ސަރުކާރުގެ ފަރާތުން އެމްޑީޕީއަށް ކަންތައްތަކެއް ހުށައެޅުންކަމަށް މަޝްވަރާތަކުގައި ބައިވެރިވެވަޑައިގަންނަވާ އެމްޑީޕީގެ މަންދޫބުން އިއްޔެވަނީ ވިދާޅުވެފައެވެ.ސަރުކާރުން އެމްޑީޕީއާއެކު ކުރިއަށްގެންދާ މަޝްވަރާތަކުގެ ތިންވަނަ ބައްދަލުވުން މިރޭ ބޭއްވުމަށް ހަމަޖެހިފައިވާއިރު، ޕީއެސްއެމަށް މަޢުލޫމާތުދެއްވަމުން މަޝްވަރާތަކުގައި އިސްކޮށް ހަރަކާތްތެރިވެވަޑައިގަންނަވާ އެމްޑީޕީގެ ޕާލިމެންޓްރީ ގްރޫޕްގެ ލީޑަރ އިބްރާހިމް މުހައްމަދު ޞާލިޙު ވިދާޅުވީ، މިފަހަރުގެ މަޝްވަރާތަކަށް އެމްޑީޕީގެ ފަރާތުން ކަންތައްތަކެއް ހުށަނާޅާނެކަމަށެވެ. ނަމަވެސް އެމްޑީޕީން ކުރަންޖެހޭނެ ކަންތައްތަކެއް ސަރުކާރުން އެޕާޓީއަށް ހުށައަޅާނެކަމަށް އޭނާ ވިދާޅުވިއެވެ.އިބްރާހިމް މުހައްމަދު ޞާލިޙު ވިދާޅުވީ، މަޝްވަރާތައް ކުރިއަށް ދަނީ ދެފަރާތުންވެސް ބޭނުންވާގޮތަށްކަމަށާއި، ކާމިޔާބުކަމާއެކު މަޝްވަރާތައް ނިންމާލެވޭނެކަމުގެ ޔަގީންކަން އެބައޮތްކަމަށެވެ.މަޝްވަރާތަކުގެ ތިންވަނަ ބައްދަލުވުން މިދިޔަ ބުދަދުވަހު ބޭއްވުމަށް ކުރިން ހަމަޖެހިފައިވީނަމަވެސް މަޝްވަރާތަކުގައި ބައިވެރިވާ ބައެއް ފަރާތްތައް ރަށުގައި ނޫޅުއްވާތީ އެދުވަހުގެ ބައްދަލުވުން ވަނީ ކެންސަލްކޮށްފައެވެ.ރައީސުލްޖުމްހޫރިއްޔާ އަބްދުﷲ ޔާމީންގެ އިސްނެންގެވުމާއެކު ކުރިއަށްގެންދާ މަޝްވަރާތަކުގައި މިހާތަނަށް އިޖާބަދީފައިވަނީ، އިިދިކޮޅު އެމްޑީޕީއާއި ޖުމްހޫރީޕާޓީންނެވެ. މި މަޝްވަރާތަކުގައި އަދާލަތު ޕާޓީން ބައިވެރިވާނެކަން އަދި ހާމަކޮށްފައެއްނުވެއެވެ.