ދުނިޔޭގައި ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަހުގެ އަސަރެއް އުތުރު ކޮރެއާއަށް ކޮށްފައިނުވާކަމަށް އެޤައުމުގެ ސަރުކާރުން ބުނެފިއެވެ.
ނުރައްކާތެރި ކޮރޯނާވައިރަސް ފެތުރުން ހުއްޓުވުމަށް އުތުރު ކޮރެއާއިންވަނީ ހަރުކަށި ފިޔަވަޅުތަކެއް އަޅައިފައެވެ. އޭގެ ތެރޭގައި އެޤައުމަށް އެތެރެވާ ހުރިހާ އެންމެން ވަކި މުއްދަތެއް ހަމަވަންދެން ކަރަންޓީނުކުރުމާއި ޗައިނާއާއި ރަޝިއާއަށް ދަތުރުކުރުން ހުއްޓާލުމާއި އެޤައުމުތަކުން އުތުރު ކޮރެއާއަށް އަންނަ ފްލައިޓުތައް ހުއްޓާލުމާއި ފަތުރުވެރިކަން މަޑުޖައްސާލުން ހިމެނެއެވެ. ޗައިނާއާ އިންވެގެން އޮންނަ އުތުރު ކޮރެއާއިން ބުނެފައިވަނީ އެޤައުމުން މިހާތަނަށް ކޮރޯނާވައިރަހުގެ އަސަރެއް ފެނިފައިނުވިނަމަވެސް ރައްކާތެރިކަމުގެ ފިޔަވަޅުތައް ލުއިނުކުރާނެކަމަށެވެ.
އުތުރު ކޮރެއާއިން މިހާތަނަށް ކޮރޯނާވައިރަސް ޖެހިފައިވާ މީހެއް ފެނިފައިނުވިނަމަވެސް ދެކުނު ކޮރެއާގައި ކޮރޯނާވައިރަސް ޖެހިފައިވާ 15 މީހުން ފެނިފައިވެއެވެ. އޭގެ ތެރެއިން 3 މީހުން ފެނިފައިވަނީ މިއަދުއެވެ. ދެކުނު ކޮރެއާއަކީ މިހާތަނަށް ކޮރޯނާވައިރަސް ޖެހިފައިވާ މީހުން ފަސްވަނައަށް އެންމެ ގިނައިން ފެނިފައިވާ ޤައުމެވެ.
ޗައިނާގެ ވުހާން ސިޓީން އެންމެ ފުރަތަމަ ފެނުނު ކޮރޯނާވައިރަސް މިހާތަނަށް 14،000އަށްވުރެ ގިނަ މީހުންނަށް ޖެހި، 305 މީހުންވަނީ މަރުވެފައެވެ. އެވައިރަސް މިހާރުވަނީ 27 ޤައުމަކަށާއި ސަރަޙައްދަށް ފެތުރިފައެވެ.