ދިވެހި ފިލްމްތަކަށް ލޯބިކުރާ ފަރާތްތަކުގެ މެދުގައި ޑާކްރެއިން އެންޓަޓެއިންމަންޓަކީ މިހާރު އައު ނަމަކަށް ނުވާނެއެވެ. މީގެ ކުރިންވެސް ކާމިޔާބު އެތައް ފިލްމްތަކެއް ބެލުންތެރިންނާއި ހަމައަށް ގެނެސްދީފައިވާ ޑާކްރެއިނުން އަނެއްކާވެސް މިދަނީ މެގަ ޕްރޮޖެކްޓެއް ފެށުމަށް ތައްޔާރުވަމުންނެވެ.
ރާއްޖޭގެ ވެރިކަމުގެ ތަޚުތުގައި ހަމައެކަނި ރެދަލިކުރެއްވި ރާނީ "ރެހެންދި ހަދީޖާ"ގެ ހަޔާތްޕުޅުގެ މައްޗަށް ފުރަތަމަ ފަހަރަށް ތިއެރިޓިކަލް ފިލްމެއް އުފެއްދުމަށް ޑާކްރެއިން އިން ތައްޔާރުވަމުންދާއިރު، މިއީ އެ ޕްރޮޑަކްޝަން ހައުސް އިން އުފައްދާ އެންމެ ވަރުގަދަ އަދި އެންމެ ބުރަ މަސައްކަތުގެ ގޮތުގައި ޑާކްރެއިން އިން ބުނެއެވެ.
"ރެހެންދި ހަދީޖާ"ވެސް ޑައިރެކްޓްކުރަނީ ޑާކްރެއިނަށް މީގެ ކުރިންވެސް ކާމިޔާބު ފިލްމްތަކެއް ޑައިރެކްޓް ކޮށްފައިވާ އަޙްމަދު ޝިނާނެވެ. މި ފިލްމުގެ ވާހަކަ ލިޔަނީ އައިޝަތު ފުޢާދާއި އަޙްމަދު ޠަލާލެވެ. ފިލްމްގެ ވާހަކަ އެކުލަވާލުމާއި، ހަޤީޤަތާއި ވީހާވެސް އެއްގޮތްކުރުމަށް ބޭނުންވާ ތާރީޚު ދިރާސާކުރުމުގެ މަސައްކަތް މިހާރުވަނީ އެއްކޮށް ނިންމާލާފައެވެ. މި ފިލްމަށް ބޭނުންވާ ސްކްރިޕްޓް އައުޓްލައިންގެ މަސައްކަތް ގާތްގަނޑަކަށް ނިމި، ވާހަކަ ލިޔުމުގެ މަސައްކަތް ވަރަށް އަވަހަށް ފަށާނެކަމަށް ޑާކްރެއިނުން ބުނެއެވެ.
މުޙައްމަދު ޢަލީ އާއި އައިޝަތު ފުޢާދު ޕްރޮޑިއުސްކުރާ މި ފިލްމަށް ކުރެވޭ އުއްމީދުތައް ބޮޑުކަމަށާއި، ހަޤީޤަތާއި އެއްގޮތްކަން ދެއްކުމަށް ކުރެވެން ހުރި ހުރިހާ މަސައްކަތެއް ކުރާނެކަމަށް ޑާކްރެއިނުން ބުނެއެވެ.
އައްސުލްޠާނާ ޚަދީޖާ ރެހެންދި ކަނބައިދި ކިލެގެ ސިރީ ރާދަ އަބާރަނަ މަހާ ރެހެންދި (ރެހެންދި ޚަދީޖާ) ގެ ޙަޔާތައް ބިނާކޮށް ހަދާ މި ފިލްމުގައި އޭރުގެ ކަންކަން އަދި ޒަމާން، ގެނެސްދެވެން އޮތް އެންމެ ފުރިހަމައަށް ބެލުންތެރިންނާއި ހަމައަށް ގެނެސްދިނުމަށާއި، އޭރުގެ ޝަހުސިއްޔަތުތަކާއި، ހެދުން، ބަސްމަގު، މިއުޒިކް އަދި ހާދިސާތައް ހިނގައިދިޔަ ތަންތަން ވީހައިވެސް އަސްލާއި އެއްގޮތަށް ގެނެސްދިނުމަށް ވަރަށް ބޮޑު ސަމާލުކަމެއް ދޭނެކަމަށް ޑާކްރެއިނުން ބުނެއެވެ.
"ރެހެންދި ހަދީޖާ" ފިލްމްގެ މަސައްކަތްތައް ވީހާވެސް އަވަހަކަށް ފަށާ، ފިލްމް ބެލުންތެރިންނާއި ހަމައަށް އަވަސް މުސްތަޤުބަލެއްގައި ގެނައުމަށް ޑާކްރެއިނުންދަނީ ތައްޔާރުވަމުންނެވެ. އަދި މިއީ ދިވެހި ސިނަމާތަކަށް މިހާތަނަށް އަންނާނެ އެންމެ ތަފާތު އަދި ފެންވަރުގެ ގޮތުންވެސް މޮޅު ފިލްމަކަށް ހެދުމަކީ ޑާކްރެއިންގެ އަމާޒެވެ.
2006 ވަނަ އަހަރު ވަރަށްވެސް އާދައިގެގޮތަކަށް މަސައްކަތް ފެށި ޑާކްރެއިނަކީ މިހާރު ރާއްޖޭގެ އެންމެ ބޮޑު އަދި އެންމެ ކާމިޔާބު އެއް ފިލްމް ޕްރޮޑަކްޝަން ހައުސްއެވެ. ރާއްޖޭގައި އުފެއްދި އެންމެ ފުރަތަމަ ތްރީޑީ ފިލްމް އުފެއްދި މި ޕްރޮޑަކްޝަން ހައުސްއިން މިހާތަނަށް 8 ޓީވީ ސީރީސްއާއި، 4 ކުރު ފިލްމް އަދި 12 ފީޗަރ ފިލްމް އުފައްދައި ބެލުންތެރިންނާއި ހަމައަށް ވަނީ ގެނެސްދީފައެވެ. ހަމައެހެންމެ ފިލްމް އުފެއްދުމުގެ އިތުރުން، ޓީވީ ކޮމާޝަލްއާއި، ވީޑިއޯ އަދި އޯޑިއޯގެ ޕޯސްޓް ޕްރޮޑަކްޝަން މަސައްކަތާއި، ހިލޭސާބަހަށް އެކިއެކި އެން.ޖީ.އޯ އާއި ޖަމިއްޔާތަކަށް އިޖްތިމާޢީ އަދި ހޭލުންތެރި މެސެޖް ލިބޭފަދަ ލަވައާއި ޓީވީ ސްޕޮޓްސްތައްވެސް ޑާކްރެއިނުންދަނީ އުފައްދަމުންނެވެ.
ކޮންމެއަކަސް "ރެހެންދި ހަދީޖާ" އުފެއްދުމުގެ މަސައްކަތް ކުރާކަން ޑާކްރެއިނުން އިޢުލާންކުރުމާއެކު މިހާރު އެންމެ ގިނަ ބަޔަކު ޝަޢުގުވެރިކަމާއެކު އިންތިޒާރުކުރަމުންދަނީ މި ފިލުމުގައި ރެހެންދި ހަދީޖާގެ ރޯލުން ފެނިގެންދާނީ ކޮން މޫނެއްތޯ ބަލާލުމަށެވެ. ރަނިކަމުގެ ތާޖު އަޅާނީ ކޮން ފަންނާނެއްތޯ ބަލާލުމަށެވެ. މިކަމަށް ބެލުންތެރިންގެ ކިބައިން އަދި ހަމަ ކުޑަ އިންތިޒާރެއް ކޮށްލުމަށް ޑާކްރެއިނުން އެދެއެވެ.