މާލޭ އިންޑަސްޓްރިއަލް ޒޯން ސާފުކުރުމުގެ މަސައްކަތް ވެމްކޯއާ ގުޅިގެން ކުރަމުންދާ ކަމަށް މާލޭ ސިޓީ ކައުންސިލުން ވިދާޅުވެއްޖެއެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން މާލޭ ސިޓީގެ މޭޔަރ ސިފާ މުޙައްމަދު ވިދާޅުވީ، އިންޑަސްޓްރިއަލް ޒޯނުގެ މަގުތައް މާލޭ ސިޓީ ކައުންސިލާއި ޙަވާލުކޮށްފައިވާކަން ޕްލޭނިންގ މިނިސްޓްރީގެ ފަރާތުން ސިޓީ ކައުންސިލަށް މިމަހުގެ 9 ވަނަ ދުވަހު އަަންގާފައިވާކަމަށެވެ. އަދި މާލޭ ސިޓީ ކައުންސިލުގެ މަގުތައް ކުނިކަހާ ސާފުކުރުމަށް ވެމްކޯއާއެކު ވެފައިވާ އެއްބަސްވުމުގައި އިންޑަސްޓްރިއަލް ޒޯނުގެ މަގުތައް ކުރިން ހިމަނާފައިނުވާތީ، ވެމްކޯއާއި ގުޅިގެން އެ ސަރަޙައްދުގެ މަގުތައް ސާފުކުރުމާގުޅޭގޮތުން މަޝްވަރާކުރަމުންދާ ކަމަށް މޭޔަރ ވިދާޅުވިއެވެ.
މާލޭ ސިޓީގެ މޭޔަރ ސިފާ ވިދާޅުވީ، އިންޑަސްޓްރިއަލް ޒޯނުން ކުންފުނިތަކަށާއި، ބައެއް އަމިއްލަ ފަރާތްތަކަށް ބިން ދޫކޮށްފައިވީނަމަވެސް މިއަދާ ހަމައަށްވެސް އޭގެ ތެރެއިން ގިނަ ބިންތައް ހުރީ ބަންދުނުކޮށް، ވަރަށް ހާމައަށް ކަމަށެވެ. އަދި ބައެއް ފަރާތްތަކުން ގޭގެއިންނާއި ކޮންސްޓްރަކްޝަން ސައިޓްތަކުން ޕިކަޕުގައި ގެނެސް އެތަންތަނަށް ކުނި އަޅާކަން ފާހަގަކުރެވިފައިވާކަމަށެވެ. މިއީ އެއްވެސް ޙާލެއްގައި ސިޓީ ކައުންސިލުން ހިތްވަރުދޭނެކަމެއް ނޫންކަން ފާހަގަކުރައްވާ، އިންޑަސްޓްރިއަލް ޒޯން ބެލެހެއްޓެމުގެ މަސައްކަތް ކުރިއަށްއޮތް ދެ ދުވަހެއް ތެރޭ ހަމަޖައްސަވާނެކަމަށް މޭޔަރ ވިދާޅުވިއެވެ.
އެގޮތުން ވަރަށް އަވަހަށް އެ ސަރަޙައްދުގައި ސިޓީ ކައުންސިލުގެ ނުވަތަ ފުލުހުންގެ ޕޯސްޓެއް ޤާއިމުކުރާނެކަމަށް މޭޔަރ ވިދާޅުވިއެވެ. އަދި ވިޔަފާރިތަކާއި ކުންފުނިތަކުންވެސް ވެމްކޯގައި ރަޖިސްޓްރީކޮށްގެން ކުނި އުކާލުމުގެ ކަންކަން ކުރެއްވުމަށާއި، އާއްމު ފަރާތްތަކުންވެސް އެ ސަރަޙައްދަށް ކުނި ނޭޅުމަށް މޭޔަރ ވަނީ އިލްތިމާސްކުރައްވާފައެވެ.
މާލޭ އިންޑަސްޓްރިއަލް ވިލެޖް ސަރަޙައްދަކީ ތޮއްޖެހިފައިވާ މާލޭގެ ތެރޭގައި ހިނގާފާނެ ނުރައްކާތެރި ޙާދިސާތައް މަދުކުރުމަށްޓަކާ މާލޭގެ އެކި ސަރަޙައްދުތަކުގައި އެކިކަހަލަ ސިނާޢީ މަސައްކަތްތައް ކުރާ ތަންތަން އެކަހެރި ތަނަކަށް ބަދަލުކުރުމުގެ ބޭނުމުގައި ތަރައްޤީކޮށްފައިވާ ސަރަޙައްދެކެވެ. 2016 ވަނަ އަހަރު ފެށި މި މަސައްކަތުގެ ދަށުން މާލޭ ހުޅަނގު ދެކުނު ފަރާތު މޫދުން 6.9 ހެކްޓަރުގެ ބިން ހިއްކާ ނިންމާ، ރިވެޓްމަންޓް ޖަހާ، ތާރު އަޅައިގެން މަގުތައް ވަނީ ހަދާ ނިންމާފައެވެ.
250 މިލިއަނަށްވުރެ ގިނަ ރުފިޔާ ޚަރަދުކޮށްގެން ސިނާޢީ މަސައްކަތަށް ޚާއްސަކޮށްގެން ތަރައްޤީކޮށްފައިވާ މިސަރަޙައްދުން މިހާރު ފެންނަނީ އެކިޒާތުގެ ކުންޏާއި، ބައު ތަގަނޑާއި، ހަލާކުވެފައިވާ ވެހިކަލްތަކުން ފުރެމުންދާ މަންޒަރެވެ. ބައެއް ކުންފުނިތަކަށް އިންޑަސްޓްރިއަލް ޒޯނުން ބިން ދޫކޮށްފައިވީނަމަވެސް، ގިނަ ބިންތައް ފެންނަނީ ކުނިބުނި ޖަމާކުރާ ތަނެއްގެ ގޮތުގައެވެ. ތެޔޮ ހުސްކުރި ފީފާތަކާއި، ގޭތެރޭ ހިފާގެންގުޅޭ ސާމާނާއި، ކޮސްޓްރަކްޝަން ސައިޓްތަކުން އުކާލާ ކުނިތައްވެސް އިންޑަސްޓްރިއަލް ވިލެޖް ސަރަޙައްދަށް ޖަމާކޮށްފައި އެބަހުއްޓެވެ.