ސަރަޙައްދީ ފަތުރުވެރިކަމުގެ ދާއިރާއާއި ގުޅޭ މުޙިއްމު މަޝްވަރާތަކެއް ކުރުމަށް، ޔޫ.އެން.ޑަބްލިއު.ޓީ.އޯގެ ކޮމިޝަން ފޮރ ސައުތު އޭޝިޔާގެ 32 ވަނަ ބައްދަލުވުން، އަންނަ ހަފްތާގެ އަންގާރަދުވަހު ބޭއްވުމަށް ނިންމައިފިއެވެ.
ސަރަޙައްދީ ޤައުމުތަކުގެ ފަތުރުވެރިކަމުގެ ދާއިރާގައި ހަރަކާތްތެރިވާ ސަރުކާރުގެ އިސްވެރިން ބައިވެރިވާ މި ބައްދަލުވުމުގެ ރިޔާސަތު ބަލަހައްޓާނީ ރާއްޖެއިންނެވެ. އެއީ ސައުތު އޭޝިއާ ކޮމިޝަންގެ ޗެއަރގެ ހައިސިއްޔަތުން ޓޫރިޒަމް މިނިސްޓަރ ޢަލީ ވަޙީދެވެ.
މިބައްދަލުވުމުގައި ޔޫ.އެން.ޑަބްލިއު.ޓީ.އޯގެ ސެކްރެޓަރީ ޖެނެރަލް ރޫރަތް ޕޮލޮލިކަޝްވިލި ބައިވެރިވަޑައިގަންނަވާނެ ކަމަށް ޓޫރިޒަމް މިނިސްޓްރީން މައުލޫމާތުދެއެވެ.
ޔޫ.އެން.ޑަބްލިއު.ޓީ.އީގެ ކޮމިޝަން ފޮރ އީސްޓް އޭޝިއާ އެންޑް ދަ ޕެސިފިކް، އަދި ކޮމިޝަން ފޮރ
ސައުތު އޭޝިއާގެ 32 ވަނަ ބައްދަލުވުން ބާއްވާނެ ޤައުމަކަށް ސްރީލަންކާ ހޮވިފައިވީނަމަވެސް، ދުނިޔެއަށް ކުރިމަތިވި ކޯވިޑް-19 ގެ ބަލިމަޑުކަމާގުޅިގެން މިބައްދަލުވުން މިހާރު ބޭއްވުމަށް ނިންމާފައިވަނީ އޮންލައިންކޮށެވެ.
މިބައްދަލުވުމުގެ އެޖެންޑާގައި ފަތުރުވެރިންގެ ސަލާމަތާއި ރައްކާތެރިކަމާއި، އެމީހުންގެ އިތުބާރު ނެގެހެއްޓުމާއި، ކޯވިޑް-19 އާ ގުޅިގެން ސިޔާސަތުތައް ކަނޑައެޅުން ހިމެނެއެވެ. މީގެ އިތުރުން، ކޯވިޑް-19 ގެ ސަބަބުން ދުނިޔޭގެ ފަތުރުވެރިކަމަށް ކޮށްފައިވާ އަސަރުތަކާއި ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ. ހަމައެހެންމެ، ޔޫ.އެން.ޑަބްލިއު.ޓީ.އޯގެ "ގްލޯބަލް ގައިޑްލައިން ޓު ރީ-ސްޓާޓް ޓޫރިޒަމް"އަށް މެންބަރުން ޚިޔާލު ބަދަލުކުރުމަށް ވެސް ހަމަޖެހިފައިވެއެވެ.
ދުނިޔޭގެ ފަތުރުވެރިކަމާއި ގުޅޭ ޖަމްޢިއްޔާ، ޔޫއެންޑަބްލިއުޓީއޯއިން ސައުތު އޭޝިއާގެ ޤައުމުތަކަށް އަމާޒުކޮށްގެން އެކުލަވާލާފައިވާ ކޮމިޝަންގެ ޗެއަރކަން، ނުވަތަ ރިޔާސަތު ބެލެއްޓުން ރާއްޖެއާއި ހަވާލުކޮށްފައިވަނީ 2020-2022 އަށެވެ.