ދައުލަތަށް އެކި ފަރާތްތަކުން ދައްކަންޖެހޭ ފައިސާގެ ތެރެއިން ނުލިބި ހުރި ފައިސާ ހޯދުމަށް މިއަހަރުގެ ފުރަތަމަ ކުއާޓަރގައި ކުރި މަސައްކަތުން 169 މިލިއަން ރުފިޔާ ހޯދާފައިވާކަމަށް މީރާއިން ހާމަކޮށްފިއެވެ.
މޯލްޑިވްސް އިންލެންޑް ރެވެނިއު އޮތޯރިޓ، މީރާއިން އާއްމުކޮށްފައިވާ މިއަހަރުގެ ފުރަތަމަ ކުއާޓަރގެ މާލީ ރިޕޯޓުގައިވާ ގޮތުން މީރާއަށް ނުލިބި ހުރި ފައިސާ ހޯދުމަށް ކުރަމުންދާ މަސައްކަތުގެ ތެރެއިން 169،334،890.65 މިލިއަން ރުފިޔާ ވަނީ ހޯދާފައެވެ.
މީރާއަށް ދައްކަންޖެހޭ ފައިސާގެ ތެރެއިން ނުދައްކާހުރި ފައިސާތައް ހޯދާފައިވާގޮތުގެ މައުލޫމާތުވެސް ކުއާޓަރލީ ރިޕޯޓުގައި ހިމަނާފައިވެއެވެ. އެގޮތުން މީރާއަށް ފައިސާ ނުދައްކާ ފަރާތްތަކުގެ އެކައުންޓްތައް ފްރީޒްކޮށްގެން 2 މިލިއަން ރުފިޔާ ވަނީ ހޯދާފައިވެއެވެ. އަދި ކޯޓު މެދުވެރިކޮށް 6000 ރުފިޔާ ހޯދާފައިވާއިރު، ޑިއުޒް ކްލިއަރަންސްގެ ގޮތުގައި 31 މިލިއިން ރުފިޔާ ހޯދާފައިވާ ކަމަށް މީރާއިން ހާމަކުރެއެވެ. މީގެއިތުރުންވެސް އެކިއެކި ޕޮލިސީތަކުގެ ދަށުން މީރާއިން ވަނީ ނުލިބި ހުރި ފައިސާގެ ތެރެއިން 135.5 މިލިއަން ރުފިޔާ ހޯދާފައެވެ.
ކޯޓުމެދުވެރިކޮށް ފައިސާ ހޯދުމަށް މީރާއިން ކުރަމުންދާ މަސައްކަތުގައި މިއަހަރުގެ ފުރަތަމަ ކުއާޓަރުގައި އެއް މައްސަލަ ވަނީ މީރާއާ އެއްކޮޅަށް ނިމިފައެވެ. އެ މުއްދަތުގައި 2 މައްސަލައެއް މީރާއިން ސިވިލް ކޯޓަށް ވަނީ ހުށަހަޅާފައެވެ. މީރާއާ ދެކޮޅަށް 28 މައްސަލައެއް ހުށަހަޅާފައިވާއިރު، އޭގެ ތެރެއިން 2 މައްސަލަ ވަނީ މީރާއާ ދެކޮޅަށް ނިމިފައެވެ.
ފުރަތަމަ ކުއާޓަރގެ ތެރޭގައި ޓެކްސް ބަޔާން ހުށަހަޅާފައި ނުވާތީ 2938 ފަރާތަކަށާއި، ދައުލަތަށް ފައިސާ ދައްކަންޖެހި ނުދައްކާ ތިބި 1932 ފަރާތަކަށް އެކަން ހަނދާންކޮށްދީ ފައިނަލް ނޯޓިސް ވަނީ ހަވާލުކޮށްފައެވެ.
ދައުލަތަށް ފައިސާ ދައްކަންޖެހޭ ފަރާތްތަކުގެ ތެރެއިން ގަވާއިދުން ފައިސާ ނުދައްކާ ފަރާތްތަކަށް މީރާއިން ވަނީ ލުއިގޮތްތަކެއް ހަމަޖައްސައިދީފައެވެ. އެގޮތުން ފައިސާ އެކި ދުވަސްތަކަށް ބަހާލައިގެން ދެއްކޭނެ ގޮތް 52 ފަރާތަކަށް ހަމަޖައްސާދީފައިވާކަމަށް މީރާގެ މިއަހަރުގެ ފުރަތަމަ ކުއާޓަރގެ ރިޕޯޓުގައިވެއެވެ.