މާލެއަށް ދިރިއުޅުން ބަދަލުކުރަން ޖެހޭ އެއް ސަބަބަކަށް ވެފައިވަނީ ރަށްރަށުގައި ވަޒީފާގެ ފުރުސަތުތައް ނެތުމެވެ. ބައެއް ރަށްރަށުގެ އާބާދީ ކުޑަވުމުން، ވިޔަފާރިއެއް ފެށި ނަމަވެސް ކާމިޔާބު ވުމުގެ ފުރުސަތު ކުޑައެވެ. އަދި އަމިއްލަ ވިޔަފާރިއެއް ފަށަން ބޭނުންވި ކަމުގައިވީނަމަވެސް އެކަމަށް ބޭނުންވާ މާލީ އެހީތެރިކަން ހޯދުމަކީވެސް ދަތި ކަމެކެވެ.
ލޯކަލް ޓޫރިޒަމްއާއެކު ރަށްރަށުގައި ވަޒީފާގެ ފުރުސަތުތައް ވަނީ އިތުރުވެފައެވެ. މިއާއެކު މާލޭގައި ދިރިއުޅުމަށްފަހު އަމިއްލަ ރަށަށް ބަދަލުވެ، ވިޔަފާރީގެ ދާއިރާއަށް ވަންނަ ޒުވާނުން ދަނީ އިތުރުވަމުންނެވެ. އެގޮތުން އެފަދަ ޒުވާނުންގެ ތެރޭގައި އއ. ތޮއްޑޫއަށް އުފަން އަޙްމަދު ޝަރުވާން ހިމެނޭނެއެވެ. މާލޭގައި މަސައްކަތްކުރުމަށްފަހު ރަށަށް ބަދަލުވީ ރަށުގައި އާއިލާ މީހުން ކައިރީ ހުރެ، އާމްދަނީއެއް ހޯދުމުގެ ބޭނުމުގައެވެ. ވިޔަފާރިއެއް ފެށުމުގެ ވިސްނުން ހުރި ނަމަވެސް ކުރާނީ ކޮން ވިޔަފާރިއެއް ކަމެއް އޭރު އަދި ކަނޑައެޅިފައެއް ނެތެވެ.
ޝަރުވާން ރަށު ސްކޫލުން ގްރޭޑު 10 ނިންމުމަށްފަހު މާލެއަށް ބަދަލުވީ ކޯހެއް ހެދުމަށެވެ. އައިޓީ ދާއިރާއިން ކޯސް ހަދަމުން ވަޒީފާއަކަށް ދާން ފެށިއެވެ. ނޫސްވެރިކަމުގެ ދާއިރާ އަކީ އަބަދުވެސް އުޅޭ ހިތްވާ ދާއިރާއަކަށްވުމުން އޮންލައިން ނޫހެއްގައި މަސައްކަތްކުރަން ލިބުނު ފުރުސަތު ވެގެން ދިޔައީ ޝަރުވާންއަށް ރަނުގެ ފުރުސަތަކަށެވެ.
ވަޒީފާއަށް ފަރުވާ ބަހައްޓާ ނޫސްވެރިކަމުގެ ދާއިރާއިން ކުރިއަށް ދިޔުމަށް ޝަރުވާން މަސައްކަތް ފެށިއެވެ. ނަމަވެސް އޭރުވެސް އަބަދުވެސް ހިތުގައި އޮންނަނީ ރަށުގައި ދިރިއުޅުމަށެވެ. ޝަރުވާން ބުނީ އޭރުވެސް ކޮންމެ މަހަކު މަދުވެގެން 2 ފަހަރު ރަށަށް ދާ ކަމަށެވެ.
" މަންމަމެންވެސް ދިރިއުޅެނީ ރަށުގަ، ދެން ހިތަށް އަރާ މުޅި އުމުރު ހޭދަވާނީ މަންމަމެންނާއި ދުރުގަ މާލޭގަ ބާއޭ، ދެން ވިސްނުން ހުރޭ ކޮންމެވެސް ހިސާބަކުން ރަށަށް ބަދަލުވާނަމޭ، އެކަމް އޭރު މާލޭގައި ދިރިއުޅުން ހުރިހާ ރައްޓެހިންވެސް ބުނާނެ ރަށަށް ބަދަލުވުމުގެ ހިޔާލަކީ ރަގަޅު ހިޔާލެއް ނޫނޭ، ރަށަށް ގޮސް ކުރާނެ ކަމެއް ނޯންނާނެއޭ" ޝަރުވާން ބުންޏެވެ.
ނޫސްވެރިކަމުގެ ދާއިރާއަށް ހުންނަ ލޯތްބާއެކު 7 އަހަރު އެދާއިރާގައި މަސައްކަތް ކުރުމަށްފަހު ޝަރުވާން ނިންމީ ރަށަށް ބަދަލުވާށެވެ. ނޫސްވެރިކަމުގެ ދާއިރާއަކީ ކިތަންމެ އުޅޭ ހިތްވާ ދާއިރާއަކަށް ވިޔަސް މުޅި އުމުރު މާލޭގައި ހޭދަ ކުރުމަށް ބޭނުން ނުވާތީއެވެ.
ޝަރުވާން ރަށަށް ބަދަލުވީ ރަށު ސްކޫލުން އޭރު އިޢުލާންކޮށްފައި އޮތް ވަޒީފާއަކަށް ރިމަތިލުމަށްފަހުއެވެ. ނަމަވެސް ދިމާވި ސަބަބުތަކާއި ހުރެ އެވަޒީފާ އަށް ކުރި އިޢުލާން ބާޠިލްކުރިއެވެ. އެއާއެކު ޝަރުވާންއަށް ރަށުން ވަޒީފާއެއް ލިބޭނެ ކަމަށް އޮތް އުއްމީދު ކުޑަވެގެން ދިޔައެވެ.
އެހިސާބުން އޭނާ ބެލީ ރަށުގައި ކުރެވޭނެ މަސައްކަތެއް ހޯދުމަށެވެ. ތޮއްޑޫގައި ލޯކަލް ޓޫރިޒަމް ފުޅާވެފައި އޮތުމުން އޭގެ ބޭނުން ހިފައި، ފަތުރުވެރިންނަށް ފޮޓޯ ނަގައި ދިނުމުގެ ޙިދުމަތް ޝަރުވާން ފެށިއެވެ. އެކަމުން ކޮންމެވެސް ވަރެއްގެ އާމްދަނީއެއް ލިބުނެވެ.
އަހަރީ ޗުއްޓީ އައުމާއެކު ޝަރުވާންއަށް ފާހަގަވި ކަމަކީ ސްކޫލް ކުދިންގެ ފޮތްތަކުގައި ނަން ކަރުދާސް ހަރުކުރުމުގެ ޙިދުމަތްދޭ ތަނެއް ރަށުގައި ނެތްކަމެވެ. ރަށު މީހުން ނަން ކަރުދާސް ހަދަން ފޮނުވަނީ މާލެއަށްކަން އޭނާއަށް ފާހަގަވިއެވެ. މިއާއެކު ފުރުސަތުގެ ބޭނުން ހިފައި، ފޮޓޯ ނަގައިދީގެން ލިބުނު ފައިސާއިން ޕްރިންޓަރެއް ގަތެވެ. އަދި ކުދިންނަށް ނަން ކަރުދާސް ހަދާ ދިނުމުގެ ޙިދުމަތްދޭން ޝަރުވާން ފެށިއެވެ.
އެކަމަށް ރަނގަޅު ޑިމާންޑެއްވެސް އޮތެވެ. ސްކޫލްތައް ހުޅުވުމާއެކު ޝަރުވާންވެސް ހީކުރީ އެހިސާބުން އެކަން ނިމުނީ ކަމަށެވެ. ނަމަވެސް މަދު މަދުން އަދިވެސް މީހުން އެއްޗެހި ޕްރިންޓުކުރަން ޝަރުވާނަށް ގުޅަމުންދިޔައެވެ. އެހިސާބުން އެޙިދުމަތްދޭން ޙާއްސަކޮށް ތަނެއް ހަދައި އެ މަސައްކަތް ރަގަޅަށް ފެށީއެވެ.
' އައިލެންޑު ޕްރިންޓަރސް' ގެ ނަމުގައި ޝަރުވާން ކުޑަ ގޮތަކަށް ފެށި ޕްރިންޓު ކުރުމުގެ ޙިދުމަތް މިހާރު ވަނީ ފުޅާވެގެންގޮސް މުޅި އަތޮޅަށްވެސް ޙިދުމަތްދޭ ތަނަކަށްވެފައެވެ. ތަފާތު އެކި ވަތްތަރުގެ ޕްރިންޓުކުރުމުގެ ޙިދުމަތް މިހާރު އެތަނުން ލިބެން ހުރެއެވެ.
އެހިސާބަށް ވިޔަފާރި ފުޅާވެގެން ދިޔައީ ޝަރުވާންގެ ބުރަ މަސައްކަތުންނެވެ. ފުރަތަމަ ކޮޅު ގިނަ މަސައްކަތަކެއް ކުރީ އަތުންނެވެ. ޝަރުވާން ބުނީ މެޝިންތައް އޭރު ގަނެވޭނެ ފެންވަރެއް ނެތުމުން މަސައްކަތަށް ގިނަ ވަގުތު ހޭދަވާ ކަމަށެވެ.
ޒަމާނީ ފެންވަރުގެ މެޝިންތައް އައިލެންޑު ޕްރިންޓަރސްގައި މިހާރު ބޭނުންކުރާއިރު، އެތަކެތި ގަތުމަށް ލައްކައަކަށްވުރެ ގިނަ ރުފިޔާ ޚަރަދުވެފައިވާނެކަމަށް ޝަރުވާން ބުނެއެވެ. ލޭޒާރ ޕްރިންޓިންގެ ހިދުމަތާއި، އާދައިގެ ޕްރިންޓިންގެ ހިދުމަތުގެ އިތުރުން ޖަރސީ ޕްރިންޓު ކުރުމުގެ ޙިދުމަތްވެސް އައިލެންޑު ޕްރިންޓަރސްއިން ފޯރުކޮށްދެއެވެ. އަދި މީގެއިތުރުން ރަސްމީ ލިޔެކިޔުންތަކަށް ބޭނުންވާ ޕާސްޕޯޓް ފޮޓޯއާއި އެކި ސައިޒުގެ ފޮޓޯ ނަގައިދިނުމުގެ ޙިދުމަތްވެސް އެތަނުން ލިބެއެވެ.
ޝަރުވާންގެ ވިސްނުން ހުރީ އަދިވެސް ވިޔަފާރި ފުޅާ ކުރުމަށެވެ. އިތުރު މެޝިންތައް ގަނެ ޕްރިންޓިންގެ ދާއިރާއިން ދެވެން އޮތް އެންމެ ކުރިއަކަށް ދިޔުމެވެ. މިމަސައްކަތަކީ ރަނގަޅު ކުރިމަގެއް އޮތް ދާއިރާއެއް ކަމަށް ޝަރުވާން ޤަބޫލުކުރެއެވެ.
" މާލޭގަ ވަޒީފާއަށް ގޮސްގެސް ލިބުނު އާމްދަނީއަށްވުރެ ދެގުނަ ރަގަޅު އާމްދަނީއެއް އެބަ ލިބޭ މި މިސައްކަތްކޮށްގެން، އަދި ވެސް ވިޔަފާރި ފުޅާ ކުރެވެން އެބަ އޮތް، މިކަމުގައި ކުރިއަށް ދާން ބޭނުންވަނީ ،" ޝަރުވާން ބުންޏެވެ.
މިމަސައްކަތުގައި ކުރިއަށްދިޔުމުގައި އާއިލާ އާއި އަދި ގާތް ރަޙުމަތްތެރިންގެ ފަރާތުން އެއްބާރުލުން ލިބޭކަން ޝަރުވާން ފާހަގަކުރެއެވެ. އެގޮތުން އެކުގައި މާލޭގައި ވަޒީފާ އަދާކުރި މުއާގެ އެހީތެރިކަން ޝަރުވާން ވަކިން ހާއްސަކޮށް ފާހަގަކުރެއެވެ.
ރަށު ސްކޫލުގެ އެޑްމިން ޑިޕާޓުމަންޓުން ފަހުން ޝަރުވާންއަށް ވަޒީފާ ހަމަޖެހުނެވެ. އަދި ނޫސްވެރިކަމުގެ ދާއިރާއަށް ޝައުގުވެރިކަން ހުންނަ ދަރިވަރުންނަށް ޙާއްސަކޮށްގެން އުފައްދާފައިވާ މީޑިއާ ކުލަބުގައި ޝަރުވާން ދަނީ އިސް ރޯލެއް އަދާކުރަމުންނެވެ.
ޝަރުވާން ދައްކަން ބޭނުންވަނީ ރަށުގައިވެސް ގިނަ ފުރުސަތުތަކެއް އޮތް ކަމެވެ. ޝަރުވާން ރަށަށް ބަދަލުވީ ކުރަން ޖެހުނު ނަމަ ދަނޑުވެރިކަންވެސް ކުރަން ތައްޔާރުވެގެންނެވެ. އެއީވެސް ވަޒީފާއަކަށް ބަލާނަމަ ދެރަ މަސައްކަތެއް ނޫނެވެ.
ރަށްރަށުގައި ހުރި ވިޔަފާރީގެ ފުރުސަތުތަކުގެ ބޭނުން ރައްޔިތުން ހިފަންވީއެވެ. ރަށަށް ތަރައްޤީ އަންނާނީވެސް އޭރުންނެވެ. ޝަރުވާންވެސް އެ ދައްކަނީ މިކަމުގައި ނަމޫނާއެކެވެ. ރަށްރަށުގައިވެސް ކުރެވޭނެ ގިނަ މަސައްކަތްތަކެއް އެބަހުއްޓެވެ.
ފާތުން
ޜަގަަޅު ކަމެއް ހަމަ.. "ޥުޑްކުރާފްޓް" ގެ މަސަކަތައްވެސް ތިގޮތަށް ގެނެސްދީބަލަ..އެވެސް ސަލި ކަމެއް...