ފަސިންޖަރަކު ކޯވިޑް19އަށް ޕޮޒިޓިވްވެއްޖެނަމަ ހުރިހާ ޚަރަދެއް ހިލޭ ހަމަޖައްސައިދޭ އިންޝުއަރެންސެއް އެމިރޭޓްސްއިން ތަޢާރަފްކޮށްފިއެވެ.
ކޯވިޑްއަށް ޕޮޒިޓިވްވާ ފަސިންޖަރުންނަށް ހިލޭ މެޑިކަލް އިންޝުއަރެންސް ހަމަޖެއްސުމަށް އެމިރޭޓްސްއިން ނިންމާފައިވާއިރު، މިއީ އެއަރލައިނަކުން ކޯވިޑްއާ ގުޅިގެން ފަސިންޖަރުންނަށް ހިލޭ މެޑިކަލް އިންޝުއަރެންސް ހަމަޖެއްސި ފުރަތަމަ ފަހަރެވެ.
މިއިންޝުއަރެންސް ޕެކޭޖްގެ ދަށުން ބޭސްފަރުވާއަށް ހިނގާ ޚަރަދާއި ކަރަންޓީންއަށް ހިނގާ ޚަރަދުގެ އިތުރުން، ބަލީގައި މަރުވެއްޖެނަމަ ޖަނާޒާގެ ޚަރަދުތައްވެސް ހަމަޖައްސައިދޭނެއެވެ. އިންޝުއަރެންސް ޕެކޭޖުގައި ބޭސްފަރުވާގެ ކަންކަމަށް 150000 ޔޫރޯ ހަމަޖައްސާފައިވާއިރު، އަދި 14 ދުވަހަށް ކަރަންޓީންވުމަށް އެކޮމޮޑޭޝަންއަށް ދުވާލަކަށް 100 ޔޫރޯ ވަނީ ހިމަނާފައެވެ.
އެމިރޭޓްސްއިން ބުނީ ހިލޭ އިންޝުއަރެންސް ހަމަޖައްސާފައިވަނީ ވަކި ކެޓަގަރީއަކަށް ނޫންކަމަށާއި، ކޮންމެ ގިންތިއެއްގެ ކްލާހަކުން ދަތުރުކުރިޔަސް، ހިލޭ އިންޝުއަރެންސް ލިބޭނެކަމަށެވެ. އަދި ފަސިންޖަރުން ދަތުރު ފަށާ ތާރީހުން ފެށިގެން 31 ދުވަހުގެ މުއްދަތަކަށް އިންޝުއަރެންސް އޮންނާނެކަމަށާއި އޮކްޓޫބަރުމަހުގެ ނިޔަލަށް އެމިރޭޓްސްއިން ދަތުރުކުރާ ފަރާތްތަކަށް މި އިންޝުއަރެންސް ލިބޭނެކަމަށްވެސް އެމިރޭޓްސްއިން ބުނެއެވެ.
ކޯވިޑްއާ ގުޅިގެން ފަސިންޖަރުންނަށް ހާއްސަ އިންޝުއަރެންސްއެއް އެމިރޭޓްސްއިން ތަޢާރަފްކޮށްފައިވާއިރު، ދަތުރުފަތުރުކުރުމުގެ ސިނާޢަތަށް އައި ހީނަރުކަމާއެކު ގިނަ އެއަރލައިންތަކަށް ވަނީ ވަރަށް ބޮޑެތި ގެއްލުމާ ކުރިމަތިލާންޖެހިފައެވެ. އެމިރޭޓްސްއިންވެސް ވަނީ 9000 ވަޒީފާ މަދުކޮށްފައެވެ. އަދި ޤައުމުތަކުގެ ބޯޑަރުތައް މިހާރު ހުޅުވާލަމުންދާއިރު، އެއަރލައިންތަކުން ދަނީ މިދިޔަ ދުވަސްތަކުގައި ލިބުނު ގެއްލުމުން އަރައިގަތުމަށް ގިނަ މަސައްކަތްތަކެއް ކުރަމުންނެވެ.