ރާއްޖޭގެ މަޤްބޫލްކަން އެންމެ ބޮޑީ އެމެރިކާ، އިންޑިއާ އަދި އިނގިރޭސިވިލާތުގެ ފަތުރުވެރިންގެ މެދުގައި

ރާއްޖޭގެ މަޤްބޫލްކަން އެންމެ ބޮޑީ އެމެރިކާ، އިންޑިއާ އަދި އިނގިރޭސިވިލާތުގެ ފަތުރުވެރިންގެ މެދުގައި ކަމަށް މަޝްހޫރު ޑިޖިޓަލް ޓްރެވަލް މަރކެޓިން ކުންފުނި ސޯޖަރންއިން ހާމަކޮށްފިއެވެ.

ސޯޖަރންއިން އެއްކޮށްފައިވާ މައުލޫމާތުތައް ދައްކާގޮތުން މޭމަހުން ފެށިގެން ރާއްޖެއަށް ދަތުރުކުރުމަށް ފްލައިޓުތަކާއި ހޮޓެލްތަކާއި ގުޅޭ މައުލޫމާތުތައް އިންޓަރނެޓު މެދުވެރިކޮށް ހޯދަމުންދާ މީހުންގެ ޢަދަދު 50 އިންސައްތަވަނީ އިތުރުވެފައެވެ. އަދި ޖުލައި 15ގައި ރާއްޖޭގެ ބޯޑަރު އަލުން ހުޅުވާލުމާއި އެކު ރާއްޖެއަށް ދަތުރުކުރާ ފަތުރުވެރިންގެ އަދަދު އިތުރުވަމުންދާކަން ސޯޖަރންއިން ފާހަގަކުރެއެވެ.

ސޯޖަރންއިންވަނީ ރާއްޖެއާއި ގުޅޭގޮތުން އެންމެ ގިނަ އަދަދެއްގެ ބަޔަކު މައުލޫމާތު ސާފުކުރަމުންދާ މަންޒިލްތަކުގެ ލިސްޓެއްވެސް އެކުލަވާލާފައެވެ. އެގޮތުން މި ލިސްޓުގައި ހިމެނެނީ އެމެރިކާ، އިންޑިއާ އަދި އިނގިރޭސިވިލާތް، ޖަރުމަންވިލާތް، ކެނެޑާ އަދި ޔޫ.އޭ.އީއެވެ.

ސޯޖަރންއިން ހާމަކުރާގޮތުގައި އެމެރިކާގެވެސް ކެލިފޯނިއާ ސްޓޭޓުގެ މީހުން ރާއްޖެއަށް އައުމަށް ވަކިން ބޮޑަށް ޝައުގުވެރިވާ ކަަމަށެވެ. އެގޮތުން ފާއިތުވި 60 ދުވަހުގެތެރޭ އެޤައުމުގެ އެންމެ ގިނަ ޢަދަދެއްގެ ބަޔަކު ޤައުމުން ބޭރުގައި ޗުއްޓީއެއް ހޭދަކުރުމާއި ގުޅޭގޮތުން އިންޓަރނެޓު މެދުވެރިކޮށް މައުލޫމާތު ސާފުކޮށްފައިވަނީ ރާއްޖެއާ ގުޅޭގޮތުން ކަމަށް ސޯޖަރންއިން ހާމަކުރެއެވެ.

ރާއްޖޭގެ ފަތުރުވެރިކަމަކީ "ވަން އައިލެންޑް- ވަން ރިސޯޓު" ކޮންސެޕްޓަށްވުމުން، ކޯވިޑް-19 އިން ރައްކާތެރިވެތިބެ ޗުއްޓީއެއް ހޭދަކޮށްލުމުގެ ފުރުސަތު ރާއްޖޭގައި ބޮޑުކަން ސޯޖަރން އިން ފާހަގަކުރެއެވެ. އަދި މި ސަބަބާއެކު ފަތުރުވެރިންގެ މެދުގައިވެސް ރާއްޖެއަށް އޮންނަ މަޤްބޫލްކަން އިތުރުވަމުންދާ ކަން އެކުންފުނިން ފާހަގަކުރެއެވެ.