އެއްފަހަރު ބޭނުންކޮށްފައި އުކާލާ ޕްލާސްޓިކްގެ ބާވަތްތައް ރާއްޖޭގައި ބޭނުންކުރުން ހުއްޓާލުމަށް ސަރުކާރުން ގެންގުޅޭ ޕްލޭނަށް ޢާންމުންގެ ޚިޔާލު ހޯދުމަށް ވެބިނަރއެއް ބޭއްވުމަށް އެންވަޔަރަންމަންޓް މިނިސްޓްރީން ނިންމަވައިފިއެވެ.
މި ޕްލޭނަށް ޢާންމުންގެ ޚިޔާލު ހޯދުމަށް ބާއްވަން ހަމަޖެހިފައިވާ ބައްދަލުވުން، ކޯވިޑް-19 އާއި ގުޅިގެން ބާއްވަން ހަމަޖެހިފައި ވަނީ އާއްމުންނަށް ހުޅުވާލައިގެން އޮންލައިންކޮށް، ވެބިނާއެއްގެ ގޮތުގައި 19 އޯގަސްޓް 2020 ވާ ބުދަ ދުވަހުގެ 16:30 ގައެވެ. މި ވެބިނަރގައި ބައިވެރިވުމަށް ޝައުގުވެރިވާ ފަރާތްތަކުން www.tinyurl.com/y2j4wwrs ލިންކު މެދުވެރިކޮށް ރަޖިސްޓްރީކުރުމުގެ ފުރުޞަތު ވަނީ ހުޅުވާލާފައެވެ.
އެއްފަހަރު ބޭނުންކޮށްފައި އުކާލެވޭ ޕްލާސްޓިކުން ދިވެހިރާއްޖޭގެ ވެއްޓާއި އިޤުތިސާދު ހިމާޔަތް ކުރުމުގެގޮތުން، ސަރުކާރުން އިސްނަންގަވައިގެން ކުރަމުންގެންދާ މަސައްކަތްތަކުގެ ތެރެއިން، ސިންގަލް ޔޫސް ޕްލާސްޓިކް 2023 ވަނަ އަހަރުގެ ނިޔަލަށް ފޭސްއައުޓް ކުރަން ވަނީ ނިންމަވާފައެވެ. މިކަން އިޢުލާން ކުރެއްވީ 23 ސެޕްޓެމްބަރ 2019 ގައި އ.ދ. ގެ 74 ވަނަ ޢާއްމު ބައްދަލުވުމުގެ ހަވާސާގެ ތެރެއިން ބޭއްވި ކްލައިމެޓް ސަމިޓުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކުރެއްވި ތަގުރީރުގައެވެ.
މި ލަނޑުދަނޑި ހާސިލުކުރުމަށްޓަކައި، އެއްފހަރު ބޭނުންކޮށްފައި އުކާލެވޭ ޕްލާސްޓިކަށް ބަރޯސާވާ މިންވަރު މަދުކޮށް، ބޭނުން ކުރުން ހުއްޓާލުމަށްޓަކައި، މިނިސްޓްރީ އޮފް އެންވަޔަރަންމަންޓުން މިހާރު ވަނީ ސިންގަލް ޔޫސް ޕްލާސްޓިކް ފޭސްއައުޓް ކުރުމުގެ ޑްރާފްޓް ޕްލޭނެއް އެކުލަވާލާފައެވެ. މި ޕްލޭން އެކުލަވާލާފައި ވަނީ ސަރުކާރުގެ އެކި މުއައްސަސާތަކާއި، މަދަނީ ޖަމިއްޔާތަކާއި ވިޔަފާރިތައް އަދި ގުޅުންހުރި އެހެނިހެން ފަރާތްތަކުގެ މަޝްވަރާއާއި ޚިޔާލު ހޯދައި އެއްކޮށްގެންނެވެ. އަދި ގުޅުން ހުރި ފަރާތްތައް ޝާމިލު ވާގޮތަށް މި މަސައްކަތް ކުރިޔަށް ގެންދަނީ އެންވަޔަރަންމަންޓް މިނިސްޓްރީން ކަނޑައަޅާފައިވާ 11 ބޭފުޅުންގެ ކޮމިޓީއެއްގެ ލަފާގެ މަތިންނެވެ.
ދިރާސާތަކުން ދައްކާގޮތުން ދިވެހިރާއްޖޭގައި އުފެދޭ ކުނީގެ %10 އަކީ ޕްލާސްޓިކު ކުނިބުންޏެވެ. އަދި ޕްލާސްޓިކު ކުނީގެ ތެރެއިން، އެއްފަހަރު ބޭނުންކޮށްފައި އުކާލެވޭ ކުންޏަކީ ރާއްޖޭގެ ނާޒުކު ދިރުންތަކާއި ގުދުރަތީ ރީތިކަމަށް ހުރި ވަރަށްބޮޑު ނުރަކައްލެކެވެ.