ޖަލުތަކުގައި ބަންދުކުރެވޭ މީހުންގެ ސުލޫކީ މިންގަނޑު ބަހައްޓަންޖެހޭގޮތުގެ ޤަވާއިދެއް އެކުލަވާލައިފި

ޖަލުތަކުގައި ބަންދުކުރެވޭ މީހުންގެ ސުލޫކީ މިންގަނޑު ބަހައްޓަންޖެހޭގޮތުގެ ޤަވާއިދެއް އެކުލަވާލާ ޢަމަލު ކުރަން ފަށައިފިއެވެ.

މިއީ ދިވެހިރާއްޖޭގެ ޖަލުތަކާއި ޕޭރޯލުގެ ޤާނޫނުގެ 97 ވަނަ މާއްދާއަށް ރިޢާޔަތްކޮށް ޤައިދީންނާއި ބަންދުކޮށްފައި ތިބޭ މީހުންގެ އަޚްލާޤު ޖަލުތެރޭގައި ބަހައްޓަންވާނެ މިންގަނޑު ބަޔާންކުރުމަށްޓަކާ އެ ޤާނޫނުގެ 150 ވަނަ މާއްދާއިން ލިބިދޭ ބާރުގެ ދަށުން އެކުލަވާލާފައިވާ ޤަވާއިދެކެވެ.

މި ޤަވާއިދުގެ މަޤްޞަދަކީ ޖަލުތަކުގައި ހުންނަ ހުރުމުގައި ޤައިދީންނާއި ބަންދުކޮށްފައި ތިބޭ މީހުންގެ އަޚްލާޤާއި ސުލޫކާއި، އުޅުމާއި ގުޅުންތައް ދަމަހައްޓަންޖެހޭ ގޮތާއި، ޤައިދީންނަށާއި، ބަންދުކޮށްފައި ތިބޭ މީހުން ކުރުން މަނާ ކަންތައްތައް ކަނޑައެޅުމާއި، އެކަންކަން އަންގައިދިނުމެވެ. މި ޤަވާއިދުގެ ދަށުން ޖަލުތަކުގައި ހުންނަ ކޮންމެ މުސްލިމަކު ކޮންމެ ދުވަހެއްގެ ފަރުޟު ފަސް ނަމާދުކޮށް، ކިރީތި ޤުރުޢާން ކިޔަވައި، ފަރުޟު ރޯދަ ހިފައި، ދީނީ އެހެނިހެން އަޅުކަން ބަރާބަރަށް އަދާކުރަންޖެހޭނެއެވެ.

އަލަށް އެކުލަވާލި މި ޤަވާއިދުގައި ސާފުތާހިރުކަން ކަށަވަރުކުރުމުގެގޮތުން ޤައިދީންނާއި ބަންދުކޮށްފައި ތިބޭ މީހުން ފުރިހަމަކުރަންޖެހޭ ގިނަ ކަންތައްތަކެއްވެސް ވަނީ ކަނޑައަޅާފައެވެ. އެގޮތުން ޖަލުގައި ހުންނަ ކޮންމެ މީހަކު ދުވާލަކު މަދުވެގެން 2 ފަހަރު ފެންވަރައި، ދަތްއުނގުޅައި، ސާފުތާހިރުވާންވާނެއެވެ. އަދި ބޯކޮށޮމާއި، ތުނބުޅިމަތިމަސް ބޭލުމާއި، ނިޔަފަތި ކެނޑުމުގައި ޢަމަލުކުރަންޖެހޭނެ އުޞޫލާއި، މުޢާމަލާތުކުރުމުގައި ހިފަހައްޓަންޖެހޭ އަޚްލާޤީ މިންގަނޑުތައްވެސް ހިމަނާފައިވެއެވެ.

އެއްވެސް ޤައިދީއަކު ނުވަތަ ބަންދުކޮށްފައިވާ އެއްވެސް މީހަކު، އެއްވެސް ހައިސިއްޔަތަކުން ޖަލު އޮފިސަރުންނާއި ޖަލަށް ޒިޔާރަތްކުރާ މީހެއްގެ ގައިގައި އަތްލުމަކީ މި ޤަވާއިދުގެ ދަށުން މަނާކަމެކެވެ. އަދި ޞިއްޙީ ސަބަބަކަށްޓަކައި މެނުވީ، އެއްވެސް ޤައިދީއަކު ނުވަތަ ބަންދުކޮށްފައިވާ އެއްވެސް މީހެއްގެ ބޯ ބޭލުމަކީ މަނާކަމެކެވެ. މީގެ އިތުރުން އެއްވެސް ޤައިދީއަކު ނުވަތަ ބަންދުކޮށްފައިވާ އެއްވެސް މީހަކު، ޖަލުގައި ދުންފަތުގެ އިސްތިޢުމާލު ކުރުން މަނާކޮށްފައިވާ އެއްވެސް ސަރަޙައްދެއްގައި ދުންފަތުގެ އިސްތިޢުމާލު ކޮށްގެން ނުވާނެއެވެ.

މިކަންކަމުގެ އިތުރުންވެސް މި ޤަވާއިދުގެ ދަށުން ޤައިދީންނާއި، ބަންދުކޮށްފައިވާ މީހުން، ކުރުން މަނާ ކަންކަމުގެ ގޮތުގައި އިތުރު 38 ކަމެއް ވަނީ ހިމަނާފައެވެ. އޭގެ ތެރޭގައި ޤައިދީންނާއި ބަންދުކޮށްފައިވާ މީހުން އަނބުރާ މުޖުތަމަޢަށް ގެނައުމަށްޓަކައި ހިންގާ އެކިއެކި ޕްރޮގްރާމްތަކުގައި ބައިވެރިވުމަށް ދެކޮޅުހެދުމާއި، ޔުނިޓުގެ ތެރޭގައި ނުވަތަ ގޮޅީގެ ތެރޭގައި އަޑުގަދަކޮށް، ތަންތަނުގައި ތަޅައި ހެދުމާއި، ބަލައި ފާސްކުރުމަށް ދެކޮޅުހެދުމަކީ މަނާކަމެކެވެ. އަދި ޖަލު އޮފިސަރެއްގެ ވާޖިބަށް ހުރަސްއެޅުމާއި، ޖަލު އޮފިސަރުންގެ އަމުރަށް ނުކިޔަމަންތެރިވުމާއި، ތިމާގެ އަމިއްލަ ނަފުސަށް ގެއްލުން ލިބޭ ފަދަ އެއްވެސް ކަމެއް ކުރުމާއި، ބަދުއަޚުލާޤީ އެއްވެސް ޢަމަލެއް ހިންގުމުގެ އިތުރުން ވަނުން މަނާކޮށްފައިވާ އެއްވެސް ތަނަކަށް ވަނުންފަދަ ކަންކަން ވަނީ ހިމަނާފައެވެ.

ހަމައެހެންމެ މަސްތުވާ ޒާތުގެ އެއްވެސް އެއްޗެއް ބޭނުން ކުރުމާއި، ޖަލުން ފިލަން މަސައްކަތް ކުރުމާއި، ޖަލުން ފިލުމާއި، އެއްވެސް ބާވަތެއްގެ ހަޅުތާލެއް ހެދުމާއި، އެފަދަ ކަމެއް ކުރުމުގައި ބައިވެރިވުމަކީވެސް މަނާކަމެއްގެ ގޮތުގައި ކަނޑައަޅާފައިވެއެވެ.

މި ގަވާއިދާ ޚިލާފުވާ ޤައިދީންނާއި ބަންދުކޮށްފައިވާ މީހުންގެ މައްސަލަތައް ބަލައި، އެ މީހުންނާމެދު ކަނޑައެޅިފައިވާ ޑިސިޕްލިނަރީ ނިޒާމުގެ ތެރެއިން ފިޔަވަޅު އަޅަންވާނެކަމަށްވެސް އަލަށް އެކުލަވާލި މި ޤަވާއިދުގައި ބުނެފައިވެއެވެ.