ދައްތަ ވީނަސް ވިލިއަމްސް ބަލިކޮށް ޔޫއެސް އޯޕަން
ޓެނިސް މުބާރާތުގެ ސެމީ ފައިނަލުން ދުނިޔޭގެ އެއްވަނަ އަންހެން ޓެނިސް ކުޅުންތެރިޔާ
ސެރީނާ ވިލިއަމްސް ޖާގަ ހޯދައިދައިފި.
މިހާރު ކުރިއަށްދާ ޔޫއެސް އޯޕަން ޓެނިސް
މުބާރާތުގެ ކުއަޓަރ ފައިނަލްގައި ވީނަސް ވިލިއަމްސްއާ ސެރީނާ ވިލިއަމްސް
ވާދަކުރިމެޗް ސެރީނާ ކާމިޔާބުކުރީ ދެސެޓް އެއް ސެޓުންނެވެ. މެޗް ފުރަތަމަ ސެޓް ހަޔެއް
ދޭކުން ސެރީނާ ހޯދިއިރު ދެވަނަ ސެޓް ހަޔެއް އެކަކުން ހޯދީ ވީނަސް ވިލިއަމްސްއެވެ. މެޗްގެ ތިންވަނަ
ސެޓް ހޯދާ ސެރީނާ މެޗް ކާމިޔާބުކުރީ ހަޔެއް ތިނަކުންނެވެ.
މެޗަށްފަހު ވީނަސް
ވިލިއަމްސް ބުނީ ބަލިވިޔަސް ދެރަ ނުވާ ކަމަށާއި، އެއަށްވުރެ ކޮއްކޮ ސެރީނާ މިއަހަރު ތެރޭގައި ހަތަރު
ތަށި އުފުލާލާ މަންޒަރު ބަލަން ކެތްމަދުވެފައިވާ ކަމަށެވެ.
މިފަހަރުގެ މުބާރާތް
ކާމިޔާބުކޮށްފިނަމަ ސެރީނާ ވެގެންދާނީ އެއް އަހަރެއްގެ ތެރޭގައި ހަތަރު ގްރޭންޑް
ސްލޭމް މުބާރާތް ކާމިޔާބުކުރާ އެމެރިކާގެ ދެވަނަ ކުޅުންތެރިޔާއަށެވެ. މި ރެކޯޑް ކުރިން އޮންނަނީ 1988ވަނަ އަހަރު ހަތަރު ތަށި ހޯދި ސްޓެފީ ގްރާފްގެ އަތުގައެވެ. އަދި މިމުބާރާތް
ސެރީނާއަށް ކާމިޔާބު ކުރެވިއްޖެނަމަ ސެރީނާ ވެގެންދާނީ ޔޫއެސް އޯޕަން ހަތްވަނަ
ފަހަރަށް ކާމިޔާބުކުރާ ފުރަތަމަ ކުޅުންތެރިޔާއަށެވެ. ސެމީފައިނަލްގައި ސެރީނާ
ވާދަކުރާނީ އިޓަލީގެ ރޮބާޓާ ވިންޗީއާއެވެ.