މާލޭގައި ފެން ރައްކާ ކުރާ އިތުރު 2 ތާނގި ބެހެއްޓުމުގެ މަސައްކަތް ފަށައިފިއެވެ.
މާލެ ވޯޓާ އެންޑް ސްވަރޭޖް ކޮމްޕެނީ، އެމް.ބްލިޔުއެސްސީން ކުރިއަށްގެންދާ މި މަޝްރޫޢަކީ އެކުންފުނީގެ "ވޯޓާ ސެކިއުރިޓީ ޕްލޭން" ގެ ދަށުން ކުރިއަށްގެންދާ މަސައްކަތެކެވެ. އަލަށް ބަހައްޓާ މި 2 ތާނގި ބެހެއްޓުމަށް ހަމަޖެހިފައި ވަނީ ކުރިން އެސް.ޓީ.އޯގެ ރެޑީ މިކްސް ކޮންކްރީޓް މަސައްކަތް ކުރަމުން އައި މާލޭގެ 378 ނަމްބަރ ކޮށީގައެވެ.
މިއީ މާލޭގައި އެމް.ޑަބްލިޔު.އެސް.ސީން ފެން ރައްކާކުރެވޭ މިންވަރު އިތުރުކޮށް، މެދުކެނޑުމެއްނެތި، ދެމެހެއްޓެނިވި ގޮތެއްގައި، ރައްކާތެރި ސާފު ބޯފެން ފޯރުކޮށް ދިނުމުގެ މަޤްޞަދުގައި ބަހައްޓާ ދެ ތާނގިކަމަށް އެކުންފުނިން ވިދާޅުވެއެވެ. މި މަޝްރޫޢުގެ ޢަމަލީ މަސައްކަތް ފައްޓަވައިދެއްވީ، އެމް.ޑަބްލިޔު.އެސް.ސީގެ މެނޭޖިން ޑިރެކްޓަރު ހަސަން ޝާހާއި، ކުންފުނީގެ މެނޭޖްމަންޓްގެ ބޭފުޅުންނެވެ.
މި މަޝްރޫއުގެ ދަށުން، 2 ތާނގީގެ އިތުރުން ފެން ފޯރުކޮށް ދިނުމަށް ޓަކައި ޕަމްޕް ރޫމެއްވެސް ޤާއިމުކުރުމަށް ވަނީ ހަމަޖެހިފައެވެ. އަދި އަލަށް ބަހައްޓާ 2 ތާނގިން ކުރެ ކޮންމެ ތާންގީއަކުވެސް 13,648 ކިޔުބިކް މީޓާގެ ފެން ރައްކާކުރެވޭނެކަމަށާއި، މި ދެ ތާނގީގައި ޖުމްލަ 27,296 ކިޔުބިކް މީޓާ ފެން ރައްކާކުރެވޭނެކަމަށް އެމް.ޑަބްލިއު.އެސް.ސީން ވިދާޅުވެއެވެ. އަދި މި މަސައްކަތް ނިމުމުން އެމް.ޑަބްލިޔު.އެސް.ސީން މާލޭ ސިޓީގައި ފެން ރައްކާކުރެވޭ މިންވަރު ޖުމްލަ 50,296 ކިޔުބިކް މީޓަރަށް އިތުރުވެގެން ދާނެކަމަށްވެސް އެ ކުންފުނިން ވިދާޅުވެއެވެ.
މިތާނގިތައް ބެހެއްޓުމުގެ މަސައްކަތްތައް ނިންމާލުމަށް ތާވަލު ކުރެވިފައި ވަނީ ޑިސެމްބަރި 2021 ވަނަ އަހަރުގެ ނިޔަލަށެވެ. އަދި މި މަސައްކަތަށް ޖުމްލަ 82 މިލިއަން ރުފިޔާ ހަރަދުވާނެ ކަމަށް ލަފާކުރެވޭކަމަށް އެކުންފުނިން އެމް.ޑަބްލިޔު.އެސް.ސީން ވިދާޅުވެއެވެ.
ގްރޭޓަރ މާލެ ރީޖަން ވޯޓާ ސެކިއުރިޓީ ޕްލޭންގެ ދަށުން، އެމް.ޑަބްލިޔު.އެސް.ސީން ފެން އުފެއްދުން ޑީސެންޓްރަލައިޒްކޮށް، މާލޭގެ 2 ސަރަހައްދެއްގައި ފެން އުފައްދާ މަރުކަޒުތައް ވަނީ ޤާއިމްކޮށްފައެވެ. އަދި ސިނަމާލޭ ބުރިޖު މެދުވެރިކޮށް އެމް.ޑަބްލިޔު.އެސް.ސީން އަޅާފައިވާ ފެނުގެ ވިއުގަ ގުޅާލުމުގެ މަސައްކަތްވެސް ދަނީ ކުރަމުންނެވެ.