ސިޔާސީ ދާއިރާއަށް ނުކުތުމުގެ ހިތްވަރު ލިބުނީ މަރުޙޫމް ޙުސައިން މުޙައްމަދުގެ ސަބަބުން - ރައީސް
ސިޔާސީ ދާއިރާއަށް ނުކުމެވަޑައިގަތުމަށް އެންމެ ބޮޑު ހިތްވަރެއް ލިބިވަޑައިގަތީ އަލްމަރުޙޫމް ޙުސައިން މުޙައްމަދު ދެއްވި ފުރުޞަތެއްގެ ތެރެއިންކަމަށް ރައީސުލްޖުމްޙޫރިއްޔާ އިިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރައްޔިތުންގެ މަޖިލީހުގައި މަތިވެރި ދާއިރާގެ ކުރީގެ މެމްބަރު އަލްމަރުޙޫމް ޙުސައިން މުޙައްމަދުގެ ހަނދާނުގައި ޖުމްހޫރީ ޕާޓީން ބޭއްވި ތައުބީންގެ ޖަލްސާގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
ޒޫމް މެދުވެރިކޮށް އޮންލައިންކޮށް ކުރިއަށްގެންދިޔަ ތައުބީންގެ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިިބްރާހީމް މުޙައްމަދު ޞާލިޙު ވިދާޅުވީ، އަލްމަރުޙޫމް ޙުސައިން މުޙައްމަދަކީ ދިވެހި ޤައުމަށް އެކި ދާއިރާތަކުން ގިނަ ޚިދުމަތްތަކެއް ކުރައްވާފައިވާ އަގުހުރި ބޭފުޅެއްކަމަށެވެ. ޙުސައިން މުޙައްމަދާއި އެންމެ ފުރަތަމަ ދިމާވީ، މީގެ 32 އަހަރުކުރިން އެމަނިކުފާނު ކިޔަވާ ވިދާޅުވުމަށްފަހު، ޓެލެވިޜަން މޯލްޑިވްސްއާއި ގުޅިވަޑައިގެންނެވި ހިސާބުންކަމަށެވެ. އޭރު ޙުސައިން މުޙައްމަދަކީ އެމަނިކުފާނުގެ ވެރިޔާކަމަށާއި، ޓެލެވިޜަން މޯލްޑިވްސްގައި މަސައްކަތް ކުރެއްވި ދުވަސްވަރު، އެމަނިކުފާނަށް ވަރަށް ބޮޑަށް އިތުބާރުކުރައްވާ ގިނަ މަސައްކަތްތަކެއް ޙަވާލުކުރެއްވެވިކަމަށާއި، ކުރިއަށްދިއުމަށް އެކި ފުރުޞަތުތައް ފަހިކޮށްދެއްވިކަމަށް ރައީސުލްޖުމްހޫރިއްޔާ ވިދާޅުވިއެވެ.
އެގޮތުން އޭގެތެރެއިން އެންމެ ފާހަގަކޮށްލެވޭ އެއް ފުރުޞަތަކީ އެދުވަސްވަރު ބާއްވާ އަތޮޅުތަކުގެ ވެރިންގެ ބައްދަލުވުމުގައި ޓެލެވިޜަން މޯލްޑިވްސް ތަމްޞީލުކުރެއްވުމުގެ ފުރުޞަތު އަލްމަރުޙޫމް ޙުސައިން މުޙައްމަދު އެމަނިކުފާނަށް ދެއްވި ދެއްވުންކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި އެ ބައްދަލުވުން ވެގެންދިޔައީ އެމަނިކުފާނަށް ސިޔާސީ ދާއިރާއިން ލޯހުޅުވައިދިން، އަދި އެ ދާއިރާއަށް ނުކުމެވަޑައިގަތުމަށް އެންމެ ބޮޑު ހިތްވަރެއް ލިބިވަޑައިގަތް ފުރުޞަތައްކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވިއެވެ.
"ޓެލެވިޜަން މޯލްޑިވްސްގެ ވެރިއަކަށްހުރެ އެމަނިކުފާނު އަޅުގަނޑަށް އެބައްދަލުވުމުގައި ޓެލެވިޜަން މޯލްޑިވްސް ތަމްޞީލުކުރެއްވުމުގެ ފުރުޞަތުދެއްވީ. އެ ބައްދަލުވުންވެގެންދިޔައީ ޤައުމުގައި ހުރި ކަންކަމަށް އަޅުގަނޑުގެ ލޯ ހުޅުވައިދިން ބައްދަލުވުމަކަށް. ސިޔާސީ ދާއިރާއަށް ނުކުތުމުގެ ވިސްނުމާއި ހިޔާލު ލިބިވަޑައިގަތީ އެ ފުރުޞަތުގެ ސަބަބުން" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، އަލްމަރުޙޫމް ޙުސައިން މުޙައްމަދަކީ ޚިޔާލު ތަފާތުވާ ކަންކަމުގައިވެސް، ވިސްނުންތެރިކަމާއެކު ޚިޔާލާއި މަޝްވަރާދެއްވާ ނަމޫނާ ބޭފުޅެއްކަމަށެވެ. އަދި އެކަން ރައްޔިތުންގެ މަޖިލީހުގައި މަސައްކަތްޕުޅުކުރެއްވި ދުވަސްވަރާއި، ސިޔާސީ މައިދާނުގައި މަސައްކަތްޕުޅުކުރުމަށް ލިބުނު ފުރުޞަތުތަކުގައި އެމަނިކުފާނަށް ތަޖުރިބާކުރެވުނުކަމަށް ރައީސުލްޖުމްހޫރިއްޔާ ވިދާޅުވިއެވެ.
މި ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވީ، އަލްމަރުޙޫމް ޙުސައިން މުޙައްމަދަކީ ވަރަށް ހިތްޕުޅުހެޔޮ ސާދާ މިޒާޖެއްގެ ބޭފުޅެއްކަމަށާއި، އަބަދުވެސް ކަންކަމުގައި ހިތްވަރުދެއްވާ ބޭފުޅެއްކަމަށެވެ. އަދި ސިޔާސީ މައިދާނުގައިވެސް އެންމެ ގާތްކޮށް މަސައްކަތްކުރެއްވި އެއްބޭފުޅަކީ ޙުސައިން މުޙައްމަދުކަމަށާއި، އެމަނިކުފާނަށް ކުރިމަތިވި އެންމެ އުނދަގޫ ޙާލަތްތަކުގައިވެސް ހިތްވަރުދެއްވި އެއް ބޭފުޅަކީ ޙުސައިން މުޙައްމަދުކަން ނައިބު ރައީސް ފާހަގަކުރެއްވިއެވެ.
"ޚާއްސަ މަޖިލީހާއި، މަޖިލިސް ތެރޭގައިވެސް އަޅުގަނޑާ އެންމެ ގާތްކޮށް މަސައްކަތްކުރެއްވި އެއް ބޭފުޅަކީ ޙުސައިން މުޙައްމަދު. އެމަނިކުފާނަކީ ވަރަށް ވިސްނުންތެރިކަމާއެކު ކަންކަމުގައި ގޮތް ނިންމަވާ ބޭފުޅެއް. ބައްޕައެއް ފަދަގޮތަކަށް ދެކެވޭހާ ގާތްކޮށް އަޅުގަނޑުމެންގެ ގުޅުން އޮތީ" ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވިއެވެ.
ރައްޔިތުންގެ މަޖިލީހުގެ މެންބަރުކަމާއި، ދަޢުލަތުގެ އެކިއެކި ޢިދާރާތަކުގައި ގިނަ އަހަރުތަތަކެއް ވަންދެން ޚިދުމަތްކުރައްވާފައިވާ އަލްމަރްހޫމް ޙުސައިން މުޙައްމަދުގެ ހަނދާނުގައި ބޭއްވި ތައުބީނުގެ ޖަލްސާގައި އެމަނިކުފާނުގެ އާއިލާ ބޭފުޅުންނާއި، އެމަނިކުފާނާއެކު އެކި ދާއިރާތަކުގައި މަސައްކަތް ކުރެއްވި ގިނަ ޢަދަދެއްގެ ބޭފުޅުން ވަނީ ބައިވެރިވެވަޑައިގެންފައެވެ. މީގެ ތެރޭގައި ރައްޔިތުންގެ މަޖިލީހުގެ ކުރީގެ ބައެއް މެންބަރުންނާއި، މިހާރުގެ ބައެއް މެންބަރުންގެ އިތުރުން ދަޢުލަތުގެ ބައެއް ވަޒީރުންވެސް ހިމެނެއެވެ.