ކޮޗިން ފެރީ ދަތުރުތަކާއެކު ފަތުރުވެރިކަމާއި ވިޔަފާރީގެ ދާއިރާއިން ކުރިއެރުންތަކެއް ލިބޭނެ- މައުސޫމް

ރާއްޖެއާއި އިންޑިއާގެ ކޮޗިންއާއި ދެމެދު ފަށާ ފެރީ ދަތުރުތަކާއެކު ފަތުރުވެރިކަމާއި ވިޔަފާރީގެ ދާއިރާއިން ގިނަ ކުރިއެރުންތަކެއް ލިބިގެންދާނެކަމަށް މިނިސްޓަރ އޮފް ޓޫރިޒަމް އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރ މައުސޫމް ކުރެއްވި ޓުވީޓެއްގައި ވިދާޅުވީ ކޮޗިން ފެރީއަކީ ކަނޑުމަގުން އަޅައިދޭ ބުރިޖެއް ކަމަށެވެ. އަދި މި އިންޑިއާ އާއި ރާއްޖެއާއި ދެމެދު ފަށާ ފެރީ ދަތުރުތަކާއި އެކު ފަތުރުވެރިކަމުގެ ދާއިރާއަށާއި ވިޔަފާރީގެ ދާއިރާއަށް ކުރިއެރުންތައް ލިބިގެންދާނެކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ މެގަރ ސުޕަރ ސްޕީޑް ފަސިންޖަރ ފެރީއެއްގެ ޙިދުމަތް ކާމިޔާބުކަމާއެކު ހިންގޭނީ ތިލަދުންމަތީގައި ފަތުރުވެރިިކަމުގެ ޙިދުމަތްދޭ ތަންތަން އިތުރުކޮށްގެންކަމަށެވެ. އަދި އުއްމީދަކީ 2022 ވަނަ އަހަރުގެ މެދެއްހާ ހިސާބަށްދާއިރު ތިލަދުންމަތީގެ ފަތުރުވެރިިކަމުގެ އެނދުގެ އަދަދު އިތުުރުވެގެންދިޔުން ކަމަށްވެސް މިނިސްޓަރ ވިދާޅުވިއެވެ.

އިންޑިއާއާއި ރާއްޖެއާދެމެދު ކާގޯ ފެރީގެ ޚިދުމަތް މާދަމާ ފެށުމަށްވަނީ ހަމަޖެހިފައެވެ. ކާގޯ ފެރީއާއެކު ރާއްޖޭގެ މަހުގެ އުފެއްދުންތައް އިންޑިއާއަށާއި ޔޫރަޕަށް އެކްސްޕޯޓް ކުރަން މަގުފަހިވާނެެއެވެ.

އިންޑިއާގެ ޓުޓްކުރިން ބަނދަރުން މާދަމާ ފެށުމަށް ހަމަޖެހިފައިވާ ކާގޯ ފެރީގައި އެކްސްޕޯޓް އައިޓަމްތައް ހިފައިގެން ފުރަތަމަ އައުމަށް ހަމަޖެހިފައިވަނީ ސެޕްޓެމްބަރ 26 ވަނަ ދުވަހު ހދ. ކުޅުދުއްފުއްޓަށެވެ. އަދި ކުޅުދުއްފުއްޓަށް ފަހު މިމަހުގެ 28 ގައި މާލޭގައި މި ފެރީ ބަނދަރުކުރާނެކަމަށް އިންޑިއާ ހައިކޮމިޝަނުން ވިދާޅުވެއެވެ.

އިންޑިއާއާއި ރާއްޖެއާ ދެމެދު ކާގޯ ފެރީގެ ޚިދުމަތް ފެށުމަކީ ޒަރޫރީ ތަކެތީގެ ސަޕްލައި މެދުނުކެނޑި ދެމެހެއްޓުމަށްޓަކާއި އިންޑިއާގެ ބޮޑުވަޒީރު ނަރެންދްރަ މޯދީއާއި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމެވި މުހިއްމު ނިންމެވުމެކެވެ.