ޝިޕިންގ ކުންފުންޏެއް ޤާއިމް ކުރުމަކީ ދާއިރާ ވަރުގަދަކުރުމަށް ލިބޭ ފުރުސަތެއް - މިނިސްޓަރ ނަހުލާ

ދައުލަތުގެ ޝިޕިންގ ކުންފުންޏެއް ޤާއިމް ކުރުމަކީ ރާއްޖޭގެ މެރިޓައިމް ދާއިރާގެ އިންސާނީ ވަސީލަތް ވަރުގަދަކުރުމަށް ލިބޭ ފުރުސަތެއް ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އެވިއޭޝަން އައިޝަތު ނަހުލާ ވިދާޅުވެއްޖެއެވެ. މި އަހަރުގެ މެރިޓައިމް ދުވަހުގެ ޝިއާރަކީ ”ސަސްޓެއިނަބަލް ޝިޕިންގް ފޯރ އަ ސަސްޓެއިނަބަލް ޕްލެނެޓް“، ނުވަތަ ”ދެމެހެއްޓެނިވި ދުނިޔެއަކަށް ދެމެހެއްޓެނިވި ޝިޕިންގް އިންޑަސްޓްރީއެއް“ މިއެވެ.

މިއަހަރުގެ ވޯރލްޑް މެރިޓައިމް ދުވަހުގެ މުނާސަބަތުގައި މިނިސްޓަރ ދެއްވި މެސެޖްގައި ވަނީ އަދުގެ ސަރުކާރުގެ ސިޔާސަތަކީ މެރިޓައިމް ދާއިރާގައި މީހުން ބިނާކުރުންކަމަށާއި މިހާރު މަސައްކަތްކުރާ ސީމަނުންނަށް އިތުރު ތަމްރީނު ދިނުން ކަމަށެވެ. އަދި އިންޓަނޭޝަނަލް މެރިޓައިމް ލޭބާ ކޮންވެންޝަން ނުވަތަ މެރިޓައިމް ދާއިރާގެ މަސައްކަތްތެރިންނާ ގުޅޭ ބައިނަލްއަގްވާމީ މުއާހަދާ ވަރަށް އަވަހަށް ތަސްދީގު ކުރައްވާނެކަމަށްވެސް މިނިސްޓަރ ވިދާޅުވިއެވެ.

ގްރީންހައުސް ގޭސް ޖައްވަށް ދޫކުރާ މިންވަރު މަދުކުރުމަށްޓަކައި ހަދަންޖެހޭ ގަވާއިދުތައް ހަދައި އަޅަންޖެހޭ ފިޔަވަޅުތައް އެޅުމަށް ގޮވާލައްވަމުން މިނިސްޓަރ ވިދާޅުވީ މެރިޓައިމް ދާއިރާގައި ބޭނުންކުރާ ތެލުގައި ހިމެނޭ ސަލްފާ ކޮންޓެންޓް މަދުކުރަން ޖެހޭ ކަމަށެވެ. މީގެ އިތުރުން ބެލެސްޓް ވޯޓާ މެނޭޖްމަންޓް މުއާހަދާ ތަންފީޒުކުރުމަށާއި، ކުނި އުކާލައި މެނޭޖުކުރެވޭނެ ފެސިލިޓީތަކުގެ ބޭނުން ހިފުމަށާއި، މެރިޓައިމް ދާއިރާގައި އިލެކްޓްރޯނިކް ޒަރިއްޔާއިން މައުލޫމާތު ބަދަލުކުރުމާއި، އަންހެނުންގެ ބައިވެރިވުމާއި ދާއިރާގައި ތަމްރީނުގެ ފުރުސަތުތައް ފަހިކޮށް، މެރިޓައިމް ދާއިރާގެ ގުޅުންތައް ހަރުދަނާކުރުމަށްވެސް މިނިސްޓަރ ނަހުލާ ވަނީ ގޮވާލައްވާފައެވެ.
މިވަގުތު ދުނިޔެއަށް ދިމާވެފައިވާ އުނދަގޫ ދަނޑިވަޅުގައި ބައެއް ކަހަލަ އިސްތިރާޖުތައް ތަމްފީޒުކުރުމަކީވެސް އުނދަގޫ ކަމަކަށް ވެދާނެކަމަށް މިނިސްޓަރ ވިދާޅުވިއެވެ.

މިނިސްޓރަ ވިދާޅުވީ ރާއްޖެއާ އިންޑިއާއާ ދެމެދު ސީދާ ކާގޯ ޝިޕިންގް ޚިދުމަތް ފެށުމާއެކު ތިމާވެއްޓާ ރަހުމަތްތެރި ދެމެހެއްޓެނިވި ލަނޑުދަނޑިތައް ހާސިލުވާ، އަދި ސީމަނުންނަށް އެކިކަހަލަ އާ ފުރުސަތުތަކެއް ހޯދައިދޭނެ ފާގަތި ބަދަލުތަކަކާ ދިމާލަށް މެރިޓައިމް އިންޑަސްޓްރީ މިސްރާބު ޖަހާނެކަމަށް އުއްމީދުކުރައްވާކަމަށެވެ.

"މިއަހަރުގެ މެރިޓައިމް ދުވަހުގެ ޝިއާރަކީ ދެމެހެއްޓެނިވި ދުނިޔެއަކަށް ދެމެހެއްޓެނިވި ޝިޕިންގް އިންޑަސްޓްރީއެއް. ތިމާވެށި ރައްކާތެރިކުރުމަށް އެމިޝަންސް މަދުކުރުމަށްޓަކައި ފާހަގަކުރެވިފައިވާ ކަންކަމަށް މެރިޓައިމް ދާއިރާއިން އަވަސް ގޮތެއްގައި ހައްލު ހޯދަންޖެހޭ. ގެއްލުން ނުދޭފަދަ ގޮތަކަށް ހިންގޭ ހަރަކާތްތަކެއްކަން ޔަގީންކުރުން." މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވިއެވެ.

މިނިސްޓަރ ނަހުލާ ވަނީ މުޅި ދުނިޔެއަށް ދިމާވެފައިވާ ކޯވިޑް-19 ގެ ބަލިމަޑުކަމާއެކު އެކި ގައުމުތަކުން އަޅާފައިވާ ދަތުރުފަތުރުގެ ރެސްޓްރިކްޝަންސްތަކާއި ބޯޓުފަހަރުގައި މަސައްކަތްކުރާ މުވައްޒަފުންގެ އަމިއްލަ ގައުމުތަކުގެ ބޯޑަރުތައް ބަންދުކޮށްފައި ހުރުމުން އެމީހުންނަށް ގައުމުތަކަށް ފޭބުމަށް ވަރަށްބޮޑަށް ހުރަސް އެޅިފައިކަންވާކަން ފާހަގަ ކުރައްވާފައެވެ. މީގެއިތުރުން މެރިޓައިމް ދާއިރާގައި ދުވަހުން ދުވަހަށް ކުރަންޖެހޭ އެކިއެކި ކަންކަން ނުކުރެވި، އޮމާންކަމާއެކު މި ސިނާއަތް ހިންގުމަށް ހުރަސްއެޅިފައިވާކަންވެސް މިނިސްޓަރ ފާހަގަކުރެއްވިއެވެ. އެހެންނަމަވެސް ޖޯގްރަފީގެ ގޮތުން ރާއްޖެ އޮތް ގޮތުން، ރާއްޖެއަށް މިކަމުގައި މުހިންމު ދައުރެއް އަދާކުރެވިދާނެކަމަށާއި ވިދާޅުވެ، ރާއްޖެ ފަދަ މޫސުމަށް އަންނަ ބަދަލުތަކުގެ ސަބަބުން ނުރައްކަލަށް ހުށަހެޅިފައިވާ ގައުމުތަކުގެ އަޑު މެދުކެނޑުމެއް ނެތި އިއްވައިދިނުމަށް މިނިސްޓަރ ނަހުލާ ވަނީ ގޮވާލައްވާފައެވެ.