ދައުލަތުން ކުޑަކުދިންނާއި މީހުން ބަލަހައްޓާ ތަންތަނުގެ ހާލަތު ބަލައިފި

ދައުލަތުން ކުޑަކުދިންނާއި މީހުން ބަލަހައްޓާ ތަންތަނަށް ޒިޔާރަތްކޮށް އެތަންތަނުގައި ހުރި ރަނގަޅު ކުރަންޖެހޭ ކަންކަން ފާހަގަކޮށް، އެކަންކަން ރަނގަޅު ކުރުމަށް ކުޑަކުދިންނަށް ކުރާ އަނިިޔާތަކުގެ މައްސަލަތައް ބަލާ ކޮމިޝަނުން، ކަމާބެހޭ އިދާރާތަަކަށް ހުށައަޅައިފިއެވެ.

އެ ކޮމިޝަނުން ނެރުނު ނޫސް ބަޔާނެއްގައި ވިދާޅުވީ ޤާނޫނީ ނިޒާމުގެ ތެރެއިން ކުޑަކުދިންގެ ހައްޤުތައް އެންމެ ފުރިހަމައަށް ކަށަވަރުކުރެވޭކަން ވަޒަންކުރުމަށްޓަކައި ކަމާގުޅޭ ޤާނޫނުތައް ރިވިއުކުރުމުގެ މަސައްކަތްތައްވެސް ކުރަމުން އަންނަކަމަށެވެ. އަދި ކޯވިޑް-19 ޕެންޑެމިކްގެ ޙާލަތާގުޅިގެން އެ ކޮމިޝަނުގެ މަސައްކަތް ހަލުވިކަމާއެކު ކުރިއަށްގެންދިޔުމަށް ހުރަސްތަކެއް ކުރިމަތިވި ކަމުގައިވީނަމަވެސް، އެކޮމިޝަނުގެ އަމާޒަކީ ވީ އެންމެ އަވަހަކަށް ކޮމިޝަނުގެ މަސައްކަތްތައް ފުރިހަމަކުރުން ކަމަށްވެސް އެ ނޫސްބަޔާނުގައި ބުނެފައެވެ. އަދި ކުޑަކުދިންގެ ޙައްޤުތައް ކަށަވަރުކޮށްދިނުމަށްޓަކައި ނިޒާމީގޮތުން ގެންނަންޖެހޭ ބަދަލުތަކާއި، ކުޑަކުދިންނަށް ޚިދުމަތްތައް ފޯރުކޮށްދޭ މުއައްސަސާތަކުގައި ރަނގަޅުކުރަން ޖެހޭ ކަންކަން ދެނެގަނެ، އެކަންކަން އިޞްލާޙުކުރެވޭނެ ގޮތްތައް ހުށަހަޅައި، ކޮމިޝަންގެ ހުށަހެޅުންތައް ތަންފީޛުކުރުމަށް ބާރުއެއެޅުމަކީވެސް އަމާޒެއްކަމަށް ކޮމިޝަނުން ވިދާޅުވެއެވެ.

ދައުލަތުގެ ބެލުމުގެ ދަށުގައި ކުޑަކުދިން ބައިތިއްބާ މަރުކަޒުތަކުގެ ޙާލަތު ވަޒަންކޮށް، އެ މަރުކަޒުތަކުގައި އެކުދިންނާއި މެދު ޢަމަލުކުރެވެމުން ދާގޮތްތައް ދެނެގަތުމަށްޓަކައި ދައުލަތުގެ ބެލުމުގެ ދަށުގައި ކުޑަކުދިން ބައިތިއްބާ 5 މަރުކަޒަކަށް، ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން ވަނީ ޒިޔާރަތްކޮށްފައެވެ. މިގޮތުން އެތަންތަނަށް ޒިޔާރަތްކޮށްފައި ވަނީ މިއަހަރުގެ މާރިޗުމަހުގެ 10 އިން އޭޕްރީލް 14 އަށެވެ.

އެގޮތުން، ކޮމިޝަނުން އެންމެ ފުރަތަމަ ކުޑަކުދިންގެ ހިޔާއަށް ކުރި ޒިޔާރަތުން ފާހަގަކުރެވުނު ކަންކަމާއި، ކުޑަކުދިންގެ ހިޔާގައި އިޞްލާޙުކުރަންޖެހޭ ކަންކަން ފާހަގަކޮށް 26 މާޗް 2020 ގައި ޕްރެލިމިނަރީ ރިޕޯޓެއް ތައްޔާރުކޮށް ރައީސުލްޖުމްހޫރިއްޔާ އާއި ޙިއްސާކޮށްފައިވާކަމަށް އެ ކޮމިޝަނުން ވިދާޅުވެއެވެ.

އެއަށްފަހު 12 މާޗް 2020 އާއި 8 އެޕްރީލް 2020 ގައި ދޫނިދޫ އަދި އަތޮޅުވެހި ކަސްޓޯޑިއަލްއަށްވެސް ކޮމިޝަނުން ވަނީ ޒިޔާރަތްކޮށްފައެވެ. 16 މާޗް 2020 ގައި އައްސޭރި ޖަލަށް އެކޮމިޝަނުން ކުރި ޒިޔާރަތާއި، 14 އެޕްރީލް 2020 ގައި ފިޔަވަތި މަރުކަޒަށް ކޮމިޝަނުން ކުރި ޒިޔާރަތުގައި، އެ މަރުކަޒުތަކުގެ ސާފުތާހިރުކަމާއި، ތަނުގެ ރައްކާތެރިކަމާއި، އެތަންތަނުގައި ތިބޭކުދިންނަށް ލިބޭ ޚިދުމަތްތައް ވަނީ ބަލާފައެވެ. އަދި އެތަންތަނުގައިހުރި ލައިފް/ހެލްތުރިސްކުތަކާއި، އެމަރުކަޒުތަކުގައި ކުދިންނާމެދު ޢަމަލު ކުރެވެމުންދާ އުސޫލުތަކާމެދު މަޢުލޫމާތު އެއްކޮށް، އެ މަރުކަޒުތަކުގައި ރަނގަޅު ކުރަންޖެހޭ ކަންކަން ދެނެގެނެވިފައިވާކަމަށް އެ ކޮމިޝަނުން ވިދާޅުވެއެވެ.

ކުޑަކުދިންނަށް ކުރާ އަނިިޔާތަކުގެ މައްސަލަތައް ބަލާ ކޮމިޝަނުން ވިދާޅުވީ، އެ މަރުކަޒުތަކުގައި މިހާރުން މިހާރަށް އިޞްލާޙުކުރަންޖެހޭ ކަންކަމާއި،އެކަންކަން އިޞްލާޙުކުރުމަށްޓަކައި ކޮމިޝަނުން ހުށަހަޅާ ހުށަހެޅުންތައް ބަޔާންކޮށް، ކޮމިޝަނުން ތައްޔާރުކޮށްފައިވާ ޕްރިލިމިނަރީ ހަތަރު ރިޕޯޓް 23 ޖޫން އާއި 23 ޖުލައި ގައި ރައީސުލްޖުމްހޫރިއްޔާއާ ޙިއްޞާކުރައްވާފައިވާކަމަށެވެ.

އަދި 08 ސެޕްޓެންބަރު ގައި ރައީސުލްޖުމްހޫރިއްޔާއާއި ކޮމިޝަނާއެކު ބޭއްވި ބައްދަލުވުމުގައި، ކުޑަކުދިން ބަލަހައްޓާ މަޒުކަޒުތަކުގައި ކުދިންނަށް ލިބެމުންދާ ޚިދުމަތްތަކާއި އެތަންތާނގައި ިތބޭ ކުދިންގެ ސަލާމަތާއި ރައްކާތެރިކަމާއި، އެ މަރުކަޒުތަކުގެ ޙާލަތާގުޅޭގޮތުން ކޮމިޝަނުގެ ކަންބޮޑުވުންތައް އެމަނިކުފާނާއި ވަނީ ހިއްސާ ކުރައްވާފައެވެ. އަދި ކޮމިޝަނުން ވަނީ 14 ސެޕްޓެންބަރު 2020ގައި އެ މަރުކަޒުތަކުގެ ޕްރެލިމިނަރީ ރިޕޯޓުތައް ކަމާބެހޭ ހުރިހާ މުއައްސަސާތަކަށް ފޮނުއްވާފައެވެ.

މި ޕްރިލިމިނަރީ ރިޕޯޓުތަކުގައި ފިޔަވަތި މަރުކަޒުގައި އިޞްލާޙުކުރަންޖެހޭކަންކަން ބަޔާންކޮށް
15 ހުށައެޅުމެއް، ދޫނިދޫ ކަސްޓޯޑިއަލް އާއި އަތޮޅުވެހި ކަސްޓޯޑިއަލްގައި އިޞްލާޙުކުރަންޖެހޭ ކަންކަން ބަޔާންކޮށް 11 ހުށައެޅުމެއް، އަދި އައްސޭރި ޖަލުގައި އިޞްލާޙުކުރަންޖެހޭ ކަންކަން ބަޔާންކޮށް 13 ހުށައެޅުމެއް ހުށަހަޅާފައިވާނެކަމަށް އެ ކޮމިޝަނުން ވިދާޅުވއެވެ..

ކޮމިޝަނުން ވިދާޅުވީ ކުޑަކުދިންނަށް ކުރާ އަނިޔާގެ މައްސަލަތަކުގައި ކަމާބެހޭ މުއައްސަސާތަކުން ޢަމަލުކޮށްފައިވާ ގޮތް ދެނެގަތުމަށްޓަކައި، މިނިސްޓްީރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އާއި މޯލްޑިވްސް ޕޮލިސް ސަރވިސްއަށް ހުށަހެޅޭ މައްސަލަތަކުގެ ފައިލް އޮޑިޓެއްގެ މަސައްކަތް ކުރަމުން އަންނަކަމަށެވެ.