ކޮންމެ ޤައުމެއްގެވެސް ދިރުމަކީ އެ ޤައުމެއްގެ ޒުވާނުންނޭ ބުނުމަކުން މުޅިން ދޮގަކަށްނުވާނެއެވެ.
ކޮންމެ ޤައުމެއްގެވެސް އެންމެ އަގުބޮޑު ރައުސުލްމާލަކީ އެ ޤައުމެއްގެ ޒުވާނުންނެވެ. ކުރިއެރުމާއި ތަރައްޤީ ގުޅިފައިވަނީ ޒުވާނުން ބިނާކުރިގޮތެއްގެ މައްޗަށެވެ. އެތަނެއްގެ ޒުވާނުންގެ ތަޢުލީމާއި، ހުނަރާއި، ޤާބިލުކަން ހެޔޮގޮތުގައި ކުރިއަރުވައިގެން މެނުވީ އެތަނަކަށް ހަމަޖެހުމާއި ކުރިއެރުން ނުލިބޭނެކަމީ މިއަދު ދުނިޔެ ދެކެމުންދާ ހަޤީޤަތެކެވެ.
އަޅުގަނޑުމެންގެ މި ކުޑަކުޑަ ދިވެހިރާއްޖެއަށް ބަލާލިނަމަވެސް، ރާއްޖޭގެ އާބާދީގެ ދެބައިކުޅަ އެއްބަޔަކީ ޒުވާނުންނެވެ. މަސައްކަތު އާބާދީގައިވެސް ގިނައީ އުމުރުން 35 އަހަރުން ދަށުގެ ޒުވާނުންނެވެ. ވީއިރު، ޒުވާނުންގެ ބައިވެރިވުމާއި، އެހީތެރިކަމާއި އެއްބާރުލުމާއި ނުލާ މި ދިވެހިރާއްޖެ ކުރިއަރައިގެންނުދާނެކަން އެއީ މިއަދު އަޅުގަނޑުމެން ކޮންމެ ބަޔަކުވެސް ޤަބޫލުކުރަންޖެހޭ ހަޤީޤަތަކެވެ. ޤައުމުގެ ތަރައްޤީގެ ދުވެލި ގުޅިލާމެހިފައި ވަނީ ޒުވާނުންނާއެވެ. ޤައުމު ބިނާކުރުމަށް ކުރާ މަސައްކަތުގައި ސިޔާސަތުތައް ކަނޑައެޅުމުން ފެށިގެންގޮސް، ކަންކަން ތަންފީޒުކުރުމާ ހަމައަށްވެސް ޒުވާނުންގެ ބައިވެރިވުން އެހާމެ މުހިއްމުވެފައި ބޭނުންތެރިއެވެ. އެހެންކަމުން ކޮންމެ ސަރުކާރަކުންވެސް ޒުވާނުންނަށްދޭ އަހައްމިއްޔަތުކަން އިތުރުކަން ފާހަގަކޮށްލެވެއެވެ.
މިއަހަރުން ފެށިގެން ކޮންމެ އަހަރެއްގެ އޮކްޓޯބަރ މަހުގެ 22 ވަނަ ދުވަހަކީ ޤައުމީ ޒުވާނުންގެ ދުވަހުގެ ގޮތުގައި ފާހަގަކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކަނޑައަޅުއްވާފައިވަނީ 17 ޑިސެމްބަރ 2019 ގައެވެ.
މީގެކުރިން ޒުވާނުންގެ ދުވަސް ފާހަގަކުރައްވަމުން ގެންދެވި ތާރީޚު، އެކިފަހަރުމަތިން ވަނީ ބަދަލުކުރައްވާފައެވެ. މިގޮތުން، އެންމެ ފުރަތަމަ ޤައުމީ ފެންވަރުގައި ޒުވާނުންގެ ދުވަސް ފާހަގަކުރައްވާފައިވަނީ 1 މާރޗު 1992 ގައެވެ. އޭގެފަހުން ދުނިޔޭގެ ޒުވާނުންގެ ދުވަސް ކަމަށްވާ އޮގަސްޓު މަހުގެ 12 ވަނަ ދުވަސް އެއީ ރާއްޖޭގެ ޒުވާނުންގެ ދުވަހުގެ ގޮތުގައި ފާހަގަކުރައްވަމުން ގެންދެވިއެވެ. އަދި ފަހުން މި ދުވަސް ފާހަގަކުރައްވަމުން ގެންދަވާފައިވަނީ ނޮވެމްބަރު މަހުގެ 17 ވަނަ ދުވަހުއެވެ.
އެހެންނަމަވެސް ކޮންމެ އަހަރެއްގެ އޮކްޓޫބަރު މަހުގެ 22 ވަނަ ދުވަހަކީ ޤައުމީ ޒުވާނުންގެ ދުވަހުގެ ގޮތުގައި ފާހަގަކުރެއްވުމަށް ސަރުކާރުން ކަނޑައެޅުއްވީ މިދުވަހަކީ، ޢުމުރުން 18 އަހަރުން މަތީގެ ކޮންމެ ދިވެހި ރައްޔިތަކަށް އިންތިޚާބުތަކުގައްޔާއި، ރައްޔިތުންގެ ޚިޔާލު ހޯދުމުގެ ޢާންމު ވޯޓުތަކުގައި ވޯޓު ދިނުމުގެ ޙައްޤާއި، އިންތިޚާބުތަކުގައި، އެކިއެކި މަޤާމުތަކަށް ކުރިމަތިލުމުގެ ޙައްޤާއި، އެ މީހަކު އަމިއްލައަށް ނުވަތަ އެމީހަކު މިނިވަންކަމާއެކު އިޚްތިޔާރުކުރާ މަންދޫބުން މެދުވެރިކޮށް، ރައްޔިތުންގެ ކަންތައްތައް ހިންގުމުގައި ބައިވެރިވުމުގެ ޙައްޤު ލިބިދިނުމުގެ މާއްދާ މީގެ 13 އަހަރު ކުރިން، ރައްޔިތުންގެ ޚާއްޞަ މަޖިލީހުގެ 185 ވަނަ ޖަލްސާއިން ފާސްކުރެއްވި ތާރީޚީ ދުވަހަށްވާތީއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ސަރުކާރުގެ ރިޔާސީ ވަޢުދުފުޅުތަކުގެ ތެރޭގައިވެސް އުފެއްދުންތެރި ޒުވާނުން ބިނާކުރުމަކީ ނުހަނު އިސްކަމެއްދެއްވާފައިވާ ދާއިރާއެކެވެ. އެގޮތުން ސަރުކާރުގެ މެނިފެސްޓޯއާއި، 2019 އިން 2023 އަށް އެކުލަވާލާފައިވާ ސްޓްރެޓެޖިކް އެކްޝަން ޕްލޭންގައިވެސް "ފަޚުރުވެރި ޢާއިލާ" މި ސިޔާސަތުގެ ދަށުން ޒުވާނުންނަށް ޚާއްސަ ކަންތައްތަކެއް ވަނީ ހިމަނުއްވާފައެވެ.
އެގޮތުން ދުޅަހެޔޮ ހެޔޮލަފާކޮށް އުޅޭ އުފެއްދުންތެރި ޒުވާން ޖީލެއް ބިނާކުރުމަކީ ސަރުކާރުގެ އަމާޒެކެވެ. ޒުވާނުންނަކީ ރަނގަޅު ތަޢުލީމާއި،ތަމްރީން ލިބިގެން ޒިންމާދާރުކަމާއެކު އެމީހުންގެ ހަޔާތް އަމިއްލައަށް ބައްޓަންކުރާ ގަދަރުވެރި ބަޔަކަށް ހެދުމަށް އަންނަނީ ގިނަ މަސައްކަތްތަކެއް ކުރަމުންނެވެ. އަދި އެކިބާވަތުގެ ހުނަރާއި ފަންނުވެރިކަން ހުރި ޒުވާނުންނަށް ކުރިއަރާ ދިޔުމުގެ ފުރުޞަތު ފަހިކޮށްދިނުމަށްވެސް ސަރުކާރުން ގިނަ މަސައްކަތްތަކެއް އަންނަނީ ކުރަމުންނެވެ. ވަޒީފާ އަދާކުރުމުގަޔާއި، ވިޔަފާރިއާއި އަމިއްލަ މަސައްކަތްތައް ހިންގުމުގަޔާއި، ބިންވެރިވުމާއި ގޯތިގެދޮރު ލިބުންފަދަ އެންމެހާ ކަންތައްތަކުން ޒުވާނަކަށްވީތީ އެއްވެސް ކަމެއްގެ ފުރުޞަތު ހަނިވުމުގެ ބަދަލުގައި ހުރިހާ ފުރުޞަތުތަކެއް ފުޅާކުރުމަކީ ސަރުކާރުގެ ސިޔާސަތެކެވެ.
ރާއްޖެއަށް ބަލާނަމަ ޒުވާނުންނަށް ކުރިމަތިވެފައިވާ އެންމެ ބޮޑެތި މައްސަލަތަކުގެ ތެރޭގައި މަސްތުވާތަކެތީގެ ވަބާއާއި، ވަޒީފާ ނެތުމާއި، ޢާއިލާ ރޫޅުން ނުވަތަ އަޅާލުން ނުލިބުން އަދި ތަޢުލީމުގެ ފުރުޞަތުތައް ފަހިވެފައިނެތުން ހިމެނެއެވެ. މިކަންކަމަށް ހައްލުގެނައުމުގެ ގޮތުން ސަރުކާރުގެ ސްޓްރެޓިޖިކް އެކްޝަން ޕްލޭންގައި ޒުވާނުންނަށް ބޭނުންވާ ޞިއްޙީ ކަންކަމާއި، ވަޒީފާއާއި އިޤްތިޞާދީ ފުރުޞަތުތަކާއި، ތަޢުލީމީ ކަންކަން އަދި ޤައުމުގެ ކަންކަން ނިންމުމުގައި ޒުވާނުންގެ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރުމަށް ވަނީ ހިމަނާފައެވެ.
ޒަމާނީ ތަޢުލީމް އުނގަންނައިދީ، ހެޔޮލަފާ، ދުޅަހެޔޮ، އުފެއްދުންތެރި ޒުވާނުން ބިނާކުރުމަށް ސަރުކާރުން ކުރައްވާ އެކި މަސައްކަތްތަކުގެ ތެރެއިން އެންމެ ފާހަގަކޮށްލެވޭ އެއް މަސައްކަތަކީ ހިލޭ ފުރަތަމަ ޑިގްރީއާއި ހަމައަށް ކިޔެވުމުގެ ފުރުޞަތު ފަހިކޮށްދިނުމެވެ.
މިކަން ވެގެންދިޔައީ ފުދުންތެރިކަން ނެތުމުގެ ސަބަބުން މަތީ ތަޢުލީމުން މަޙްރޫމްވެފައިވާ އެތައް ޒުވާނުންނެއްގެ އުއްމީދުތަކާއި ހުވެފެންތަކުގައި ހަޤީޤީ ކުލަޖެހި، ދިރުންގެނުވި މުހިއްމުކަމަކަށެވެ. ޒުވާނުންނަށް ބޭނުންވާ ތަޢުލީމާއި އެއްވަރަށް، ކުޅިވަރާއި މުނިފޫހިފިލުވުމަށް ބޭނުންވާ ތަފާތު ވަޞީލަތްތައް ރާއްޖޭގެ އެކި ރަށްރަށުގައި ޤާއިމުކުރުމުގެ މަސައްކަތް މިހާރުވެސް ބާރު ދުވެލީގައި އަންނަނީ ކުރަމުންނެވެ.
ޝައްކެއްވެސް ނެތްގޮތުގައި ޒުވާނުންނަށް ލިބޭ ކޮންމެ ކުރިއެރުމަކީވެސް މުޅި ޤައުމަށް ލިބޭ ކުރިއެރުމެއްކެވެ. އެހެންކަމުން ޤައުމެއްގެ ކުރިމަގު ބިނާކުރުމުގައި ޒުވާނުންގެ ޒިންމާއާއި މަސްއޫލިއްޔަތަކީވެސް މުހިއްމު ދައުރެއް އަދާކުރާނެ އެއްޗެކެވެ. ކޮންމެ ޒުވާނަކީވެސް ޤައުމާއިގެން ކުރިއަށް ދިޔުމުގެ ރޫޙާއި، ވަޠަނީ ލޯބި ހުރި ބަޔަކަށްވާންޖެހެއެވެ. އަދި ސަރުކާރުން ފަހިކޮށްދޭ ފުރުޞަތުތަކުގެ ބޭނުން ހެޔޮގޮތުގައި ހިފަން އެނގޭ ބަޔަކަށް ވާންޖެހެއެވެ. ޤައުމެއް ޤައުމެއްގެގޮތުގައި ކުރިއަރާދާނީ އޭރުންނެވެ.