32ވވަނަ ނަސްރުގެ ދުވަސް ފާހަގަކުރުމަށް ޝަހީދުންގެ ބިނާގައި ދިިދަ ޖެހުމުގެ ރަސްމިއްޔާތު ބާއްވައިފިއެވެ.
ނަސްރުގެ ދުވަސް ފާހަގަކުރަނީ 1988 ވަނަ އަހަރު ދިވެހިންގެ ބަޔަކު ބޭރުގެ ކުލީ ސިފައިންނާއި އެކު ރާއްޖެ އަރައި ދިން ޢުދުވާނީ ޙަމަލާއިން ދިވެހިންނަށް ލިބުނު ނަސްރު ފާހަގަކުރުމުގެ ގޮތުންނެވެ.
ނޮވެންބަރު ތިނެއްގެ ހަނދާނީ ބިނާ ކުރިމަތީގައި މިއަދު ހެނދުނު ބޭއްވި ނަސްރުގެ ދުވަހުގެ ދިދަ ޖެހުމުގެ ރަސްމިއްޔާތާޢި، ގާޑް މޮމެންޓް ކުރުމުގެ ރަސްމިއްޔާތު ޝަރަފްވެރިކޮށް ދެއްވީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއެވެ.
މިރަސްމިއްޔާތުގައި ނޮވެމްބަރ ތިނެއްގައި ޝަހީދުވި ސިފައިންގެ ހަނދާނުގައި ހަމަހިމޭންކަމުގެ ސުކޫތެއް ވަނީ ގެނެސްފައެވެ. އަދި ސިފައިންގެ ޢަޒުމް އާކޮށް ޝަހީދުވި ސިފައިންގެ ހަނދާނުގައި 7 ބަޑީގެ ސަލާމެއް ވަނީ އަރުވާފައެވެ. މީގެ އިތުރުން ދުވަހާއި ގުޅޭ ޚާއްސަ ދުޢާއެއްވެސް ވަނީ ކޮށްފައެވެ.
މި ދުޢާގައި ވަނީ ޤައުމަށް ޚިދުމަތްކުރުމާއި އިޚުލާސްތެރި ވަފާތެރިއެއްގެ ގޮތުގައި ލެއްވުމަށް ދަންނަވާފައެވެ. އަދި ޤައުމަށް ޚިދުމަތް ކުރުމުގައި އަމިއްލަ ނަފްސަށްވުރެ ޤައުމަށް އިސްކަންދިނުމާއި ޤާނޫނާއި ޤަވައިދަށް ކިޔަމަންވާ ބައެއްކަމުގައި ލެއްވުމަށްވެސް ދުޢާގައި ދެންނެވިއެވެ. މީގެ އިތުރުން ދުޢާގައި ވިދާޅުވީ ނުރައްކާތެރި ބަލިތަކުން ރާއްޖެ ސަލާމަތްކޮށްދެއްވައި ދިވެހި ޤައުމަށް ނަސްރާ ކާމިޔާބު ލެއްވުމަށް އެދި ދުޢާކޮށްފައެވެ.
ކޮންމެ އަހަރަކުވެސް ނަސްރުގެ ދުވަސް ފާހަގަކުރުމުގެ ފުރަތަމަ ހަރަކާތެއްގެ ގޮތުން ސިފައިން އެކުގައި ފަތިސް ނަމާދުކުރެއެވެ. އެހެންނަމަވެސް ކޯވިޑް-19 ގެ ސަބަބުން މިފަހަރު ޖަމާޢަތުގައި ނަމާދުކޮށްފައެއް ނުވެއެވެ.
ދިވެހިންގެ ތެރެއިން ޤައުމަށް ޣައްދާރުވި ބަޔަކު އިސްވެތިބެ ސްރީލަންކާގެ ޓެރަރިސްޓް ޖަމާޢަތެއްކަމަށްވާ، ތަމަޅަ ޓައިގަރުންގެ ބަޔަކާއި ގުޅިގެން މާލެއަށް ހަތިޔާރާއެކު އަރައިގަނެ، ދިވެހިންގެ ތެރެއިން އެތައް ބަޔަކު ޝަހީދުކޮށްލާފައި ވަނީ 1988 ވަނައަހަރުގެ ނޮވެމްބަރުމަހުގެ 3 ވަނަ ދުވަހުއެވެ. ދިވެހިން ނަސްރުގެ ދުވަސް ފާހަގަކުރަނީ ދިވެހިރާއްޖޭގެ ޤާނޫނީ ވެރިކަމާއި، ދިވެހިރައްޔިތުންގެ މިނިވަންކަމާ ދެކޮޅަށް ބަޔަކު ދިން ނުރައްކާތެރި ބިރުވެރި މިޙަމަލާއިން ދިވެހި ޤައުމާއި ރައްޔިތުންނަށް ނަޞްރު ލިބުން ފާހަގަކުރުމަށްޓަކައެވެ.
ނަސްރުގެދުވަހުގެ ގޮތުގައި 3 ނޮވެމްބަރު ފާހަގަކުރަންފެށީ 1989 ނޮވެމްބަރު 3 ވަނަ ދުވަހުން ފެށިގެންނެވެ.