ބޭންކަށް ޖަމާކުރުމަށް ގެންދިޔަ 4 މިލިއަނަށްވުރެ ގިނަ ރުފިޔާ ފޭރިގަންނަން އުޅުނު މައްސަލައާއި ގުޅުންހުރި 3 މީހުންގެ ވަނަވަރު ހާމަކޮށްފިއެވެ. ވަނަވަރު ހާމަކޮށްފައިވާ މިތިން މީހުންނަކީ އެންމެ ފަހުން ހައްޔަރު ކުރި ތިން މީހުންގެއެވެ.
މިދިޔަ ހަފްތާގެ އާދީއްތަ ދުވަހު ހިނގި މިޙާދިސާގައި ފޭރިގަންނަން މަސައްކަތް ކޮށްފައިވަނީ ރޫޓް ފިހާރައިން، ބޭންކް އޮފް ސިލޯނަށް ޖަމާކުރުމަށް ގެންދިޔަ ފައިސާއެވެ.
ފުލުހުން ވިދާޅުވީ މިމައްސަލައާއި ގުޅިގެން މިމަހުގެ 1 އާއި 2 ވަނަ ދުވަހު ބެލުމުގެ ދަށަށް 3 މީހަކު ގެންގޮސްފައިވާކަމަށެވެ. އޭގެ ތެރޭގައި ހިމެނެނީ ގ.ރޮބިންސް އުމުރުން 20 އަހަރުގެ މުޙައްމަދު މާހީން މަދީޙް އާއި ސ.ފޭދު ރަންކޮކާގެ އުމުރުން 20 އަހަރުގެ އަޙްމަދު މާހިލް ސަޢީދުގެ އިތުރުން ރ.ރަސްމާދޫ އޯކިޑްމާގެ އުމުރުން 30 އަހަރުގެ މުޙައްމަދު އަޒުމީންއެވެ.
މި މީހުންގެ ބަންދާއިމެދު ގޮތެއްނިންމުމަށް ކޯޓަށް ހާޒިރުކުރުމުން، ބަންދުގައި ބައިތިއްބައިގެން ތަޙުޤީގު ކުރިއަށްގެންދިއުމަށް 15ދުވަހުގެ މުއްދަތެއް ކޯޓުން ދީފައިވާކަމަށް ފުލުހުން ވިދާޅުވެއެވެ.
މި 3 މީހުން ހިމެނޭހެން މިހާތަނަށް މި މައްސަލާގައި ފުލުހުން ވަނީ 7 މީހަކު ހައްޔަރުކޮށްފައެވެ. މިދިޔަ މަހުގެ 31ވަނަ ދުވަހު ފުލުހުންވަނީ، މި މައްސަލައާއި ގުޅިގެން ފުރަތަމަ ހައްޔަރުކުރި 4 މީހުންގެ ވަނަވަރު އާއްމުކޮށްފައެވެ. މިހަތަރު މީހުންނަކީވެސް ވައްކަމާއި، ތޫނު ހަތިޔާރުން ހަމަލާދީ ފޭރުމާއި، މާރާމާރީ އާއި މަސްތުވާތަކެތީގެ މައްސަލަތަކުގެ ކުށުގެ ރެކޯޑް އޮންނަ މީހުންކަމަށް ފުލުހުން ވިދާޅުވިއެވެ. މި 4 މީހުންގެ ބަންދަށްވެސް ކޯޓުންވަނީ 15 ދުވަސް ދީފައެވެ.
ރޫޓް ފިހާރައިން ބޭންކަށް ޖަމާކުރުމަށް ގެންދިޔަ ގިނަ އަދަދެއްގެ ފައިސާތަކެއް ފޭރެން މަސައްކަތްކޮށްފައިވަނީ ދެ ސައިކަލެއްގައި އައި 4 މީހެކެވެ. މި މީހުން ހުއްޓުވާފައިވަނީ ބޭންކް އޮފް ސިލޯނުގެ ސެކިއުރިޓީ ގާޑާއި، ރޫޓްގެ މުވައްޒަފުނެވެ.