އިންޓަނޭޝަނަލް ކޮމާޝަލް ޕޯޓާއި ގްރޭޓަރ މާލެ ކަނެކްޓިވިޓީ ބްރިޖް މަޝްރޫޢު ކުރިއަށް ގެންދިޔުމަށްޓަކައި އަންނަ އަހަރުގެ ބަޖެޓުގައި 945 މިލިޔަން ރުފިޔާ ކަނޑައަޅައިފިއެވެ.
މިގޮތުން ގުޅިފަޅު ޕޯޓް ތަރައްޤީކުރުމަށްޓަކައި އަންނަ އަހަރުގެ ބަޖެޓުގައި 476 މިލިޔަން ރުފިޔާ ވަނީ ކަނޑައަޅާފައެވެ. އަދި ބްރިޖް އެޅުމަށްޓަކައި 469 މިލިޔަން ރުފިޔާ ވަނީ ކަނޑައަޅާފައެވެ.
އަންނަ އަހަރަށް ދަޢުލަތުގެ ބަޖެޓް ހުށައަޅުއްވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ 2021ވަނަ އަހަރުގެ ތެރޭގައި ޕޯޓް ތަރައްޤީކުރުމުގެ މަޝްރޫއުގެ ޢަމަލީ މަސައްކަތްތައް ފަށާނެކަމަށެވެ.
ފެންވަރު ރަނގަޅު، ޖާގައިގެ ގޮތުން ތަނަވަސް، ޒަމާނީ އިންޓަނޭޝަނަލް ޕޯޓެއް ތަރައްގީކުރުމަކީ މިސަރުކާރުގެ އަމާޒެއްކަން ފާހަގަކުރައްވައި މިނިސްޓަރ ވިދަޅުވީ ރާއްޖޭގެ އިންޓަނޭޝަނަލް ކޮމާޝަލް ޕޯޓު މަޝްރޫއަށް ބޭނުންވާ ބިން ހިއްކުމުގެ މަސައްކަތުގެ ބޮޑުބައެއް މިހާރު ނިމިފައިވާކަމަށެވެ. އަދި މި ޕޯޓަކީ އަޅުގަނޑުމެން އެންމެންގެ އުންމީދާ ގުޅިފައިވާ ކަމެއްކަމަށާއި ރާއްޖޭގެ އުތުރާ ދެކުނުގައި ސަރަހައްދީ ޕޯޓުތައް ތަރައްގީކުރުމާއި ޚިދުމަތްތައް ފުޅާކުރުމަށް މިބަޖެޓުން އިސްކަންދީފައިވާނެކަމަށް މިނިސްޓަރ ވިދާޅުވިއެވެ.
"ރާއްޖެއަކީ އިމްޕޯޓަށް ބަރޯސާވާ ޤައުމެއް. އަދި މާލޭ ކޮމާރޝަލް ހާބަރަކީ ރާއްޖެއަށް އެތެރެކުރެވޭ ގިނަ މުދަލުގެ މައި ދޮރާށި. ރާއްޖޭގެ އިޤްތިސާދު އަހަރުން އަހަރަށް ކުރިއަރައި އިމްޕޯޓް ކުރާ މުދަލުގެ އަދަދު އެތައް ގުނައަކުން އިތުރުވަމުން ދިޔަނަމަވެސް، މާލޭ ވިޔަފާރި ބަނދަރަށް ބޮޑު ބަދަލެއް ނާންނަތާ އެތައް އަހަރެއް ވެއްޖެ." ފިނޭނެސް މިނިސްޓަރ އިބްރާހީމް އަމީރު ވިދާޅުވިއެވެ.
މިނިސްޓަރ އަމީރު ވިދާޅުވީ އިންޓަނޭޝަނަލް ކޮމާޝަލް ޕޯޓުގެ މަޝްރޫއާއެކު މާލެއާއި ވިލިނގިއްޔާއި ގުޅިފަޅާއި ތިލަފުށި ގުޅާލާ ބްރިޖުގެ މަސައްކަތް ވެސް ކުރިއަށްދާނެކަމަށެވެ. އަދި މި މަޝްރޫއަށް ބޭނުންވާ ފައިނޭންސް މިހާރު ހަމަޖެހިފައިވާކަމަށާއި މި މަޝްރޫއުވެސް އަވަހަށް ފެށިގެން ދާނެކަމަށް މިނިސްޓަރ ވިދާޅުވިއެވެ.