ގްރޭޓަރ މާލެ ކަނެކްޓިވިޓީ ބުރިޖާއި، ގުޅިފަޅު ޕޯޓުގެ ޢަމަލީ މަސައްކަތް އަންނަ އަހަރުގެ މެދުތެރޭގައި ފެށޭނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛު ފައްޔާޟު އިސްމާޢީލް ވިދާޅުވެއްޖެއެވެ.
ޕީ.އެސް.އެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޟު ވިދާޅުވީ، އަންނަ އަހަރު ސަރުކާރުން އެންމެ ބޮޑު އިސްކަމެއްދޭނީ ކޯވިޑް-19ގެ ސަބަބުން ޢަމަލީ މަސައްކަތްތައް ނުފެށި ހުރި މަޝްރޫޢުތަކުގެ މަސައްކަތް ފެށުމަށް ކަމަށެވެ. އަދި އިޤްތިޞާދީ ހަރަކާތްތައް ފުޅާކުރުމަށް ޖާގަލިބޭ، އިޤްތިޞާދީ ނަފާ ލިބޭނެ މަޝްރޫޢުތައް ހިންގުމަށް އިސްކަންދޭނެކަމަށެވެ. އެގޮތުން އަންނަ އަހަރު ކުރިއަށްދާނެ އެންމެ ބޮޑު ދެ މަޝްރޫޢަކީ ގްރެޓަރ މާލޭ ކަނެކްޓިވިޓީ ބްރިޖާއި، ގުޅިފަޅު ޕޯޓު މަޝްރޫޢުކަން ފާހަގަކުރައްވާ، މި 2 މަޝްރޫޢުގެ ޢަމަލީ މަސައްކަތްވެސް އަންނައަހަރުގެ މެދުތެރޭގައި ފެށޭވަރުވާނެކަމަށް މިނިސްޓަރ ފައްޔާޟް ވިދާޅުވިއެވެ.
"މިހާރު އެއޮތީ ޓެންޑަރކޮށްފައި ޕްރިކޮލިފައިޑް ޓެންޑަރސް ހޯދަން. މިމަހުގެ 12 ވަނަ ދުވަހަށް އެ ޑެންޓަރ ކްލޯސްވާނެ. ކްލޯސްވެފައި އަޅުގަނޑުމެންނަށް ގާތްގަނޑަކަށް މަހެއްހާ ދުވަހުގެ ތެރޭގައި އެގްޒިމް ބޭންކުން ފޮނުވާނެ ކޮލިފައިވާ ދެތިން ހަތަރު ޕާޓީއެއް. އެމީހުންނަށް އަޅުގަނޑުމެން ފޮނުވާނީ ރަސްމީ ޓެންޑަރ. އެހެންވީމަ ޖެނުއަރީ ނުވަތަ ފެބްރުއަރީ މަހުގެ ތެރޭގައި އަޅުގަނޑުމެންނަށް ކޮންޓްރެކްޓަރެއް ލިބި، ޑިޒައިން އެންޑް ބިލްޑްކަމަކަށްވާތީވެ މެއި ޖޫން ހިސާބުގައި މެޝިނަރީއާއެއްކޮށް އެތަނުގައި މަސައްކަތް ފެށޭނެ. އެހެންވީމަ އުއްމީދަކީ އަންނައަހަރުގެ މެދުތެރޭގައި ޢަމަލީ މަސައްކަތް ގުޅިފަޅުގައިވެސް އަދި ބްރިޖުވެސް ފެށުން" މިނިސްޓަރ ފައްޔާޟް ވިދާޅުވިއެވެ.
މިނިސްޓަރ ފައްޔާޟު ވިދާޅުވީ، ބްރިޖާއި ޕޯޓު މަޝްރޫޢު ސަރުކާރުން ކުރިއަށްގެންދަނީ، ހަމައެކަނި އެއިން ލިބޭ އިޤްތިޞާދީ މަންފާއަށް ބަލައިގެން ނޫންކަމަށާއި، މިއީ އިޖްތިމާޢީ ގޮތުންވެސް އެތައް ކުރިއެރުންތަކެއް ގެނުވާނެ މަޝްރޫޢަކަށްވާތީ ކަމަށެވެ. އެގޮތުން މުދަލުގެ އަގުހެޔޮވުމާއި، ސިނާޢީ މަސައްކަތްތަައް ފުޅާކުރުމަށް ޖާގަލިބި، އިޖްތިމާޢީ ކަންކަމަށް ޚަރަދުކުރުމަށް އިތުރު ފައިސާ ސަރުކާރަށް ލިބިގެންދާނެކަން މިނިސްޓަރ ފާހަގަކުރެއްވިއެވެ. އަދި މި ދެ މަޝްރޫޢުގެ ސަބަބުން މާލޭގެ ތޮއްޖެހުމަށްވެސް ކޮންމެވެސް ވަރެއްގެ ހައްލެލިބި، އަތޮޅުތަކަށް މުދާ ފޮނުވުމުގައިވެސް ލުއިތަކެއް ލިބިގެންދާނެކަމަށް މިނިސްޓަރ ވިދާޅުވިއެވެ.
"ގުޅިފަޅު އެއްކޮށް ނިމޭއިރު ގުދަން ކުރުމުގެ ނިޒާމާއި ފެކްޓްރީގެ ނިޒާމް އެތަނުގައި ޤާއިމުކުރެވިގެންދިޔައީމަ މާލޭގައި ހުރި ހުރިހާ ގުދަނެއް ބަދަލުވާނެ ގުޅިފަޅަށް. އަޅުގަނޑުމެންގެ ވިސްނުން މިހާރު މިހުރީ މާލޭގެ ގުދަނަކަށް މިސާލަކަށް ވިޔަފާރިވެރިން އަކަފޫޓަކަށް 50 ރުފިޔާ މިއަދު ޚަރަދުކުރާކަމަށްވަންޏާ އޭގެ އެތައްގުނައެއް ކުޑަކޮށް ގުޅިފަޅުން އެތަންތަން ދޫކުރުން. އޭގެ މާނައަކީ މުދަލުގެ އަގުހެޔޮވުން، ވިޔަފާރިއަށް ލިބޭ ނަފާ އިތުރުވާނެ، ނަފާ އިތުރުވާކަމަށްވަންޏާ ސަރުކާރަށް ލިބޭ ޓެކްސް އިތުރުވާނެ. އެ ޓެކްސް އިތުރުވާކަމަށްވަންޏާ އިޖްތިމާޢީ ކަންކަމަށް ޚަރަދުކުރާ މިންވަރު އިތުރުވާނެ. އިތުރު ވަޒީފާ އުފެއްދޭނެ" މިނިސްޓަރ ފައްޔާޟް ވިދާޅުވިއެވެ.
މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށް ކުރިއަށްގެންދާ ގްރޭޓަރ މާލެ ކަނެކްޓިވިޓީ ބްރިޖު މަޝްރޫޢަކީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނު އެހީގައި ކުރިއަށްގެންދާ މަޝްރޫޢެކެވެ. އިންޓަނޭޝަނަލް ކޮމާޝަލް ޕޯޓާއި ގްރޭޓަރ މާލެ ކަނެކްޓިވިޓީ ބްރިޖް މަޝްރޫޢު ކުރިއަށް ގެންދިޔުމަށްޓަކައި އަންނަ އަހަރުގެ ބަޖެޓުގައި 945 މިލިޔަން ރުފިޔާ ކަނޑައަޅައިފިއެވެ. މިގޮތުން ގުޅިފަޅު ޕޯޓް ތަރައްޤީކުރުމަށްޓަކައި އަންނަ އަހަރުގެ ބަޖެޓުގައި 476 މިލިޔަން ރުފިޔާ ވަނީ ކަނޑައަޅާފައެވެ. އަދި ބްރިޖް އެޅުމަށްޓަކައި 469 މިލިޔަން ރުފިޔާ ވަނީ ކަނޑައަޅާފައެވެ.