ދިވެހި ސިފައިންގެ އަސްކަރީ ތަމްރީންތަކެއް ޅ. މާފިލާފުށީގައި ފަށައިފިއެވެ.
ޑިފެންސް މިނިސްޓްރީން ވިދާޅުވީ މި އަސްކަރީ ތަމްރީންތައް މިމަހުގެ 15 ވަނަ ދުވަހުގެ ނިޔަލަށް ކުރިއަށްގެންދިޔުމަށް ނިންމާފައިވާކަމަށެވެ. އެގޮތުން މިދުވަސްތަކުގައި ކޮންމެ ދުވަހަކު އިރުއޮއްސި ހަޔަކުން މެންދަމު 1:00 އަށް ކުރިއަށްގެންދާ މި ތަމްރީންތަކުގައި ހަތިޔާރު/ ޕައިރޯޓެކްނިކްސް ބޭނުންކުރުމަށް ހަމަޖެހިފައިވާ ކަމަށް މިނިސްޓްރީން ވިދާޅުވެއެވެ.
ޑިފެންސް މިނިސްޓްރީން ކުރެއްވި އިއުލާނެއްގައިވާ ގޮތުން މި ތަމްރީންތަކުގައި ހަތިޔާރުގެ ގޮތުގައި ބޭނުން ކުރާނީ އޭކޭ ސީރީޒް ރައިފަލެވެ. ވައިގެ ސަރަހައްދު ބޭނުންކުރާ އެންމެ ދުރުމިނާއި އުސްމިނަކީ 2900 މީޓަރުކަމަށާއި ވައިގެ ސަރަޙައްދުން ބޭނުންކުރާނެ އެންމެ ތިރިމިނަކީ ސީލެވެލްކަމަށެވެ.
ވައިގެ ސަރަހައްދު ބޭނުންކުރާ މިސްރާބަކީ މާފިލާފުށި ރޭންޖުން ހުޅަނގު ދެކުނަށް ކަމަށް ޑިފެންސް މިނިސްޓްރީގެ އިއުލާނުގައިވެއެވެ.