ހަނިމާދޫ އެގްރިކަލްޗަރ ރިސާޗް ސެންޓަރ އިތުރަށް ތަރައްގީކުރުމަށް ހިންގާ މަޝްރޫޢާއެކު ދަނޑުވެރިކަމާއި ގުޅުންހުރި މުހިންމު ތަހުލީލުތަކެއް ކުރެވޭ ޒަމާނީ ލެބޯޓްރީއެއް ޤާއިމްކުރެވިގެންދާނެ ކަމަށް ރާއްޖޭގައި ހުންނަ އިންޑިއާ ހައިކޮމިޝަނުން ވިދާޅުވެއްޖެއެވެ.
މިމަޝްރޫއު ކުރިއަށް ގެންދިއުމަށް ހަމަޖެހިފައިވަނީ އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓްސް (އެޗް.އައި.ސީ.ޑީ.ޕީ) ގެ ދަށުން ފޯރުކޮށްދޭ އެއްމިލިޔަން ހަތްސަތޭކަ އެގާރަ ހާސް ހަތަރުސަތޭކަ ތިރީސް ހަތަރު ރުފިޔާ ފަސްދޮޅަށް ލާރީގެ ގްރާންޓެއްގެ ދަށުންނެވެ.
ހަނިމާދޫ އެގްރިކަލްޗަރ ރިސާޗް ސެންޓަރ ތަރައްގީ ކުރުމުގެ މަޝްރޫޢުގެ ތެރޭގައި ހިމަނައިގެން ޤާއިމްކުރާ ލެބޯޓްރީއަކީ ސޮއިލް އެނެލިސިސް އާއި ޕްލާންޓް ޓިޝޫ ޓެސްޓިން ލެބޯޓްރީއެކެވެ. އަދި މިލެބޯޓްރީން 8000 އަށް ވުރެ ގިނަ ދަނޑުވެރިންނަށް ސޮއިލް އާއި ޕްލާންޓް ޓިޝޫ ޓެސްޓިން އާއި ގުޅޭ ގިނަ ޚިދުމަތްތައް ފޯރުކޮށްދެވޭނެ ކަމަށް އިންޑިއާ އެމްބަސީން ވިދާޅުވެއެވެ. މީގެ އިތުރުން ކްރޮޕް ފޯކަސްޑް ޕެކެޖުތަކާއި، ކޮމްޕޯސްޓް ޓެސްޓިން، ދިރާސާ އާއި ތައުލީމުގެ ބޭނުމަށް ކުރެވޭ ބޭސިކް ސޮއިލް ޓެސްޓިން، ކާބަން އެނެލިސިސް، ފުލް އަދި ނިއުޓްރިއެންޓް އައި.ސީ.ޕީ ސްކޭންގެ ޚިދުމަތްވެސް މިލެބޯޓްރީން ފޯރުކޮށްދިނުމަށް ވަނީ ހަމަޖެހިފައެވެ. އިންޑިއާ އެމްބަސީން ވިދާޅުވީ ލެބްތަކަށް ބޭނުންވާ ސްޓޭޓް-އޮފް-ދަ-އާޓް އިކުއިޕްމެންޓް އިންޑިއާގެ ގްރާންޓްގެ އެހީގައި ގަނެވޭނެކަމށެވެ.
ހަނިމާދޫ އެގްރިކަލްޗަރ ރިސާޗް ސެންޓަރު ތަރައްޤީކުރުމުގެ މަޝްރޫއަކީ ރައީސް އިބްރާހިމް މުޙައްމަދު ޞާލިޙް ޑިސެމްބަރ 2018 ގައި އިންޑިއާއަށް ކުރެއްވި ރަސްމީ ދަތުރުފުޅުގެ ތެރޭގައި ސޮއި ކުރެއްވި އެގްރިކަލްޗަރ އެމް.އޯ.ޔޫ ގެ ފްރޭމްވޯކްގައި ހިމެނޭ މަޝްރޫއެކެވެ. މިމަޝްރޫއުގެ އިމްޕްލިމެންޓިން އޭޖެންސީއަކީ މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް މެރިން ރިސޯސަސްއެވެ. އަދި މި މަޝްރޫއުގެ ސަބަބުން ދިވެހި ދަނޑުވެރިންގެ އުފެއްދުންތެރިކަން އިތުރުކުރުމަށް ބޭނުންވާ ސައިންޓިފިކް ޓެކްނީކްތަކާއި ދިރާސީ މައުލޫމާތު ފޯރުކޮށްދެވޭނެއެވެ.
ހަނިމާދޫ އެގްރިކަލްޗަރ ރިސާޗް ސެންޓަރު ތައްރައްޤީކުރުމުގެ އެއްބަސްވމުގައި ސޮއިކޮށްފައިވަނީ މިމަހުގެ 9 ވަނަ ދުވަހުއެވެ.
މިވަގުތު ދިވެހިރާއްޖޭގައި އެޗް.އައި.ސީ.ޑީ.ޕީ ގެ 11 މަޝްރޫއެއް ކުރިއަށްދެއެވެ. މީގެ ތެރޭގައި އައްޑޫ ސިޓީގައި މަސް ޕްރޮސެސް ކުރުމަށް 3 ޕްލާންޓް ގާއިމް ކުރުމުގެ މަޝްރޫއާއި، އައްޑޫ ސިޓީގައި 5 ސަރަހައްދެއްގައި އިކޯ ޓޫރިޒަމް ޒޯން ގާއިމް ކުރުމުގެ މަޝްރޫއާއި، ހޯރަފުށީގައި ފެންބަންދު ކުރުމުގެ ޕްލާންޓެއް ގާއިމް ކުރުމުގެ މަޝްރޫއު ހިމެނެއެވެ. އަދި ހަނިމާދޫގައި އެގްރިކަލްޗާ ރިސާޗް ސެންޓަރ ތަރައްގީ ކުރުމުގެ މަޝްރޫއާއި، އައްޑޫ ސިޓީގައި ޑްރަގް ޑީޓޮކްސް ފެސިލިޓީއެއް ގާއިމްކުރުމުގެ މަޝްރޫއުވެސް ހިމެނެއެވެ.
އިންޑިއާގެ އެޗް.އައި.ސީ.ޑީ.ޕީ ގްރާންޓް ސްކީމަކީ، ބޮޑެތި އުމްރާނީ މަޝްރޫއުތައް ކުރިއަށް ގެންދިއުމަށް ފޯރުކޮށްދެވޭ ލައިން އޮފް ކްރެޑިޓްތަކާއި، ދިވެހި މަސައްކަތްތެރިންގެ ކެޕޭސިޓީ ބިލްޑިންއަށް ދެވޭ އެހީ ފަދައިން އިންޑިއާއިން ދިވެހިރާއްޖެއަށް ފޯރުކޮށްދޭ ތަރައްގީގެ އެހީގެ ބައެކެވެ.