ރާއްޖެ އިސްލާމްވި ދުވަހާ ގުޅިގެން އިސްލާމީ ހަމަތަކަށް ފެތޭގޮތަށް ކުރެހުމުގެ މުބާރާތެއް ބޭއްވުމަށް ނިންމައިފިއެވެ.
ކުރެހުމުގެ މިމުބާރާތަކީ ކުޑަކުދިންގެ މެދުގައި އިސްލާމީ އަޚްލާޤު އަށަގަންނުވައި އިސްލާމީ އަޤީދާގެ މަތީގައި އުފެއްދުންތެރި ޖީލެއް ބިނާކުރުމަށްޓަކައި ކުރިއަށްގެންދާ މުބާރާތެކެވެ.
މިއީ އުމުރުން 5 އަހަރާއި 13 އަހަރުގެ ކުދިންނަށް އަމާޒުކޮށްގެން ކުރިއަށްގެންދިއުމަށް ނިންމާފައިވާ މުބާރާތެކެވެ. މި މުބާރާތުގައި ބައިވެރިވުމުގެ މުއްދަތު މިމަހުގެ 16 ވަނަދުވަހާ ހަމަޔަށްވަނީ ހުޅުވާލާފައެވެ. މުބާރާތުގައި ބައިވެރިކުރުމަށް އެދޭ ކުރެހުންތައް
[email protected] އަށް ފޮނުވުމުގެ ފުރުޞަތު އިސްލާމިކް މިނިސްޓްރީން ވަނީ ހުޅުވާލާފައެވެ.
މިމުބާރްތް ކުރިއަށް ގެންދިޔުމަ ށްހމަަޖެހިފައިވަނީ 3 ތީމަކަށް ބަހާލައިގެންނެވެ. އެއީ ނަމާދު، އަހަރެންގެ މަންމަ އާއި ބައްޕަ، އަދި ގެފުޅެވެ. މިގޮތުން ނަމާދާ ގުޅޭ ކުރެހުންތައް ހުށައަޅާއިރު ނަމާދު ވަގުތުތައް ދައްކުވައިދޭ ކުރެހުމާއި ނަމާދުކުރާ ތަން ދައްކުވައިދޭ ކުރެހުމުގެ އިތުރަށް ނަމާދުގެ މުހިންމުކަން އަންގައިދޭ ކުރެހުން، ނަމާދަށް ޝައުގުވެރިވާނެ ގޮތްތައް ދައްކުވައިދޭ ކުރެހުންތައް ހުށަހެޅިދާނެ ކަމަށް އިސްލާމިކް މިނިސްޓްރީން މަޢުލޫމާތުދެއްވައެވެ.
އަހަރެންގެ މަންމައާއި ބައްޕަގެ ބަޔަށް މައިންބަފައިންނަށް އެހީތެރިވުން، މައިންބަފައިންނަށް އަޅާލުން، އޯގާތެރިވުން، މައިންބަފައިންގެ ބަސްއެހުން، މައިންބަފައިންނަށް އިޙްތިރާމްކުރުމުގެ ކުރެހުންތައްވެސް ހުށައެޅޭނެއެވެ.
ގެފުޅުގެ ބައިގައި ގެފުޅަކީ ކޮންތަނެއްކަމާއި، ގެފުޅަށް ޒިޔާރަތް ކުރުމުގެ ބޭނުން އެނގޭގޮތަށް ކުރެހުންތައް ހުށައެޅޭނެކަމަށް އިސްލާމިކް މިނިސްޓްރީން ވިދާޅުވެއެވެ.

އިސްލާމިކް މިނިސްޓްރީން ވިދާޅުވީ މިމުބާރާތަށް ހުށަހަޅާ ކުރެހުންތައް ފަންނީ ބޭފުޅުންގެ ޓީމެއް މެދުވެރިކޮށް އިންސާފު ކޮށް އެންމެ މޮޅު 5 ކުރެހުން ހޮވާނެކަމަށެވެ. މުބާރާތުގައި ވަނަވަނައަށް ދާ ކުރެހުންތަކަށް ފައިސާގެ އިނާމާއި ހަނދާނީ ލިޔުން ދިނުމަށް ހަމަޖެހިފައިވާއިރު ފައިސާގެ އިނާމްގެ ގޮތުގައި ކަނޑައަޅާފައިވަނީ 300 ރުފިޔާއާއި 1500 ރުފިޔާއާ ދެމެދެވެ.