ރާއްޖޭގައި މެރިކަލްޗަރ ސިނާއަތް ފުޅާކުރުމަށް އަންނަ އަހަރުތެރޭ ކ. މަނިޔަފުށީގައި އެކަމަށް ބޭނުންވާ ތަމްރީން ދިނުމަށް، ޓްރެއިނިންގ ސެންޓަރެއް ހުޅުވުމަށް ތައްޔާރުވަމުންދާ ކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
ފާއިތުވި ދެއަހަރު ދުވަހުގެ ތެރޭގައި ދަނޑުވެރިކަމާއި މަސްވެރިކަމުގެ ދާއިރާއިން ހޯދާފައިވާ ކުރިއެރުންތަކާއި ކުރިއަށް ރޭވިފައިވާ ކަންކަމާއި ގުޅޭގޮތުން ޕީއެސްއެމް ނިއުސްއާއި ވާހަކަފުޅުދައްކަވަމުން ފިޝަރީޒް މިނިސްޓަރ ޒަހާ ވަޙީދު ވިދާޅުވީ ހަމައެކަނި މަސްވެރިކަމާއި ދަނޑުވެރިކަމަށް ބަރޯސާވުމުގެ ބަދަލުގައި އިތުރު ސިނާއަތްތައް އުފައްދަން ޖެހިފައިވާ ކަމަށެވެ.
އެގޮތުން މެރިކަލްޗަރގެ މަސައްކަތްކުރުމަށްބޭނުންވާ ފަރާތްތަކަށް އެފުރުސަތު އެސެންޓަރުން ފަހިވެގެންދާނެ ކަމަށް މިނިސްޓަރ ވިދާޅުވިއެވެ.
" މިއަންނަ އަހަރު ފެށޭއިރު ޓްރެއިނިން ސެންޓަރ ހުންނާނީ ޤާއިމްކުރެވިފައި، އެހެންވީމަ މިމަސައްކަތްކުރައްވަން ޝައުގުވެރިވާ ފަރާތްތަކުން ޓްރެއިނިން ދިނުމަށް އެސެންޓަރު ހުންނާނީ ތައްޔާރުވެފައި،" މިނިސްޓަރ ޒަހާ ވިދާޅުވިއެވެ.
މީގެއިތުރުން މާނާގަލާގައި ހަދާ މެރިކަލްޗަރ ހެޗަރީގެ މަސައްކަތްވެސް ކުރިއަށްދާ ކަމަށް މިނިސްޓަރ ވިދާޅުވިއެވެ. މިކަން ކުރުމަށް ހަމަޖެހިފައިވަނީ ބޭރުގެ ފަރާތްތައް ގެނެސްގެން ކަމަށްވެސް މިނިސްޓަރ ވިދާޅުވިއެވެ.
" އިންޓަރނޭޝަނަލް ޓެންޑަރއަށް މި ހުޅުވާލަަނީ، ހެޗަރީއެއް ހަދާ، ހެޗަރީއިން ކުދި އެއްޗެހި އާލާ ކުރުމުގެ، ލާޖް ސްކޭލްއަށް އެވަރުގެ ހެޗަރީއެއް އޮޕަރޭޓްކުރުމުގެ ޤާބިލްކަމެއް ނެތް އަޅުގަނޑުމެންގެއެއް، އެހެންވީމާ އިންޓަރނޭޝަނަލް ޓެންޑަރއަށް ހުޅުވާލައިގެން ހުއިފިލަނޑާ އާއި ފާނަ އާއި އެންވެރިކަމުގެ މަސް އެއްއަހަރު ދުވަސްތެރޭ ފޯރުކޮށްދޭން ޖެހޭނެ،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މެރިކަލްޗަރގެ ސިނާއަތަށް ވަންނަން ބޭނުންވާ ފަރާތްތަކަށް ކުދި ހުއިފިލަނޑާ އާއި ފާނަ އެ ހެޗަރީއިން ލިބޭނެ ކަމަށެވެ.
ފިޝަރީޒް މިނިސްޓްރީން ވަނީ ކާމިޔާބުކަމާއި އެކު ފާނަ އަލާ ކުރުމުގެ ޕައިލެޓް ޕްރޮޖެކްޓެއްވެސް ކުރިއަށްގެންގޮސްފައެވެ. މިމަޝްރޫޢުގެ ދަށުން މިއަހަރު ޖެނުއަރީމަހު ވަނީ އދ. އަތޮޅު ކައުންސިލާއި، އެއަތޮޅު މަހިބަދޫ، އޮމަދޫ، ދިގުރަށް އަދި ދަނގެތީ ގުޅިގެން ފާނަ އަލާކުރުމުގެ މަސައްކަތް ކުރިއަށްގެންގޮސްފައެވެ. މިމަޝްރޫގެ ޕައިލެޓް ހަރަކާތުގައި މި ހަތަރު ރަށުން ޖުމްލަ 19 ގޭބިސީއަކާއިއެކު ފާނަ ބޮޑުކުރުން ތަޖުރިބާކޮށްފައިވެއެވެ. އަދި އެމަސައްކަތްކުރާ ފަރާތްތަކަށް މިޕްރޮޖެކްޓްގެ ދަށުން މޫދުކޮށްޓާއި، ކުދި ފާނައާއި، މަސްކާނާގެ އިތުރުން މި މަސައްކަތަށް ބޭނުންވާ ތަމްރީނު ވަނީ ފޯރުކޮށްދީފައެވެ.