ސެނަހިޔަ މިލިޓަރީ ހޮސްޕިޓަލުން ނާރުގެ ބަލިތަކުގެ ޓެސްޓްތައް ހެދޭނެ އިންތިޒާމު ހަމަޖައްސައިފިއެވެ. އެ ހޮސްޕިޓަލުން ދެމުން ގެންދާ ލެބޯރެޓަރީގެ ޚިދުމަތް ވަނީ އަޕްގްރޭޑް ކޮށްފައެވެ.
ނާރުގެ ބަލިތަކުގެ ޓެސްޓްތަކުގެ ޚިދުމަތް ތަޢާރަފުކުރުމަށް މިއަދު ސެނަހިޔަ މިލިޓަރީ ހޮސްޕިޓަލްގައި ބޭއްވި ޚާއްޞަަ ރަސްމިއްޔާތުގައި ލެބޯރެޓަރީ ހުޅުވައިދެއްވީ ސިފައިންގެ ފެމެލީ އެސޯސިއޭޝަން (ސިފަމާ)ގެ ޗެއަރޕާސަން ފާތިމަތު ފިރާޝާއެވެ.
ނާރުގެ ބަލިތަކުގެ ޓެސްޓްތައް ހެދޭނެ އިންތިޒާމު ތަޢާރަފްކުރުމުގެ އިތުރަށް ސެނެހިޔަ ލެބޯރެޓަރީއަށް ގެނެވިފައިވާ ބަދަލުތަކުގެ ތެރޭގައި ލޭގެ ސާމްޕަލް ނެގުމަށް 4 ސްޓޭޝަނެއް މިހާރު ވަނީ ޤާއިމުކޮށްފައެވެ. އޭގެތެރޭގައި ތުއްތު ކުދިންގެ ލޭގެ ސާމްޕަލް ނެގުމަށް ޚާއްޞަ ސްޓޭޝަނެއްވެސް ހިމެނެއެވެ. އަދި އެކްސްރޭއާއި ފިޒިއޮތެރެޕީއާއި، ލެބޯޓްރީގެ ޚިދުމަތަށް އެދޭ މެމޯ ހެއްދުމުގެ ޚިދުމަތް ލެބޯރެޓަރީ ކައުންޓަރުން ލިބޭނެ އިންތިޒާމުވެސް މިހާރު ހަމަޖައްސާފައިވާ ކަމަށް އެމްއެންޑީއެފްއިން ވިދާޅުވެއެވެ.
ލެބޯރެޓަރީ ހުޅުވުމަށް ބޭއްވި ރަސްމިއްޔާތަށް ފަހު، އެމްއެންޑީއެފްއިން ކޮންމެ ހަފުތާއަކު ނެރޭ ހަފްތާ މަޖައްލާގެ ނޯޓިސް ބޯޑެއް ސެނަހިޔަ އޯޕީޑީ ސަރަހައްދުގައި ވަނީ ހުޅުވާފައެވެ. މި ނޯޓިސް ބޯޑް ހުޅުއްވައިދެއްވީ ސިފަމާގެ ވައިސް ޗެއަރޕާސަން އައިމިނަތު ދިހުޝާނާއެވެ.
ސިފަމާ ޗެއަރޕާސަން އާއި ވައިސް ޗެއަރޕާސަން ސެނަހިޔައަށް ކުރެއްވި މި ޒިޔާރަތުގައި ސެނަހިޔަގެ މަސައްކަތްތައް ހިނގަމުންދާގޮތް ވަނީ ބައްލަވާލައްވާފައެވެ. މީގެއިތުރުން އެކިއެކި ދާއިރާތަކުން ސްޕެޝަލައިޒްވެ ޚިދުމަތާއި ގުޅިފައިވާ ސިފައިންގެ ޑޮކްޓަރުންނާއިވެސް ވަނީ ބައްދަލުކުރައްވާފައެވެ. މި ޒިޔާރަތުގައި ސެނަހިޔަ މިލިޓަރީ ހޮސްޕިޓަލްގެ މެހުމާނުން ސޮއިކުރާ ފޮތުގައި އެދެބޭފުޅުންވަނީ ސޮއިކުރައްވާފައެވެ.
ސެނަހިޔަ މިލިޓަރީ ހޮސްޕިޓަލުން ދެމުން ގެންދާ ލެބޯރެޓަރީގެ ޚިދުމަތް އަޕްގްރޭޑް ކުރުމަށްފަހު ލެބޯރެޓަރީ ހުޅުވަމަށް ބޭއްވި ރަސްމިއްޔާތުގައި އެމްއެންޑީއެފް މެޑިކަލް ކޯރ ގެ ސަރޖަން ޖެނެރަލް، ކާނަލް ޑރ.ޢަލީ ޝާހިދު މުޙައްމަދާއި ސެނަހިޔަ މިލިޓަރީ ހޮސްޕިޓަލްގެ ޑެޕިއުޓީ ކޮމާންޑިންގ އޮފިސަރ މޭޖަރ އައިމިނަތު ޝުމްރާއާއި ސެނަހިޔަގެ އިސް އޮފިސަރުންނާއި އެހެނިހެން ރޭންކުތަކުގެ ސިފައިން ބައިވެރިވިއެވެ.