އަންހެނުންނަށް ކުރާ އެކި ބާވަތުގެ އަނިޔާތަކަކީ ދުނިޔޭގެ އެކި ކަންކޮޅުތަކުންވެސް ފެންނަމުން އަންނަ މައްސަލަތަކެކެވެ.
ވަކިން ޚާއްސަކޮށް ގެވެށި އަނިޔާގެ މައްސަލަތަކާއި ޖިންސީ އަނިޔާތަކަކީ ދުނިޔޭގެ ނިސްބަތުންވެސް ކަންބޮޑުވާ ދަރަޖައަކަށް އިތުރުވެފައިވާ މައްސަލަތަކެވެ. ޖިސްމާނީގޮތުންނާއި ނަފްސާނީ ގޮތުން އަންހެނުންނަށް ކުރާ އަނިޔާ ހުއްޓުވުމަށް ދުނިޔޭގެ އެކި ކަންކޮޅުތަކުންވެސް އަންނަނީ ގޮވަމުންނެވެ.
ދުނިޔޭގެ އެކިކަންކޮޅުތަކުގައިވެސް ޖިސްމާނީގޮތުންނާއި ނަފްސާނީ ގޮތުން އަންހެނުންނަށް ކުރާ އަނިޔާއަށް ޢާއްމުން ހޭލުންތެރިކޮށް، މިފަދަ މައްސަލަތައް މަދުކުރުމަށްޓަކާ ދުނިޔޭގެ ފެންވަރުގައި ގިނަ މަސައްކަތްތަކެއް ކުރަމުންދާއިރު، ރާއްޖޭގައިވެސް މިފަދަ ކަންކަމަށް ޢާއްމުން ހޭލުންތެރިކުރުވުމަށް ފަހަކަށްއައިސް އަންނަނީ ތަފާތު މަސައްކަތްތަކެއް ކުރަމުންނެވެ.
މިފަދަ މައްސަލަތައް މަދުކުރުމަށާއި މިކަމާމެދު އާއްމުން ހޭލުންތެރިކުރުވުމަށް ތަފާތު ޕްރޮގްރާމްތައް ހިންގިނަމަވެސް މިފަދަ މައްސަލަތައް މަދުވާ މަންޒަރެއް ނުފެނެއެވެ. ދުނިޔެއަށް މިހާރު ކުރިމަތިވެފައިވާ ކޯވިޑް-19 ގެ ކުރިންވެސް އަންހެނުންނާއި އަންހެން ކުދިންނަށް ކުރާ އެކި ބާވަތުގެ އަނިޔާތައް ގިނަކަން ފާހަގަކުރެވެއެވެ. މިގޮތުން މިދިޔަ އަހަރުގެ ތެރޭގައިވެސް 243 މިލިއަން އަންހެނުންނަށް އެމީހުންގެ ފިރިން ނުވަތަ ރައްޓެހިވެގެން އުޅޭ މީހާގެ ފަރާތުން އަނިޔާ ކޮށްފައިވާކަން އދ.ން ހާމަކުރައްވައެވެ. މީގެ ތެރެއިން އަނިޔާ ލިބޭ މީހާގެ ފަރާތުން އެކަން ރަސްމީ އިދާރާއަކަށް ރިޕޯޓުކޮށްފައިވަނީ ނުވަތަ އެހީތެރިކަމަށް އެދިފައިވަނީ އެންމެ 40 އިންސައްތަ މީހުންނެވެ.
މި ތަފާސް ހިސާބަށް ބަލާލިނަމަވެސް މިފަދަ އަނިޔާތައް ލިބުމުން އެކަން ރިޕޯޓް ކުރަން ފަސްޖެހޭކަން ހާމަވެގެންދެއެވެ. ވަކިން ޚާއްސަކޮށް ގެވެށި އަނިޔާއާއި ޖިންސީ ގޯނާކުރުމުގެ މައްސަލަތަކުގައި ޢާއިލީ މަސްލަޙަތަށްބަލައި އެފަދަ ކަންކަން ރިޕޯޓްކުރަން އަދިވެސް އަންހެނުން ފަސްޖެހޭކަން ކަމާބެހޭ ފަރާތްތަކުން ފާހަގަކުރެއެވެ. މިފަދަ ކަންކަން ސިއްރުކުރުމަކީ ކުށަށް އަރައިގަންނަ ފަރާތަށް އެކަން ތަކުރާރުކުރުމަށް ހިތްވަރު ލިބޭ، އަދި އެފަރާތަކާމެދު ޤާނޫނީގޮތުން އަޅަންޖެހޭ ފިޔަވަޅު އެޅުމަށް ހުރަސްއެޅިގެންދާކަމެކެވެ. އަދި މިކަމަކީ މިފަދަ އަނިޔާތަކުގެ ޝިކާރައަކަށްވާ ފަރާތްތަކުން ވިސްނާލުން މުހިއްމުކަމެކެވެ. ހަނުހުރުމަކީ އިންސާފު ލިބޭނެގޮތެއްނޫންކަން އެއީ މިއަދު ޤަބޫލުކުރަންޖެހޭ ހަޤީޤަތެކެވެ.
ފެމިލީ ޕްރޮޓެކްޝަން އޮތޯރިޓީން ޢާއްމުކޮށްފައިވާ ތަފާސް ހިސާބުތައް ދައްކާގޮތުން މިއަހަރުގެ ތިންވަނަ ކުއާޓަރގައި ގެވެށި އަނިޔާގެ 179 މައްސަލަ ހުށައަޅާފައިވެއެވެ. އަދި މިއަހަރުގެ ތެރޭގައި ގެވެށި އަނިޔާ 242 މީހަކަށް ލިބިފައިވާކަމަށް އެ އޮތޯރިޓީން ހާމަކުރައްވައެވެ. މީގެތެރޭގައި 182 އަންހެނުން ހިމެނެއެވެ.
އަނިޔާ ލިބުނު މީހުންގެ ތެރޭގައި 18 އަހަރުން މަތީގެ 150 މީހުން ހިމެނޭއިރު 18 އަހަރުން ދަށުގެ 92 ކުއްޖަކުވެސް މީގެ ތެރޭގައި ހިމެނެއެވެ. ދެ ޢުމުރުގެ މީހުންގެ ތެރޭގައި 18 އަހަރުން މަތީގެ 115 އަންހެނުންނަށް އަނިޔާކޮށްގެން ހުށައާޅާފައިވާއިރު 18 އަހަރުން ދަށުންގެ 67 ކުއްޖަކަށް އަނިޔާކޮށްގެން ރިޕޯޓުކޮށްފައިވެއެވެ. ގެވެށި އަނިޔާގެ ރިޕޯޓުތައް އިތުރުވެފައިވާއިރު ތިންވަނަ ކުއާޓަރގައި އަނިޔާކޮށްގެން 220 މީހަކުވަނީ ރިޕޯޓުކޮށްފައެވެ.
މިއަހަރުގެ ތެރޭގައި ރާއްޖެއާއި ދުނިޔޭގެ އެހެނިހެން ޤައުމުތަކުގައިވެސް އަންހެނުންނަށް ކުރާ އަނިޔާތައް އިތުރުވެފައިވަނީ ކޯވިޑް-19 ގެ ސަބަބުން ފުރަބަންދުވުމާއި، ގިނަ ބަޔަކު ގޭގައި ގިނަ ވަގުތު ހޭދަކުރަން ޖެހުމުގެ ސަބަބުން ނިކުންނަ އެކި ކަހަލަ އިޖުތިމާޢީ މައްސަލަތަކުގެ ސަބަބުންކަމަށް ކަމާގުޅޭ އިދާރާތަކުން ފާހަގަކުރައްވައެވެ.
އަންހެނުންނާއި އަންހެން ކުދިންނަށް ލިބޭ އަނިޔާތަކުގެ ތެރޭގައި އެންމެ އާއްމުކޮށް ފާހަގަކުރެވިފައިވަނީ ފިރިމީހާ ނުވަތަ ޕާޓްނަރުގެ ފަރާތުން ޖިސްމާނީގޮތުން ލިބޭ އެކި އަނިޔާތަކާއި، ޖިންސީ ގޮތުން ކުރާ އަނިޔާއާއި ބްލެކްމެއިލް ކުރުމާއި، އިންސާނީ ވަގުފާރިކުރުމާއި، އަޅު މަސައްކަތްކުރުވުން ފަދަ ކަންކަމެވެ. މީގެ އިތުރުން ޅަ ފުރާގައި ކައިވެނި ކުރުވުންފަދަ އަނިޔާތަކަކީ ރާއްޖޭގައިވެސް ފަހަކަށް އައިސް ފެންމަތިވެފައިވާ މައްސަލަތަކެކެވެ.
ކޮންމެ އަހަރެއްގެވެސް ނޮވެމްބަރ މަހުގެ 25 ވަނަ ދުވަސް ފާހަގަކުރަނީ އަންހެނުންނަށާއި، އަންހެންކުދިންނަށް ކުރާ އަނިޔާއާއި ދެކޮޅަށް މަސައްކަތްކުރާ ދުވަހުގެ ގޮތުގައެވެ. އަދި މި ދުވަހާ ގުޅުވައިގެން "އޮރެންޖް ދަ ވޯލްޑް" މި ތީމުގެ ދަށުން އަންހެނުންނަށާއި އަންހެންކުދިންނަށް ކުރާ އެކި ބާވަތުގެ އަނިޔާއާ ދެކޮޅަށް އަޑުއުފުލުމުގެގޮތުން، 16 ދުވަހުގެ ޚާއްސަ ކެމްޕޭނެއް ކުރިއަށްގެންދެއެވެ. މިއަހަރުގެ ކެމްޕޭންގެ ޝިއާރެއްގެގޮތުގައި ކަނޑައަޅާފައިވަނީ "އޮރެންޖް ދަ ވޯލްޑް : ފަންޑު، ރެސްޕޯންޑް، ޕްރިވެންޓް، ކަލެކްޓް"އެވެ.