ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ ޖަލްސާތައް މާދަމާ ފަށަން
ނިންމާފައިވާކަމަށް މަޖިލީހުގެ އިދާރާއިން ބުނެފިއެވެ. ޕީއެސްއެމަށް މަަޢުލޫމާތުދެއްވަމުން ރައްޔިތުންގެ މަޖިލީހުގެ އަމީން އާންމު
އަޙްމަދު މުހައްމަދު ވިދާޅުވީ، މަޖިލީހުގެ މިއަހަރުގެ ތިން ވަނަ ދައުރުގެ ފުރަތަމަ
ޖަލްސާ މާދަމާ ބޭއްވުމަށް މަޖިލީހުގެ ރައީސް ނިންމަވާފައި ވާކަމަށެވެ.
މަޖިލީހުގެ
ގަވާއިދު ބުނާ ގޮތުން އެހެން ގޮތަކަށް ކަނޑަނާޅާނަމަ، ކޮންމެ އަހަރެއްގެ ތިން ވަނަ
ދައުރުގެ މަސައްކަތް ފެށޭނީ އޮކްޓޯބަރު މަހުގެ އެއްވަނަ ދުވަހުން ފެށިގެން
ނޮވެމްބަރު މަހުގެ ނިޔަލަށެވެ. ނަމަވެސް މިމަހުގެ އެއްވަނަ ދުވަހު ޖަލްސާ
ބާއްވާފައެއްނުވެއެވެ.
މަޖިލީހުގެ ގަވާއިދު ބުނާ ކޮންމެ އަހަރެއްގެ ފުރަތަމަ
ދައުރުގެ ޖަލްސާތައް އޮންނާނީ ފެބްރުއަރީ މަހުގެ އެއް ވަނަ ދުވަހުން ފެށިގެން
އެޕްރީލް މަހުގެ ނިޔަލަށް. އަދި ދެ ވަނަ ދައުރު ފެށޭނީ ޖޫން
މަހުގެ އެއް ވަނަ ދުވަހުން ފެށިގެން އޮގަސްޓް މަހުގެ ނިޔަލަށެވެ. މަޖިލީހުގެ ކަލަންޑަރު ބުނާ ގޮތުން
ކޮންމެ އަހަރަކުވެސް މަޖިލީހުގެ މެމްބަރުންނަށް ޗުއްޓީގެ ގޮތުގައި ހަތަރު މަސް
ދުވަހުގެ މުއްދަތެއް ލިބޭނެއެވެ.
ރައްޔިތުންގެ މަޖިލީހުގެ ދެވަނަ ދައުރުގެ އެންމެ ފަހު ޖަލްސާ ބާއްވާފައިވަނީ،
އޯގަސްޓު މަހުގެ 27 ވަނަ ދުވަހުއެވެ.