ޤަވާއިދާ ޚިލާފަށް މަނަދޫއިން ރުއްގަސް ކެނޑުމާއި އުފުރުމުމާ ގުޅިގެން އެރަށު ކައުންސިލް 20،000 ރުފިޔާއިން ޖޫރިމަނާކޮށްފިއެވެ.
އެންވަޔަރަމަންޓަލް ޕްރޮޓެކްޝަން އެޖެންސީ, އީޕީއޭއިން ވިދާޅުވީ މަނަދޫއިން އަލަށް ދޫކޯށްފައިވާ ގޯތިތަކުން ޤަވާއިދާއި ޚިލާފަށް ގިނަ އަދަދަކަށް ރުއްގަސް ކަނޑާ އުފުރާފައިވާކަމަށެވެ. އަދި އެކަމާ ގުޅިގެން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމުގެ ޤާނޫނުގެ ދަށުން މަނަދޫ ކައުންސިލް ޖޫރިމާނާކޮށްފައިވާކަމަށެވެ. އަދި ޖުރިމަނާގެ ގޮތުގައި ދައްކަންޖެހޭ ވިހި ހާސް ރުފިޔާ 30 ދުވަހުގެ ތެރޭ ދެއްކުމަށް ކައުންސިލަށް އަންގާފައިވާކަމަށްވެސް އީޕީއޭއިން ވިދާޅުވެއެވެ.
އީޕީއޭއިން ވަނީ މިދިޔަ އޮކްޓޫބަރު މަހާއި ސެޕްޓެމްބަރު މަހުގެ ތެރޭގައިވެސް ގަވައިދާ ޚިލާފަށް ރުއްގަސް ކެނޑުމުގެ ސަބަބުން ދެ ކައުންސިލް އިދާރާއެއް ޖޫރިމާނާކޮށްފައެވެ.
ބަންޑާރަ ރުއްގަސް ހުއްދަ ނެތި ކެނޑުން ނުވަތަ އުފުރުމަކީ މަނާކަމެކެވެ. މިއީ ތިމާވެއްޓަށް ލިބޭ ގެއްލުން ކުޑަކުރުމާއި، އަދި ރަށްރަށުގެ ގުދުރަތީ ވެށި ޙިމާޔަތްކުރުމަށް އަޅާފައިވާ ފިޔަވަޅެކެވެ.