އަންނަ އަހަރަކީ ރާއްޖޭގެ އޭވިއޭޝަން ދާއިރާއަށް އުއްމީދީ އަހަރެއްކަމަށާއި، އެ ސިނާޢަތުން ގިނަ ވަޒީފާތަކެއް އުފެދި ފައިދާ ނެރެވޭނެކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން ޢާއިޝަތު ނަހުލާ ވިދާޅުވެއްޖެއެވެ.
ޓްރާންސްޕޯޓް މިނިސްޓަރ މިހެން ވިދާޅުވެފައިވަނީ މިއަދު ފާހަގަކުރާ ބައިނަލްޢަޤްވާމީ މަދަނީ ވައިގެ ދަތުރުފަތުރުގެ ދުވަހުގެ މުނާސަބަތުގައި ދެއްވި ޚާއްސަ ޚިޠާބުގައެވެ.
ޓްރާންސްޕޯޓް މިނިސްޓަރ ނަހުލާ ވިދާޅުވީ، ދަތުރުފަތުރުގެ ދާއިރާއަށްވެސް ބޮޑެތި ގޮންޖެހުންތައް ދިމާވެފައިވާ މި ދަނޑިވަޅުގައިވެސް އޭވިއޭޝަން ދާއިރާއިން ޤައުމީ ޚިދުމަތްތަކެއް ކުރަމުންދާކަމަށެވެ. ބޯޑަރުތައް ބަންދުކޮށް ދަތުރުފަތުރު ކުރުން ހިފެހެއްޓިގެން ދިޔަ ދުވަސްވަރު ރާއްޖެއަށް ބޭނުންވާ އަސާސީ ތަކެތި ގެނެސްފައިވަނީ ވައިގެ މަގުން، ޤައުމީ އެއާލައިނުންކަން އެކަމަނާ ފާހަގަކުރެއްވިއެވެ. އަދި ބޯޑަރު ހުޅުވައި ވައިގެ އުދުހުންތައް އިތުރުވަމުން ދާއިރުވެސް ބަލިމަޑުކަން ކޮންޓްރޯލު ކުރެވިފައިވާތީ އެކަމާ އުފާކުރައްވާކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ނަހުލާ ވިދާޅުވީ، ގިނަ ގޮންޖެހުންތަކާއެކުވެސް ރާއްޖޭގެ އޭވިއޭޝަން ސިނާޢަތުގެ ޙަރަކާތްތަކުގެ ރިކަވަރީ މަރުޙަލާ މިހާރު ފަށައިގަނެވިފައިވާކަމަށެވެ. އެގޮތުން ކުރިންވެސް ޕްލޭންކޮށްފައިވާ ގޮތަށް އެއާރލައިންތަކުގެ އޮޕަރޭޝަންތައް ފުޅާ ކުރެވި، ލަސްތަކެއްނުވެ ރާއްޖޭގެ ރައްޔިތުންނަށާއި ރާއްޖެއަށް ދަތުރުކުރާ ފަރާތްތަކަށް ޚިދުމަތްކުރާނެ ބައިނަލްއަޤުވާމީ ދިވެހި އެއަރލައިންތަކުގެ ޢަދަދު އިތުރުވެގެންދާނެކަން މިނިސްޓަރ ފާހަގަކުރެއްވިއެވެ.
މޯލްޑިވިއަންގެ ފަރާތުން އިންޑިއާގައި ކުރިއަށްގެންދިޔަ ސީޕްލޭން އޮޕަރޭޝަނަށް އިޝާރާތްކުރައްވަމުން މިނިސްޓަރ ނަހުލާ ވިދާޅުވީ، އެއީ ބައިނަލްއަޤުވާމީ ސުރުޚީތަކުން ޖާގަ ހޯދިކަމެއްކަމަށެވެ.
ސަރުކާރުން އެއަރޕޯޓުތައް ތަރައްޤީކުރުމުގެ މަސައްކަތްތައްވެސް މިއަހަރުވެސް ކުރިއަށްގެންގޮސްފައިވާކަން ފާހަގަކުރައްވާ ރާއްޖޭގެ އުތުރާއި ދެކުނުގައި މިއަހަރު ހުޅުވުނު އެއަރޕޯޓުތަކުގެ ސަބަބުން އެ އަތޮޅުތަކުގެ އިޤުތިޞާދަށް އެކަމުގެ ފައިދާ ކުރާނެކަމަށް މިނިސްޓަރ ވިދާޅުވިއެވެ. އަދި ސަރުކާރުގެ އަމާޒަކީ މީހުން ދިރިއުޅޭ ކޮންމެ ރަށަކުން 30 މިނިޓްގެ ތެރޭގައި ދެވޭނެ އެއަރޕޯޓެއް ޤާއިމުކުރުންކަމަށާއި އެ މަސައްކަތް ކައިރި މުސްތަޤުބަލެއްގައި ފުރިހަމަ ކުރެވިގެންދާނެކަމަށް މިނިސްޓަރ ވިދާޅުވިއެވެ.
އަންނަ އަހަރު ވެގެންދާނީ އޭވިއޭޝަން ދާއިރާ "ރިކަވަރ އެންޑް ރީ ބިލްޑް" ކުރެވޭ އަހަރެއްގެގޮތުގައި ސިފަކުރައްވާ ކޯވިޑް-19ގެ މި ހާލަތުން އަރައިގަނެ، ޙަރަކާތްތައް ފުޅާވާން ފެށުމާއެކު، ވަޒީފާތަކުގެ ފުރުސަތުތައް ތަނަވަސްވެގެންދާނެކަމަށް ޓްރާންސްޕޯޓް މިނިސްޓަރ ނަހުލާ ވިދާޅުވިއެވެ. އަދި އޭވިއޭޝަންގެ ދާއިރާއިން ދިވެހި ޒުވާނުންނަށް ފަހި ފުރުޞަތުތަކެއް ހޯދައިދިނުމަށް މަސައްކަތް ކުރައްވާނެކަމަށްވެސް އެކަމަނާ ވިދާޅުވިއެވެ.
މިނިސްޓަރ ނަހުލާ ވިދާޅުވީ، މިދާއިރާއިން ތަޢުލީމު ޙާސިލުކުރާ ދަރިވަރުންނަށް ދިމާވާ ދަތިތައް ޙައްލުކޮށް ކިޔެވުން ފުރިހަމަ ކުރެވޭނޭ މަގުތައް ތަނަވަސްކުރުމަށް މި ސަރުކާރުން އަބަދުވެސް އިސްކަންދޭނެކަމަށެވެ. އަދި މިދާއިރާއިން ކިޔެވުމަށް ދިވެހި ދަރިންނަށް މަގުފަހިކޮށްދީ ވަޒީފާގެ ބާޒާރުވެސް ދިވެހި ޒުވާނުންނަށް ތިޔާގި ކުރައްވާނެކަމަށްވެސް އެކަމަނާ ވިދާޅުވިއެވެ.
ޓްރާންސްޕޯޓް މިނިސްޓަރ ނަހުލާ ވިދާޅުވީ، ކޯވިޑް-19ގެ ސަބަބުން މި ދުވަސްވަރު، ދިމާވެފައިވާ ދަތިތަކާއެކުވެސް، ރާއްޖޭގެ މަދަނީ ވައިގެ ދަތުރުފަތުރުގެ ދާއިރާއިން ދިވެހިންނަށް ލިބެމުންދިޔަ ފައިދާތައް އިޢާދަކޮށްދީ އިތުރު ކުރިއެރުން ހޯދައިދިނުމަށް މަސައްކަތް ކުރާނީ އާ ހިތްވަރަކާއި ޖޯޝަކާއެކުކަމަށެވެ. އަދި އެ ދާއިރާއިން އިޤުތިޞާދީ މަންފާ ދިވެހިންނަށް ފޯރުކޮށްދިނުމަށް މަސައްކަތް ކުރަމުންދާނެކަމަށްވެސް މިނިސްޓަރ ވިދާޅުވިއެވެ.