މަސްތުވާތަކެއްޗާމެދު ހޭލުންތެރިކުރުވުމުގެ މަޢުލޫމާތު ހިމެނޭ ފޮތެއް ރައީސްގެ އަނބިކަބަލުން ނެރެދެއްވައިފި

މަސްތުވާތަކެތީގެ ނުރައްކާތެރި ވަބާއާމެދު ހޭލުންތެރިކަން އިތުރުކުރުމަށް ބޭނުންވާ މަޢުލޫމާތު ހިމަނައިގެން ތައްޔާރު ކޮށްފައިވާ ފޮތެއް ރައީސުލް ޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ނެރެދެއްވައިފިއެވެ.

މިފޮތަކީ މަސްތުވާތަކެތީގެ ނުރައްކާތެރި ވަބާގައި ޖެހިފައިވާ ޒުވާނުންނަށް އެހީތެރިކަން ފޯރުކޮށްދިނުމަށް މަސައްކަތްކުރާ ޖަމްޢިއްޔާއެއް ކަމަށްވާ "ޖަރނީ"އިން "ދުރާލާ ތައްޔާރުވެ ހުރަސް އެޅުން،" މި ނަމުގައި ޝާއިޢުކޮށްފައިވާ ފޮތެކެވެ. ރައީސުލްޖުމްހޫރިއްޔާގެ އިނބިކަނބަލުން މިފޮތް ނެރެދެއްވީ މުލީއާގޭގައި މިއަދު ހެނދުނު ބޭއްވި ބައްދަލުކުރެއްވުމެއްގައެވެ.

"ދުރާލާ ތައްޔާރުވެ ހުރަސް އެޅުން،" މި ފޮތް ބިނާކޮށްފައި ވަނީ ޕާޓްނަރޝިޕް ފޮރ ޑްރަގް ފްރީ ކިޑްސްގެ "އިންޓަރވެންޝަން އީބުކް" އަދި ނޭޝަނަލް އިންސްޓިޓުޓް އޮފް ޑްރަގް އެބިއުސްގެ ސައިންސް އޮފް އެޑިކްޝަން އަދި ސަބްސްޓަންސް އެބިއުސް އެންޑް މެންޓަލް ހެލްތު ސަރވިސަސް އެޑްމިނިސްޓްރޭޝަން އިން ޝާއިޢުކޮށްފައިވާ އެކި މަޢުލޫމާތުތަކުގެ މައްޗަށެވެ. އަދި މިފޮތް ބައްޓަންކޮށްފައި ވަނީ، އެމަޢުލޫމާތުތައް ދިވެހިބަހަށް ތަރުޖަމާކޮށް، ރާއްޖޭގެ މާހައުލާއި އާދަކާދަތަކާ ގުޅޭގޮތަށް، މަސްތުވާތަކެތީގެ ނުރައްކާތެރި ވަބާއާމެދު ހޭލުންތެރިކަން އިތުރުކުރުމަށް ބޭނުންވާ މަޢުލޫމާތު އެކުލަވައިލައިގެންނެވެ.

"ޖަރނީ"އަކީ، މަސްތުވާތަކެތީގެ ނުރައްކާތެރި ވަބާއިން ޒުވާނުންނާއި ކުޑަކުދިން ސަލާމަތްކޮށް ރައްކާތެރިކޮށްދީ، އެވަބާއިން ސަލާމަތްވާން މަސައްކަތްކުރާ މީހުންނަށް ފަރުވާހޯދުމާއި، މުޖުތަމަޢާ އެނބުރި ގުޅުމަށް މަސައްކަތްކުރާ މީހުންނަށް އެހީތެރިވެދިނުމަށް މަސައްކަތްކުރާ ޖަމުޢިއްޔާއެކެވެ. މި ޖަމްޢިއްޔާ ރަޖިސްޓްރީކޮށްފައި ވަނީ 2005ވަނަ އަހަރުގެ ނޮވެންބަރު މަހުއެވެ.