"ހިޔާ" ފްލެޓްތައް ލިބޭ މީހުންގެ ލިސްޓް މިމަހުގެ ނިޔަލަށް ފައިނަލް ކުރެވޭނެ - ފްލެޓް ކޮމެޓީ

"ހިޔާ" މަޝްރޫޢުގެ ފްލެޓްތައް ލިބޭ މީހުންގެ ލިސްޓް މިމަހުގެ ނިޔަލަށް ފައިނަލް ކުރެވޭނެކަމަށް ފްލެޓްތަކުގެ މައްސަލަ ބެލުމަށް އުފައްދާފައިވާ ކޮމެޓީން ވިދާޅުވެއްޖެއެވެ.

ފްލެޓް ކޮމެޓީގެ މަސައްކަތްތަކާގުޅޭގޮތުން ނޫސްވެރިންނަށް މަޢުލޫމާތުދެއްވަމުން އެ ކޮމެޓީގެ މެމްބަރު އަލްއުސްތާޛް ޠާހާ މުޙައްމަދު ވިދާޅުވީ، "ހިޔާ" މަޝްރޫޢުގެ ދަށުން ފްލެޓަށް ކުރިމަތިލުމަށް ހުޅުވާލި ކެޓަގަރީތަކުގެ ތެރެއިން އެންމެ ކެޓެގަރީއެއް ފިޔަވާ ހުރިހާ ކެޓެގަރީއެއްގެ ފޯމުތައް އަލުން ދިރާސާކޮށް ނިންމާ، ވަގުތީ ލިސްޓުތައް މިހާރު އާންމުކޮށްފައިވާކަމަށެވެ. އަދި މިހާރު ކުރަމުންދަނީ ވަގުތީ ލިސްޓުތަކަށް ލިބިފައިވާ ޝަކުވާތައް ރިވިއުކޮށް ޖަވާބުދާރީވުމުގެ މަސައްކަތްކަމަށް ޠާހާ ވިދާޅުވިއެވެ.

މިހާރު އިޢުލާން ނުކުރެވިވަނީ ހަމައެކަނި ސިވިލް ސަރވިސް މުވައްޒަފުންގެ ކެޓެގަރީގެ ވަގުތީ ލިސްޓުކަން ފާހަގަކުރައްވާ ޠާހާ ވިދާޅުވީ، ކުރިއަށްއޮތް ހަފްތާއެއްގެ ތެރޭގައި އެ ކެޓެގަރީން ފްލެޓް ލިބޭ މީހުންގެ ވަގުތީ ލިސްޓުވެސް އާއްމުކުރާނެކަމަށެވެ. އަދި ހުރިހާ ކެޓެގަރީއަކުން އެ ކޮމެޓީއަށް ހުށަހެޅިފައިވާ ޝަކުވާތައް ބެލުމަށްފަހު ފްލެޓް ލިބޭ މީހުންގެ ލިސްޓު މިމަހުގެ ނިޔަލަށް ފައިނަލް ކުރެވޭނެކަމަށްވެސް އޭނާ ވިދާޅުވިއެވެ.

"މިހާރު އަޅުގަނޑުމެން ކޮމެޓީގެ ފަރާތުން މައިގަނޑުގޮތެއްގައި ކުރާ މަސައްކަތަކީ ވަގުތީ ލިސްޓުތަކާގުޅިގެން ހުށަހެޅިފައިވާ ޝަކުވާތަކަށް ޖަވާބުދިނުމުގެ ކަންކަން. އަދި ސިވިލް ސަރވިސް ކެޓެގަރީގެ ފޯމުތައް ދިރާސާކޮށް ވަގުތީ ލިސްޓު އެކުލަވާލުމުގެ މަސައްކަތް ކުރަމުންމިދަނީ. އަޅުގަނޑުމެން އުއްމީދުކުރަނީ ވަގުތީ ލިސްޓުތަކަށް ހުށަހެޅޭ ހުރިހާ ޝަކުވާތަކަކަށް ޖަވާބުދީ، ޑިސެމްބަރުމަހުގެ ނިޔަލަށް އަޅުގަނޑުމެންނަށް ދާއިމީ ލިސްޓު ފައިނަލްކުރެވޭތޯ" ޠާހާ ވިދާޅުވިއެވެ.

ފްލެޓް ކޮމެޓީގެ މެންބަރު ޠާހާ ވިދާޅުވީ، ހިޔާ ފްލެޓްތަކަށް ކުރިމަތިލީ ފަރާތްތަކުގެ އެންމެ ބޮޑު ކަންބޮޑުވުމަކަށްވީ ކުރީ ސަރުކާރުން އާއްމުކޮށްފައިވާ ލިސްޓުތަކުގައި ދިރިއުޅުމުގެ ޙާލަތު އެންމެ އެދެވޭގޮތެއްގައި ބެލިފައިނެތުމާއި، ޕޮއިންޓް ދިނުމުގައި ބަލާފައިވާ އުޞޫލުތައްކަމަށެވެ. އަދި އެކަމުގައި އޮޅުވާލުންތަކެއް ހުރިކަމުގެ ޝަކުވާ ގިނަ ބަޔަކު ފާޅުކުރަމުންދިޔަކަމަށެވެ. އެހެންކަމުން ކޮމެޓީން އެންމެ ބޮޑު މަސައްކަތެއްގެ ގޮތުގައި ކުރީ ހުރިހާ އެންމެންގެ މެދުގައިވެސް ހަމަހަމަ އުޞޫލަކުން ދިރިއުޅުމުގެ ޙާލަތު ބަލާނެ މިންގަނޑެއް އެކުލަވާލުންކަމަށް ޠާހާ ވިދާޅުވިއެވެ.

"އަޅުގަނޑުމެންނަށް ފާހަގަކުރެވުނު ކަމަކީ ދިރިއުޅުމުގެ ހާލަތުގެ ބަޔަށް އެލޮކޭޓްކޮށްފައި މި އޮންނަނީ 30 ޕޮއިންޓްވެއްޖެއްޔާ އެއް ބޭފުޅަކަށް 30 ޕޮއިންޓް ލިބިފައި، ހަމަ އެ ހާލަތުގައި ހުރި އަނެއް ބޭފުޅަކަށް ލިބިފައި މި އޮންނަނީ 12 ޕޮއިންޓް. އަޅުގަނޑުމެންނަށް މި އުނދަގޫވިކަމަކީ ކިހިނެއްކަން އެކަކަށް ގިނައިން ލިބިފައި މިހާބޮޑު ތަފާތެއް އޮތީ ދެނެގަތުމަށް. އެހެންވީމަ އަޅުގަނޑުމެން އެންމެ ބޮޑުކަމެއްގެ ގޮތުގައި މިކުރިކަމަކީ މިހުރިހާ ފަރާތްތަކެއްގެވެސް ދިރިއުޅުމުގެ ޙާލަތު އެންމެންގެ މެދުގައި އެއްހަމައެއްގައި ބަލާނެ މިންގަނޑެއް އަޅުގަނޑުމެން އެކުލަވާލީ. އެ މިންގަނޑަށް ބެލުމަށްފަހު އަޅުގަނޑުމެން ފަހުން މި އިޢުލާންކުރި ލިސްޓުތަކުގައި ޕޮއިންޓްދީފައިވާނީ" ޠާހާ ވިދާޅުވިއެވެ.

ދިރިއުޅުމުގެ ޙާލަތުގެ ބަޔަށް ޕޮއިންޓްދީފައިވާނީ ކޮމެޓީގެ ފަރާތުން ގެތަކަށް ގޮސް، ކޮމިޓީއާއި ހިއްސާ ކުރާ މައުލޫމާތަކީ ތެދު މައުލޫމާތުކަމަށް ފްލެޓަށް އެދުނު ފަރާތުން އެއްބަސްވެ، އަދި މައުލޫމާތުގެ ސައްޙަކަން ކަށަވަރުކުރުމަށް އެގެއެކަށްދިޔަ ކޮމެޓީގެ ދެ އޮފިޝަލުންވެސް ލިޔުމުގައި ސޮއިކޮށްގެން ބަލަންޖެހޭކަންކަން ބަލާ ވީހާވެސް އިންސާފުވެރިކޮށްކަމަށް ފްލެޓްތަކުގެ މައްސަލަ ބަލާ ކޮމެޓީން ވަނީ ވިދާޅުވެފައެވެ.