އަލްމަރުޙޫމް މައިޒާން ޙަސަން މަނިކު ކޮށްދެއްވާފައި އަގުހުރި ޚިދްމަތްތައް ފާހަގަކޮށް، އެ މަރުހޫމުގެ ހަނދާންތައް އާކުރުމުގެގޮތުން ޚާއްސަ ފޮތެއް ނެރެފިއެވެ.
ރާއްޖޭގެ މަސްވެރިކަމުގެ ދާއިރާއަށާއި، އެކި ދާއިރާތަކަށް އަލްމަރުޙޫމް މައިޒާން ޙަސަން މަނިކު ކޮށްދެއްވާފައިވާ އަގުހުރި ޚިދުމަތްތައް ފާހަގަކޮށް ހެޔޮއެދޭ ފަރާތްތަކަކުން ތައްޔާރުކޮށްފައިވާ "މައިޒާން ޙަސަން މަނިކު 1953-2002" ފޮތް ނެރެދެއްވާފައިވަނީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދެވެ. މި ފޮތް ނެރެފައިވަނީ މަސްވެރިންގެ ދުވަހުގެ މުނާސަބަތުގައި ލޮނުޒިޔާރާތް ޕާކުގައި ބޭއްވި ޚާއްސަ ހަފުލާއެއްގައެވެ. މި ހަފުލާގައި މަރުޙޫމް ޙަސަން މަނިކާއިއެކު މަސައްކަތް ކުރައްވާފައިވާ ބޭފުޅުންގެ އިތުރުން އެ މަނިކުފާނުގެ އާއިލާގެ ގިނަ ބޭފުޅުން ބައިވެރިވެވަޑައިގެންނެވިއެވެ.
"މައިޒާން ޙަސަން މަނިކު 1953-2002" ފޮތުގައި އެމަނިކުފާނާއިއެކު އެކި ރޮނގުރޮނގުން މަސައްކަތް ކުރައްވާފައިވާ 27 މީހެއްގެ ލިޔުން ހިމަނާފައިވެއެވެ. މިފޮތަކީ މަރުޙޫމް މައިޒާން ޙަސަން މަނިކުގެ ހަނދާންތައް ދިރުވައި އެމަނިކުފާނުގެ ޚިދުމަތްތަކުގެ އަގު ވަޒަންކުރާ ހެޔޮއެދޭ ފަރާތްތަކަކާއި އެމަނިކުފާނުގެ އާއިލާގެ ބޭފުޅުން އެކުލަވާލައްވާފައިވާ ފޮތެކެވެ.
އަލްމަރުޙޫމް މައިޒާން ޙަސަން މަނިކަކީ ދިވެހިރާއްޖޭގައި މެރިން ރިސާރޗް ކުރިއެރުވުމާއި، ދެމެހެއްޓެނިވިގޮތުގައި މަސްވެރިކަން ތަރައްޤީކުރުމުގެ ރޮނގުން އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. ދިވެހިރާއްޖޭގައި ކަނޑުތަކުގެ މާހައުލާއި، މަސްވެރިކަން މެނޭޖްކުރުމަށް ސައިންޓިފިކް ދިރާސާތަކަށް ބަރޯސާވުމުގެ މުހިންމުކަން ފާހަގަކުރައްވައި، ކަނޑުތަކާއި ގުޅޭ ދިރާސާތައް ކުރުމަށް ޚާއްސަ މުއައްސަސާއެއް އުފެއްދުމަށް އެމަނިކުފާނުގެ އިސްނެންގެވުމާއިއެކު ކުރެއްވި މަސައްކަތުގެ ނަތީޖާއެއްގެ ގޮތުން މެރިން ރިސާރޗް ސެކްޝަނެއް 1984 ވަނަ އަހަރުގެ ޖުލައި 24 ގައި ވުޖޫދަށް ގެނެވުނެވެ.
އަލްމަރުޙޫމް ޙަސަން މަނިކުގެ މޭސްތިރިކަމުގެ ދަށުން، މެރިން ރިސާރޗް ސެކްޝަން ފަހުން މެރިން ރިސާރޗް ސެންޓަރގެ ފަރާތުން މަސްވެރިކަމާއި ކަނޑުގެ މާހައުލުގެ މުހިންމު ދިރާސާތައް ކުރުމުގެ އިތުރުން، ކަނޑުގެ ޤުދުރަތީ ވެށި ދެމެހެއްޓުމަށްޓަކައި ކަނޑުގެ ސަރަހައްދުތަކާއި، ކަނޑުގެ މުހިންމު ބައެއް ދިރުން ހިމާޔަތް ކުރެވިގެން ދިޔައެވެ. މެރިން ރިސާރޗް ގެ ދާއިރާއިން ރާއްޖޭގެ ޤާބިލުކަން އިތުރުކުރުމަށްޓަކައި، ހުނަރުވެރި ޒުވާނުން ބިނާކުރުމަށް އެމަނިކުފާނު ޚާއްސަ ސަމާލުކަމެއް ދެއްވިއެވެ.
އެގޮތުން ގިނަ އަދަދެއްގެ ދިވެހިން މެރިން ރިސާރޗް ދާއިރާއިން ތައުލީމު ހާސިލުކޮށް ސެންޓަރުގެ ގާބިލުކަން އިތުރުވެގެން ދިޔައެވެ. މަސްވެރިކަމާއި ދިރާސާކުރުމުގެ ދާއިރާގެ އިތުރުން، އަލްމަރުޙޫމް މައިޒާން ޙަސަން މަނިކަކީ ގިނަ އެހެން ހުނަރުތަކެއްގެ ވެރިއެކެވެ. މިގޮތުން އޭނާއަކީ ހުނަރުވެރި އާރކިޓެކްޓެކެވެ. މީގެ އިތުރުން ހަސަން މަނިކަކީ ފޮޓޯގްރަފީ، އާރޓް، ޕަރފޯރމަންސް އާރޓް، އަދި މިއުޒިކުގެ ރޮނގުންވެސް ހުނަރު ލިބިލައްވާފައިވާ ބޭފުޅެކެވެ.
މައިޒާން ޙަސަން މަނިކު ބިންގާ އެޅުއްވި މެރިން ރިސާރޗް ސެންޓަރުގެ މެންޑޭޓް އިތުރުކުރުމަށްފަހު، މޯލްޑިވްސް މެރިން ރިސާރޗް އިންސްޓިޓިއުޓަކަށް ބަދަލުކުރެވުނީ 2019 ވަނަ އަހަރުގެ ތެރޭގައެވެ. މި ބަދަލާއިއެކު ދިރާސާ ޕްރޮގްރާމްތަކަށް އިތުރު ބަޖެޓު ލިބި، މަސްވެރިކަން މެނޭޖްކުރުމަށް ސައިންޓިފިކް މައުލޫމާތު ބޭނުންކުރެވޭ މިންވަރު އިތުރުވެގެން ދިޔައެވެ. މީގެ އިތުރުން، ދިވެހިރާއްޖޭގައި މެރިކަލްޗަރ ދާއިރާއެއް ތަރައްޤީކުރުމަށް ކުރެވޭ ޢަމަލީ މަސައްކަތްތައް އިތުރު ހަރުފަތަކަށް ގެންދެވުނެވެ. މިއީ، ރާއްޖޭގައި މެރިން ރިސާރޗްގެ ދާއިރާ ކުރިއަރުވައި ފުޅާކުރުމަށް އަލްމަރުޙޫމް މައިޒާން ޙަސަން މަނިކު ކުރެއްވި ތަސައްވުރާއިއެކު މިދާއިރާއިން ޤާބިލުކަން އިތުރުކުރުމަށް ކުރެއްވި މުހިންމު މަސައްކަތްތަކެއްގެ ނަތީޖާއެވެ.