ޗުއްޓީއަށް ރަށަކަށް ދިޔަ ފުރަތަމަ ފަހަރު ކުރިމަތިވީ މަރުގެ އެތިފަހަރެއް

ކޮންމެ އަހަރެއްގެ މި ދުވަސްވަރަކީ ސްކޫލް ޗުއްޓީ ދުވަސްވަރުކަމުން އަތޮޅުތަކުގައި ދިރިއުޅޭ މީހުންވެސް ޗުއްޓީ ހޭދަކޮށްލުމަށް އެއްރަށުން އަނެއްރަށަށް ގޮސް އުޅެއެވެ. ޢާއްމުގޮތެއްގައި ރަށްރަށުގެ މީހުން ޗުއްޓީއަށް މާލެއަށާއި ރާއްޖޭން ބޭރުގެ އެކި ޤައުމުތަކަށް ދިޔަ ނަމަވެސް މިދުވަސްވަރަކީ ކޯވިޑް-19 ފެތުރެމުން އަންނަ ދުވަސްވަރަކަށް ވުމުގެ ސަބަބުން ގިނަ މީހުން ޗުއްޓީ ހޭދަކޮށްލުމަށް ދަނީ ޖެހިގެން އޮންނަ ރަށައް ނުވަތަ ކޮންމެވެސް އެހެން ރަށަކަށެވެ.

މިހެން ގޮސް އުޅޭއިރު މަދުންނަމަވެސް ހިތާމަވެރި ހާދިސާތައް ހިނގައިފައި އެބަހުއްޓެވެ. އަނެއްކާވެސް މިވަނީ މިފަދަ ހިތާމަވެރި ހާދިސާއެއް ހިގާފައެވެ. ފުވައްމުލައް ސިޓީއަށް އުފަން ޢުމުރުން އެންމެ 3 އަހަރުގެ އަންހެން ކުއްޖަކު އެކްސިޑެންޓްވެ ހާލު ވަނީ ސީރިއަސްވެފައެވެ.

މުޙައްމަދު ހުސައިންނާއި އޭނާގެ އަންހެނުން އާމިނަތު ޝަހާމާ އެމީހުންގެ ކުޑަކުޑަ ޢާއިލާއާއެކު ގއ.ދާންދޫއަށް ދިޔައީ ޗުއްޓީ ހޭދަކޮށްލުމަށް ދިޔައީ މިމަހުގެ 11ވަނަ ދުވަހުއެވެ. އެއީ ފުވައްމުލަކު ދަނޑިމަގު، ޖޭސްމިންގޭގައި ދިރިއުޅެމުން އަންނަ ދެމަފިރިންނެވެ. މިއީ އެމީހުން އެހެން ރަށަކަށް ޗުއްޓީ ހޭދަކޮށްލުމަށް ދިޔަ ފުރަތަމަ ފަހަރެވެ. ފުރަތަމަ ޗުއްޓީ މިވީ ބިރުވެރި ހަނދާނަކަށެވެ. ޗުއްޓީގައި މިވީ ކުޑަ ދުވަސްކޮޅުގެ ތެރޭގައި ތުއްތު ދަރިފުޅާ ކުރިމަތިވި ހާދިސާއިން އެމީހުންނަށް މިވަނީ ފުން ހިތާމަޔަކާ ކުރިމަތި ކުރުވާފައެވެ.

ބ.ހިތާދޫއަށް އުފަން މުޙައްމަދު ހުސައިނާއި ޏ.ފުވައްމުލައް އާމިނަތު ޝަހާމާގެ 3 ދަރިން ތިބެއެވެ. އުފާވެރި އާއިލާއާއެކު ދާންދޫއަށް ގޮސް އުޅެނިކޮށް އެކްސިޑެންވެފައިވަނީ އެމިހުންގެ ދެވަނަ ދަރިފުޅެވެ. ބުދަ ދުވަހުގެ އިރު އޮއްސި 18:10 ހާއިރު ހިނގި ހާދިސާގައި އެކުޑަކުއްޖާއަށް ސީރިއަށް އަނިޔާތަކެއް ލިބުމާ ގުޅިގެން ގއ.ވިލިގިނލި ހޮސްޕިޓަލުގައި ފަރުވާ ދިނުމަށްފަހު ރޭ ދަންވަރު އިތުރުފަރުވާއަށް މާލެ ގެނެސް އައިޖީއެމްއެޗްގައިދަނީ ފަރުވާދެމުންނެވެ.

މައުސޫމް ކުޑަކުއްޖާގެ ހާލު ސީރިއަސްވެ އިތުރު ފަރުވާއަށް މާލެ ގެނައުމަށް އެ ޢާއިލާއިން އަންނަނި މަސައްކަތް ކުރަމުންނެވެ. މިހާދިސާގައި އެކުއްޖާގެ ބޮލަށް އަނިޔާވެ ފައިގެ ކަށިގަނޑެއް ބިންދައިގެން ގޮސްފައިވާކަމަށް މަޢުލޫމާތު ލިބިފައިވެއެވެ.

ހާދިސާ ހިނގީ ކިހިނެތް؟

އެކްސިޑެންޓްވި ކުޑަކުޖާއާއި އެކުއްޖާގެ އާއިލާގެ މީހުން ތިބީ ދާންދޫ އަތިރިމައްޗާ ދިމާގައި ހުރި ގެއެއްގައެވެ. ހަވީރުގެ ވަގުތު އެކުޑަކުއްޖާ ގެއިން ނުކުމެގެން ހުރަސްކޮށް ދިޔައީ މަގުގެ އަނެއް ފަރާތުގައި ތިބި ބައެއްގެ ގާތަށެވެ. އެވަގުތު މަގުގެ ދެކުނުކޮޅުން ބާރު ސްޕީޑެއްގައި ދުއްވާފައި އައި ސައިކަލު ޖެހުނީ އެކުއްޖާގެ ގައިގައެވެ. ތުއްތު ކުއްޖާގެ ބައްޕަ މުޙައްމަދު ހުސައިން ބުނީ އެސައިކަލު އައީ ވަރަށް ބާރު ސްޕީޑެއްގައިކަމަށާއި ސައިކަލުގެ އަޑު ބާރުވުމުގެ ސަބަބުން ބަލާލިއިރު އޮތީ އެކްސިޑެންޓް ވެފައިމަށެވެ.

އެކްސިޑެންޓް ހިނގި މަގަކީ ގާތްގަޑކަށް 35 ފޫޓު ފުޅާ މަގެއްކަމަށް އެރަށު ކައުންސިލުން ވިދާޅުވެއެވެ. ކައުންސިލުން ވިދާޅުވީ އެކުއްޖާ ގައިގައި ސައިކަލު ޖެހުނުއިރު ކުޑަކުއްޖާ ހުރީ ޕޭވްމަންޓާ ގާތްގަނޑަކަށް 5 ފޫޓު ކައިރީގައިކަމަށް ލަފާކުރެވޭކަމަށެވެ. އެކްސިޑެންޓް ހިނގިއިރު ސައިކަލު ދުއްވަން އިން ޢުމުރުން 19 އަހަރުގެ ފިރިހެންމީހާއާ ޙަވާލާދީ ކައުންސިލުން ވިދާޅުވީ ސައިކަލު ދުއްވިވަގުތު ކުއްޖަކު މަގު ހުރަސްކުރަނިކޮށް ފެނިފައި ނުވަކަމަށް އޭނާ ބުނިކަމަށެވެ. މި ފިރިހެންމީހާއަށްވެސް މިހާރު އަންނަނީ ފަރުވާ ދެމުންނެވެ.

ޗުއްޓީ ދުވަސްވަރު އެކި ތަންތަނަށް ދަތުރުކޮށް ތަންތަނަށް ގޮސްއުޅޭ އުޅުމުގައި ޚާއްސަ އިސްކަންދީގެން ސަމާލިވާންޖެހޭ ކަންކަން ގިނައެވެ. ޚާއްސަކޮށް ތުއްތު ކުދިން ގޮވައިގެން ޕާކުތަކާއި މައިޒާންތަކާއި މޫދުފަދަ ތަންނަތަނަށްދާއިރު އެކުދިންނަށް ދޭ ސަމާލުކަން އިތުރުކޮށް ގާތުން ބެލުން ނުހަނު މުހިންމެވެ.

މިފަދަ ހާދިސާ ތަކަކީ ހުރިހާ އެންމެންވެސް ސަމާލުކަންދީފިނަމަ މަދުކުރެވިދާނެ، ނުވަ ހިނގުން ދުރުކަންކަމެވެ. މުޙައްމަދު ހުސައިންގެ ޢާއިލާއަށް ދިމާވިފަދަ ހިތާމަވެރިކަމެއް ކުރިމަތިވާން އެއްވެސް މީހަކު ބޭނުންނުވާނެކަން ޔަގީނެވެ.

ނުރައްކާތެރި އެކްސިޑެންޓްތައް ހިނގުމުގައި ބައެއް ފަހަރު ދުއްވާ މީހުންގެ ފަރުވާ ކުޑަވުންވެސް ހިމެނެއެވެ. ލައިސަންސް ނެތި އެއްގަމު އުޅަނދުތައް ދުއްވުމާއި ކަނޑައެޅިފަިއވާ ސްޕީޑަށްވުރެ ބާރަށް ދުއްވުމުގެ ސަބަބުންވެސް މިފަދަ ހިތާމަވެރި ހާދިސާތައް ހިނގާފައި އެބަހުއްޓެވެ. އަދި ހަމައެހެންމެ މަގު ހުރަސްކުރާ މީހުންނަށް ނުބެލުމާއި ޤަވައިދާޚިލާފައް ދުއްވުންވެސް ހިމެނެއެވެ. އެހެންކަމުން މަގުމަތީގެ ނުރައްކާތެރި ޙާދިސާތައް ހުއްޓުވުމުގައި އުޅަނދުތައް ދުއްވާމީހުންގެ ދައުރުވެސް ބޮޑެވެ.