އާއްމު ތަންތަނަށް ކުނި އެޅުމާއި ޑަސްބިންތައް ބަހައްޓާފައި ހުންނަ ތަންތަނުގައިވެސް ޑަސްބިނަށް ކުނިއެކުޅުމުގެ ބަދަލުގައި އެކިތަންތަނަށް ކުނި އުކުމަކީ އަދިވެސް ދިވެހިންގެ ތެރެއިން ފިލައިގެން ނުދާ ހަޑި އާދައެކެވެ. މިފަދަ އާދަތައް ހުއްޓާލުމާށާއި ރައްޔިތުން ހޭލުންތެރި ކުރުމަށް މިހާތަނަށް އައިރުވެސް ތަފާތު ހަރަކާތްތައް ކުރިއަށް ގެންގޮސްފައިވެއެވެ. ހޭލުންތެރިކުރުވުމުގެ ޕްރޮގްރާމްތަކާއި ސާފުކުރުމުގެ ޕްރޮގްރާމްތައް މީގެތެރޭގައި ހިމެނެއެވެ. އެހެންނަމަވެސް މިފަދަ ހަރަކާތްތައް ކުރިއަށްގެންދާއިރުވެސް ބައެއް މީހުންގެ އާދަތައް ހުންނަ ގޮތުން ސާފުކުރުމުގެ ޕްރޮގްރާމްތަކުގެ ނަތީޖާތައް ނުފެނެއެވެ.
މިފަދަ ޕްރޮގްރާމްތައް ކުރިއަށްގެންދާ އެއް ތަނަކަށް ހުޅުމާލެ ވާނެކަން ޔަޤީނެވެ. ހުޅުމާލޭގެ ސާފުތާހިރުކަމަށް މިފަދަ ޕްރޮގްރާމްތައް ކުރިއަށް ގެންދާއިރު މިމަހުގެ 19 ވަނަ ދުވަހު އަނެއްކާވެސް މިވަނީ " ސާފު ހުޅުމާލެ" ނަމުގައި ޕްރޮގްރާމެއް ފަށާ ހުޅުމާލޭގެ އެކި ސަރަޙައްދުތައް ސާފުކޮށްފައެވެ. މިގޮތުން މި ޕްރޮގްރާމްގެ ތެރެއިން ހުޅުމާލޭއިން ވަނީ ދެ ގަޑިއިރުގެ ތެރޭ 18 ޓަނުގެ ކުނި ނަގާފައެވެ. އިއްޔެ ހަވީރު 4:00 އިން 6:00އަށް ކުރިއަށް ގެންދިޔަ މި ޕްރޮގްރާމް އިފްތިތާޙުކޮށްދެއްވީ ރައީސޫލްޖުމްހޫރިއްޔާގެ ނައިބް ފައިސަލް ނަޞީމްއެވެ. މިއީ ކޮންމެ އަހަރުކުވެސް ކުރިއަށްގެންދިޔުމަށް ނިންމާފައިވާ ހަރަކާތެކެވެ.
18 tonnes of waste was collected during the Saaf Hulhumalé cleaning event held this evening.
— My Hulhumalè (@MyHulhumalemv) December 19, 2020
We would like to thank everyone who took part in this event and making this event a success. Cheers! pic.twitter.com/jATG3BJGeX
ތަރައްޤީ ވަމުން އަންނަ ހުޅުމާލޭގައި ރީތި އިމާރާތްތައް ބިނާކުރަމުން އަންނައިރު ރަށުގެ ރީތިކަން ފެނިގެންދާނީ ރަށުތެރެ ސާފުތާހިރުކޮށްގެން އޮވެގެނެވެ. އެހެންނަމަވެސް ހުޅުމާޅޭގެ ބައެއް ސަރަޙައްދު ތަކަށް ބަލާލުމުން ފެނިގެންދަނީ އެހެން މަންޒަރުތަކެވެ. ޚާއްސަކޮށް ޕާކްތަކާއި މައިޒާންތަކާއި ބީޗް ތަކުގައި ޑަސްބިންތައް ބަހައްޓާފައި ހުރިކަމުގައިވީނަމަވެސް ޑަސްބިންތަކަށް ކުނި އެޅުމުގެ ބަދަލުގައި އެކި ތަންތަނަށް ކުނި އުކާފައި ހުންނަ މަންޒަރު ފެނެއެވެ.
ސާފުކުރުމުގެ ޕްރޮގްރާމްގެ ތެރެއިން ޕްލާސްޓިކްގެ ސާމާނު ގިނައިން ނަގާފައިވާއިރު ފެރީ ޓާމިނަލް ކައިރީގައި އޮތް ޕާކާއި އެ ސަރަހައްދުގެ ބަނދަރުގެ އެއްގަމު ތޮށި ކައިރިއަށް ވަރަށް ގިނައިން ކުނި އަޅާފައި ހުންނަ ތަން އާއްމުކޮށްފެނެއެވެ. ނަމަވެސް އެ ސަރަހައްދުގައިވެސް ގިނަ އަދަދެއްގެ ޑަސްބިން އަބަދުވެސް ހުރެއެވެ. ބީޗް ސަރަހައްދުގައި ޑަސްބިން ހުންނައިރު ކޮފީ ބޮއެފައި ހުންނަ ޑިސްޕޯސަބްލް ތައްޓާއި ޕްލާސްޓިކް ފުޅި ބިންމައްޗަށާއި އެތަނުގައި ހުންނަ ބެންޗުތަކުގެ މަތީގައި އުކާލާފައި ހުންނަ މަންޒަރުތައް ފެނެއެވެ.
މިފަދަ މައްސަލަތަކަށް ހައްލު ހޯދުމަށް ކުރިއަށްގެންދާ ސާފުކުރުމުގެ ޕްރޮގްރާމްތަކުގެ ތެރެއިން އިއްޔެ ކުރިއަށްގެންދިޔަ ޕްރޮގްރާމްގެ ތެރެއިންވެސް ގިނަ އަދަދެއްގެ ކުނި ނަގާފައިވާކަން ފާހަގަކުރެވެއެވެ. އެކި ސަރަޙައްދުތަކުން ނަގާފައިވާ ކުނިތަކުގެ ތެރޭގައި ޕްލާސްޓިކް ފުޅީއާއި ޑިސްޕޯސިބަލް ތަށި ފަދަ ތަކެތި ހިމެނެއެވެ.
މި ޕްރޮގްރާމްގައި ހުޅުމާލޭގައި އެންމެ ގިނައިން ކުނިއަޅާފައިވާ ތަންތަނުގެ ތެރެއިން 20 ތަނެއް ވަނީ ސާފުކޮށްފައެވެ. މި ޕްރޮގްރާމްއަކީ ހުޅުމާލޭގެ ވެށި ސާފުކޮށް ބޭއްވުމަށް ބާރުއެޅުމާއި ހުޅުމާލޭގެ ރައްޔިތުންގެ މެދުގައި ތިމާވެށްޓަށް ސާފުކުރުމުގެ ލޯބި އާލާކުރުމަށް ކުރިއަށްގެންދިޔަ ހަރަކާތެކެވެ.
މިފަދަ ސާފުކުރުމުގެ ޕްރޮގްރަމްތައް ސަރުކާރާއި ކަމާގުޅޭ ފަރާތްތަކުން ކިތަންމެ ވަރަކަށް ގެންދިޔަކަމުގައި ވީނަމަވެސް އާއްމުން މިކަމަށްދޭ ސަމާލުކަން އިތުރުނުކޮށް، މިކަން ނުހުއްޓައިފިނަމަ މިފަދަ ޕްރޮގްރާމްތަކުގެ ފައިދާއެއް ނުކުރާނެއެވެ. އަޅުގަނޑުމެންގެ ރާއްޖެއަކީ ތިމާވެއްޓަށް ލޯބިކުރާ ބަޔަކު ދިރިއުޅޭ ތަނަކަށް ހެދުމަށްޓަކައި ފަރުދި ޒިންމާވެސް ވަރަށް ބޮޑެވެ. ޚާއްސަކޮށް އެކި ކަހަލަ ބަލިތަކުން އަރައިގަތުމަށްޓަކައި ސާފުތާހިރުކަމަށް އިސްކަންދޭންޖެހޭއިރު މިކަން ކުރެވޭނެ ހަމައެކަނި ސަރުކާރަކަށް ނޫނެވެ. ފަރުދީ ޒިންމާ އަދާކޮށްގެނެވެ. އެހެންކަމުން ރާއްޖެއަކީ ސާފުތާޙިރު އަދި ނަމޫނާ ޤައުމަކަށް ހެދުމަށް އެންމެން ގަދައަޅާ މަސައްކަތް ކުރުމަކީ މުހިއްމުކަމެއްގެ ގޮތުގައި ދެކެމާ ހިނގާށެވެ.