އަމީނީ މަގުގެ ދެކުނުގައިވާ މަގުތަކާއި ގޯޅިތަކުގައިވާ ޕާކިންގް ޒޯންތައް ކުއްޔަށް ދޫކުރަން ނިންމައިފިއެވެ. މިގޮތުން އަމީނީ މަގާ ގުޅިފައިވާ ގޯޅިތަކުން ހަތަރު ފުރޮޅުލީ އުޅަނދުފަހަރަށް ވިއްކުމަށް 292 ޖާގަ ހަމަޖައްސާފައިވާ ކަމަށް މާލެ ސިޓީ ކައުންސިލުން ވިދާޅުވެއެވެ.
އަމީނީ މަގުގެ ދެކުނުގައިވާ މަގުތަކާއި ގޯޅިތަކުގައިވާ ޕާކިންގް ޒޯންތައް ކުއްޔަށް ދޫކުރުމަށް ހަމަޖެހިފައިވަނީ ހަތަރު ފުރޮޅުލީ އުޅަނދުފަހަރުގެ ތެރެއިން ކާރަށާއި 350 ކިލޯއިން ފެށިގެން ދަށުގެ ޕިކަޕުތަކަށް ކަމަށް ސިޓީ ކައުންސިލުން ވިދާޅުވެއެވެ. ސިޓީ ކައުންސިލުން ވިދާޅުވީ މިފަހަރު ޖާގަ ދޫކުރަނީ އެމަގާގުޅިފައިވާ 13 ގޯޅިއާއި މަގަކުންކަމަށެވެ. އަދި މަގުމަތިން ވިއްކާ ޕާކިންގް ސްލޮޓެއްގެ އަގުގެ ގޮތުގައި މަހަކު 1500 ރުފިޔާ ވަނީ ކަނޑައަޅާފައެވެ.
މާލޭ ސިޓީ ކައުންސިލުން ހުޅުވާލާ ޕާކިންގް ސްލޮޓްތަކުން ޖާގަ ދޫކުރާނީ މާލޭ ސިޓީއަށް ރަޖިސްޓްރީކޮށްފައިވާ އުޅަނދުތަކަށްކަމަށާއި ޖާގަ ދޫކުރާނީ އެފަހަރަކު ހުޅުވާލާ ޖާގަތައް ހުސްވަންދެންކަމަށްވެސް އެކައުންސިލުން ވިދާޅުވެއެވެ. އަދި މިފުރުޞަތުގެ ދަށުން ލިބޭ ޕާކިންގް ސްލޮޓްގައި ޕާކް ކުރެވޭނީ އެ ސްލޮޓަކަށް ހަމަޖެހުނު އުޅަދަށް އެކަނި ކަމަށާއި ބަދަލުގައި އެހެން އުޅަނދެއް ޕާކް ނުކުރެވޭނެކަމަށް ސިޓީ ކައުންސިލުން ވިދާޅުވެއެވެ.
ޕާކިން ސްލޮޓްތަކަށް އެދި ހުށައަޅާއިރު ވެރިފަރާތް ނޫން އެހެންފަރާތަކުން ހުށަހަޅާނަމަ ޕަވަރ އޮފް އެޓަރނީގެ ލިޔުން ހުށަހެޅުން ނުވަތަ އެއްބަސްވުމުގެ ކޮޕީއެއް ހުށަހަޅަން ޖެހެއެވެ. އަދި ރޯޑް ވާދިނަސްއާއި އަހަރީ ފީގެ ލިޔުންތައް ހުށަހެޅުމާ، އިންޝުއަރެންސް ލިޔުންވެސް ހުށައަޅަންޖެހެއެވެ.
އަމީނީ މަގާ ގުޅިފައިވާ ގޯޅިތަކުން ހަތަރު ފުރޮޅުލީ އުޅަނދުފަހަރަށް ޕާކިންގް ސްލޮޓްތައް ގަތުމަށް ހުށަހަޅާނީ މާލޭ ސިޓީ ކައުންސިލުން އެކަމަށް ޚާއްޞަކޮށްފައިވާ "ޕާކިންގް ޕޯޓަލް "އަށް ކަމަށާއި މި ޕޯޓަލް މެދުވެރިކޮށް ހުށަހެޅުމުގެ ފުރުޞަތު ހުޅުވާލާނީ މިމަހުގެ 31 ވަނަ ދުވަހު ކަމަށް ސިޓީ ކައުންސިލުން ވިދާޅުވެއެވެ.
މާލޭގެ ބައެއް ސަރަޙައްދުތަކުން ވަކި ވަގުތަކަށް ޕާކްކުރަން ބޭނުންވާ ފަރާތްތަކަށް " ޓައިމް ޕާކިންގް " ސްލޮޓްތައް ހަމަޖެއްސުމަށްވެސް ސިޓީ ކައުންސިލުން މިހާރު ދަނީ ތައްޔާރުވަމުންނެވެ. މާލޭ ސިޓީ ކައުންސިލުން މިހާތަނަށްވަނީ 3 ސަރަޙައްދަކުން ޕާކިންގް ޖާގަ ދޫކޮށްފައެވެ. އެއީ ދަންޑަހިލު ގޯއްޗާއި، އަލިމަސް ކާނިވާ ސަރަޙައްދާއި ސަލްމާން މިސްކިތް ސަރަޙައްދެވެ.