ބާޒާރުމައްޗާއި ހެންވޭރު ސީވިއު އިމާރާތް ހުރި ބިމުގައި ހަދާ ޕާކިން ޒޯންތަކުގައި ގާތްގަޑަކަށް 450 އެއްހާ ސައިކަލް ޕާކް ކުރެވޭނެކަމަށް ސިޓީ ކައުންސިލުން ވިދާޅުވެއްޖެއެވެ.
ސިޓީ ކައުންސިލުން މިހާރު އަންނަނީ ބާޒާރުމަތީގައި މުދާ އަރުވާ ބޭލުމަށް ފަސޭހަވާގޮތަށް ކުރީގެ ޕްރިޒަންސް ސަރވިސް ހުރިތަނާއި ހ.ސީވިއު އިމާރާތް ހުރި ބިމުގައި ޕާކިން ޒޯންއެއް ހެދުމުގެ މަސައްކަތް ކުރަމުންނެވެ.
ޕީއެސްއެމް ނިއުސްއަށް މަޢޫލޫމާތުދެއްވަމުން މާލެ ސިޓީގެ މޭޔަރ ސިފާ މުޙައްމަދު ވިދާޅުވީ ބާޒާރު މަތީގައި ހަދާ ޕާކިން ޒޯންއާއެކު އެ ސަރަހަށްދަށް ކޮންމެވެސް ވަރެއްގެ ލުޔެއް އަންނާނެކަމަށާއި ސައިކަލުތައް ޕާކްކުރުމަށްވެސް ޖާގަ ލިބޭނެކަމަށެވެ. އަދި އެ ސަރަޙައްދުގައި ހަދާ ޕާކިން ޒޯންގައި ގާތްގަނޑަކަށް 150 އެއްހާ ސައިކަލު ޕާކްކުރެވޭނެކަމަށް ސިފާ ވިދާޅުވިއެވެ. ސިފާ ވިދާޅުވީ ބާޒާރު މަތީގައި ޕާކިން ޒޯން ހެދުމަށްޓަކައި އެތަން ސާފުކުރުމުގެ މަސައްކަތް މިހާރު ކުރަމުން އަންނަކަމަށެވެ.
ހެންވޭރުގައި އަލަށް ހަދާ ވަގުތީ ޕާކިން ޒޯންގައިވެސް 300 އެއްހާ ސައިކަލު ޕާކް ކުރެވޭނެކަމަށާއި އެތަނުގައި ޖަހާނެ ގައު ލިބުނުހާ އަވަހަކަށް އެ މަސައްކަތްކޮށް ނިންމާ ޕާކްކުރުމުގެ ފުރުޞަތު ހުޅުވާލާނެކަމަށް މޭޔަރު ވިދާޅުވިއެވެ.
މާލޭގެ ޕާކިންގ މައްސަލައަށް ހައްލެއް ގެނައުމަށް ކުރާ މަސައްކަތުގައި ވޭތުވެދިޔަ ދެ އަހަރެއްހާ ދުވަހުގެ ތެރޭގައި މާލޭގައި ވެހިކަލްތައް ޕާކުކުރުމަށް 8000 އަށްވުރެ ގިނަ ޖާގަ ހަދައިދީފައިވާކަމަށް ސިޓީ ކައުންސިލުން ވަނީ ހާމަކުރައްވާފައެވެ. އަދި މާލޭގައި ޕާކިންގ ބިލްޑިންގތަކެއް ތަރައްޤީކުރުމަށްޓަކާ ވާންޖެހޭ ތައްޔާރީތައް ޕްލޭނިންގ މިނިސްޓްރީއާއި ސިޓީ ކައުންސިލު ގުޅިގެން މިހާރުވެސް އަންނަނީ ކުރަމުންނެވެ.
މާލޭގައި އިންޖީނުލީ އުޅަނދު ޕާކުކުރުމަށް ބޭނުންވާ ޖާގަ އިތުރުކުރުމަށް ކުރާ މަސައްކަތުގެ ދަށުން މާލޭގެ އެކި ސަރަޙައްދުތަކުން ބިން ހުސްކޮށް، ސަރުކާރުންވެސް ވަނީ ޕާކިންގ ޒޯންތަކެއް ތަރައްޤީކޮށްފައެވެ.
އެގޮތުން ފިނޭންސް މިނިސްޓްރީ ހިމެނޭ ސަރަޙައްދާއި، މަޖީދީމަގު ހިނާމާގޭ ސަރަޙައްދާއި، މާފަންނު ސަހަރާ ކަންމައްޗާއި، ކުރީގެ ދަރުމަވަންތަ ސްކޫލު ހުރި ސަރަޙައްދާއި، ސްޕްރީމް ކޯޓު ކުރިމަތިން އޮތް ހުސްބިމާއި، ސޯސަންމަގުގައި ކުރީގެ ނަސަރީ ހުރި ބިމާއި، ކިންގްގ ސަލްމާން މިސްކިތް ހިމެނޭ ސަރަހައްދުގައި 2 ފުރޮޅުލީ އުޅަނދުތަކާއި 4 ފުރޮޅުލީ އުޅަނދުތަކަށް ޕާކުކުރުމަށް ޖާގަ ހަދައިދީފައިވެއެވެ.
މާލޭގެ ތޮއްޖެހުން ހައްލުކުރުމަށާއި، ވެހިކަލްތައް ޕާކުކުރާނެ ޖާގަ އިތުރުކުރުމަށް ޕާކިންގ އިމާރާތްތަކެއް އެޅުމަކީ ސަރުކާރުގެ އަމާޒެކެވެ. އެގޮތުން މާލޭގައި އެފަދަ ތަންތަން ތަރައްޤީކުރެވޭނެ ސަރަޙައްދުތަކަކީ ކޮބާތޯ ބެލުމާއި އެކަމުގެ ދިރާސާތައް ކަމާގުޅުންހުރި އިދާރާތަކުން ކުރަމުންދާއިރު، 2 ޕާކިންގ އިމާރާތެއް އެޅުމަށް 7.5 މިލިއަން ރުފިޔާ އަންނަ އަހަރުގެ ބަޖެޓުގައިވެސް ހިމަނާފައިވެއެވެ.