ފަތުރުވެރިކަމަށް ބަދަލުތަކެއް އަޔަސް، ފަތުރުވެރިން އަންނަ ސަބަބު ބަދަލެއްނުވޭ: އެމްޔޫ މަނިކު
ފާއިތުވި އަހަރުތަކުގައި ރާއްޖޭގެ ފަތުރުވެރިކަމަށް ގިނަ ބަދަލުތަކެއް އައި ނަމަވެސް ރާއްޖެއަށް ފަތުރުވެރިން އަދިވެސް އަންނަނީ ރާއްޖޭގެ ޤުދުރަތީ ރީތިކަން ބަލާލުމަށްކަމަށް މަޓީގެ ޗެއަރމަން އަދި ރާއްޖެއަށް ފަތުރުވެރިކަން ތަޢާރަފްކުރުމުގައި އިސް ދައުރެއް އަދާކުރެއްވި މުހައްމަދު އުމަރު މަނިކު ވިދާޅުވެއްޖެއެވެ.
ފަތުރުވެރިކަމަށް 50 އަހަރު ފުރޭ ރަންޔޫބިލް ހަރަކާތްތަކުގައި ބޭނުންކުރާ ލޯގޯ އިފްތިތާޙުކުރުމަށް ބޭއްވި ހަފްލާ ޝަރަފްވެރިކޮށްދެއްވާ، ރާއްޖޭގެ ފަތުރުވެރިކަމުގެ ބާނީއެއްކަމަށްވާ، މަޓީގެ ޗެއަރމަން މުހައްމަދު އުމަރު މަނިކު ވިދާޅުވީ ރާއްޖޭގައި ފަތުރުވެރިކަން ފެށިގެން އައީ ވަރަށް އާދައިގެ ގޮތަކަށް ކަމަށެވެ.
މަނިކް ވިދާޅުވީ އެންމެ ފުރަތަމަ ރާއްޖެއަށް އައި ފަތުރުުވެރިން އައީ ރާއްޖޭގެ ރީތިކަން ބަލާލަން ކަމަށެވެ. އަދި ޓޫރިޒަމްގެ މި ދަތުރަށް އަންނަ އަހަރު 50އަހަރު ފުރޭއިރު، ވަރަށް ގިނަ ކާމިޔާބީތަކާއި އުނދަގޫތަކާއި ކުރިމަތިލާފައިވާކަން މަނިކު ފާހަގަކުރެއްވިއެވެ.
" އޭރު ރާއްޖޭގެ ފަތުރުވެރިކަން އޮތް ލެވަލްއާއި މިހާރު އޮތް ލެވަލް އާއި ތަފާތު، އަންނަ މީހުންވެސް ތަފާތުވެއްޖެ، މީހުން ދެކޭ ގޮތްވެސް ތަފާތުވެއްޖެ، އެހެން ނަމަވެސް އަދިވެސް ރާއްޖޭގެ ނެޗުރަލް ބިއުޓީ އޭގެ އެލިމެންޓަކީ،" މަނިކް ވިދާޅުވިއެވެ.
ލޯގޯ އިފްތިތާޙުކުރުމަށް ބޭއްވި ވަރޗުއަލް އިވެންޓުގައި މިނިސްޓަރ އޮފް ޓުއަރިޒަމް އަބްދުﷲ މައުސޫމްގެ އިތުރުން، ރާއްޖޭގެ ފުރަތަމަ ޓުއަރިޒަމް މިނިސްޓަރ އަހުމަދު މުޖްތަބާއާއި، މަޓީގެ ވައިސް ޗެއަރމަން ހުސައިން އަފީފް އަދި އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުހައްމަދު ބައިވެރިވެވަޑައިގެންނެވިއެވެ.
ރާއްޖޭގެ ފަތުރުވެރިކަމަށް އަންނަ އަހަރު 50 އަހަރު ފުރޭއިރު، ވަރަށް ކުލަގަދަކޮށް އެކަން ފާހަގަކުރުމަށް ޓުއަރިޒަމް މިނިސްޓްރީން ދަނީ ތައްޔާރުވަމުންނެވެ. އެގޮތުން ޙާއްސަ ކައުންޑައުންއެއް ޓޫރިޒަމް މިނިސްޓްރީން މިހާރު ވަނީ ފަށާފައެވެ.