އެއްވެސް ކެންޑިޑޭޓެއްގެ އަބުރަށް އުނިކަން އަތުވެދާނެފަދަ ގޮތަކަށް ބްރޯޑްކާސްޓް ނުކުރުމަށް އިލްތިމާސްކޮށްފި
އިންތިޚާބުގެ ދުވަސްވަރު އެއްވެސް ކެނޑިޑޭޓެއްގެ އަބުރަށް އުނިކަން އަތުވެދާނެފަދަ ނުވަތަ ޢިއްޒަތާއި ކަރާމާތަށް ގެއްލުމެއް ލިބިދާނެެފަދަ ގޮތަކަށް ބްރޯޑްކާސްޓް ނުކުރުމަށް މޯލްޑިވްސް ބްރޯޑްކާސްޓިންގ ކޮމިޝަނުން އިލްތިމާސްކުރައްވައިފިއެވެ.
ބްރޯޑްކާސްޓިންގ ކޮމިޝަނުން ވަނީ އިންތިޚާބުގެ ދުވަސްވަރު ސިޔާސީ ކޮންޓެންޓް ބްރޯޑްކާސްޓްކުރުމުގެ ގައިޑްލައިނެއް އެކުލަވާލާ އާއްމުކުރައްވާފައެވެ.
މި ގައިޑްލައިންގައި އިންތިޚާބުގެ ދުވަސްވަރު ޚަބަރާއި މަޢުލޫމާތު ފެތުރުމުގައި ގެންގުޅެންވީ މިންގަނޑުތައް ވަނީ ވަރަށް ތަފްޞީލުކޮށް ހިމަނާފައެވެ. އެގޮތުން މި ގައިޑްލައިންގައިވާގޮތުން ހަމަހަމަކަމާއި އިންސާފުވެރިކަމާއެކު ޚަބަރާއި މަޢުލޫމާތު ގެނެސްދިނުމަށްޓަކައި ކޮންމެ ބްރޯޑްކާސްޓަރަކުވެސް އެ ބްރޯޑްކާސްޓަރަކު އަމިއްލަ ސުލޫކީ ގައިޑްލައިނެއް އެކުލަވާލަންޖެހެއެވެ. އަދި އެ ގައިޑްލައިނަކީ "ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސް" އާއި، އެ ކޮމިޝަނުން އެކުލަވައިލައިފައިވާ "އިންތިޚާބުގެ ދުވަސްވަރު ސިޔާސީ ކޮންޓެންޓް ބްރޯޑްކާސްޓް ކުރުމުގެ ގައިޑްލައިން" އާ ތައާރުޒުވާ އެއްޗަކަށްވެގެންނުވާނެއެވެ.
ޚަބަރާއި ޚަބަރު ގަޑިތަކުގައި ދައްކާ ރިޕޯޓުގައި، ޚިޔާލާއި ކޮމެންޓްރީއާއި ދިރާސާ ހިމެނޭނަމަ ، އެކަން ސާފުކޮށް އެނގޭނޭހެން ގެނެސްދިނުމަށް މި ގައިޑްލައިންގައިވަނީ ބަޔާންކޮށްފައެވެ. އަދި އިންތިޚާބާ ގުޅޭ ކަންތައްތަކުގައި އާންމު ރައްޔިތުންގެ ޚިޔާލު ހިމަނައިގެން އުފައްދައިފައިވާ ޚަބަރާއި ޕަބްލިކް އެފެއާޒް ކޮންޓެންޓް ބްރޯޑްކާސްޓް ކުރުމަށް ސަމާލުކަން ދިނުމަށާއި، ސޯޝަލް މީޑިޔާ ބޭނުންކުރުމުގައި، ޚަބަރާއި މަޢުލޫމާތު ފެތުރުމުގެ ހަހަމަކަމާއި އިންސާފުވެރިކަން ގެއްލޭފަދަ ކަންކަމުން އެއްކިބާވުމަށްވެސް ގައިޑްލައިންގައި ބާރުއަޅާފައިވެއެވެ.
މި ގައިޑްލައިންގައި ޕަބްލިކް ސަރވިސް ބްރޯޑްކާސްޓަރުގެ މަސްއޫލިއްޔަތުތަކާއި، ކޮމަރޝަލް ބްރޯޑްކާސްޓަރުންގެ މަސްއޫލިއްޔަތުތައްވެސް ހިމަނާފައިވެއެވެ. އަދި ހަލަބޮލި ހާލަތްތައް ކަވަރުކުރުމުގައި ނޫސްވެރިންނާ ޕްރެޒެންޓަރުންނަށް ސަލާމަތީ ޚިދުމަތްދޭ ފަރާތްތަކުން އެއްބާރުލުން ދިނުމަށާއި، ޚަބަރާއި މަޢުލޫމާތު ފޯރުކޮށްދިނުމުގައި ބްރޯޑްކާސްޓަރުން ކުރާ މަސައްކަތަށް އެއްވެސް ފަރާތަކުން ހުރަސްނޭޅުމަށް ބްރޯޑްކޮމްގެ ގައިޑްލައިންގައި ހިމަނާފައިވެއެވެ.
ބްރޯޑްކާސްޓިންގ ކޮމިޝަނުން ވިދާޅުވީ މިފަދަ ގައިޑްލައިނެއް އެކުލަވާލުމުގެ އެންމެ މުހިއްމު މަޤްޞަދަކީ އިންތިޚާބުގެ ކަންކަމާ ގުޅޭ މަޢުލޫމާތު ރައްޔިތުންނަށް ފޯރުކޮށްދީ، ސިޔާސީ ޕާޓީތަކުގެ ސިޔާސަތުތަކާއި ކެންޑިޑޭޓުންގެ ކެމްޕެއިން ވަޢުދުތަކަށް، ވޯޓުލާ ފަރާތްތައް ހޭލުންތެރިކުރުވައި، ވަކި ފަރާތަކަށް ނުޖެހި، ހަމަހަމަކަމާއި އިންސާފުވެރިކަމާއެކު ޞައްޙަ މަޢުލޫމާތު ފޯރުކޮށްދިނުމަށް ބާރުއެޅުންކަމަށެވެ. އަދި ބައިނަލްއަޤްވާމީ ހަމަތަކާއި މިންގަނޑުތަކަށް ރިޢާޔަތްކޮށް، އިންތިޚާބުގެ ދުވަސްވަރު ސިޔާސީ ކޮންޓެންޓް ބްރޯޑްކާސްޓް ކުރުމުގެ ހަމަތަކާއި އުސޫލުތައް ކަނޑައެޅުމާއި، މީޑިއާގައި ހަރަކާތްތެރިވާ ފަރާތްތަކަށް ސަލާމަތާއި ރައްކައުތެރިކަން ކަށަވަރުކޮށްދީ، މިނިވަންކަމާއެކު ޚަބަރާއި މަޢުލޫމާތު ފެތުރުމުގެ މާޙައުލެއް ޤާއިމްކޮށްދިނުންކަމަށްވެސް އެ ކޮމިޝަނުން ވިދާޅުވެފައިވެއެވެ.