އަންނަ އާދިއްތަ ދުވަހާއި ހޯމަ ދުވަހަކީ ސަރުކާރު ބަންދު ދެދުވަހެއްގެ ގޮތުގައި ސަރުކާރުން ހަމަޖައްސައިފިއެވެ.
މިމަހުގެ 11ވާ އާދިއްތަ ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ހަމަޖެއްސަވާފައިވަނީ ލޯކަލް ކައުންސިލް އިންތިޚާބުގެ ވޯޓުލުން މިމަހުގެ 10ވާ ހޮނިހިރު ދުވަހު ބޭއްވުމަށް ހަމަޖެހިފައިވުމާއެކު އިންތިޚާބާގުޅޭ އެކިއެކި މަސައްކަތްތަކުގައި ސަރުކާރުގެ ގިނަ ޢަދަދެއްގެ މުވައްޒަފުން ހަރަކާތްތެރިވާނެތީއެވެ.
މިގޮތަށް ހަމަޖެއްސެވުމާގުޅިގެން ކަލަންޑަރުގައިވާގޮތަށް 1442ވަނަ އަހަރުގެ ރަމަޟާންމަހުގެ ފުރަތަމަ ދުވަސް މި އޭޕްރީލްމަހުގެ 13 ވާ އަންގާރަ ދުވަހަށް ވެއްޖެނަމަ، އޭޕްރީލް 12ވާ ހޯމަ ދުވަހަކީވެސް ސަރުކާރު ބަންދު ދުވަހެއްގެ ގޮތުގައި ހަމަޖެއްސެވުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.