އއ. މާޅޮސް ބަނދަރު ތަރައްޤީކުރުމުގެ ޢަމަލީ މަސައްކަތް ފަށައިފިއެވެ. މި މަސައްކަތް މިއަދު ފަށްޓަވާދެއްވީ އެމްޓީސީސީގެ ސީއީއޯ އާދަމް އާޒިމް އާއި، މަތިވެރީ ދާއިރާގެ މެމްބަރު ހަސަން ޒަރީރު އާއި، މާޅޮސް ައުންސިލްގެ ރައީސް އިސްމާއިލް ނަސީރުއެވެ.
އއ. މާޅޮސް ބަނދަރު ތަރައްޤީ ކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފައިވަނީ މިދިޔަ އަހަރުގެ ނޮވެމްބަރުމަހުގެ 10 ވަނަ ދުވަހުގައެވެ. މި މަޝްރޫޢުގެ ދަށުން، 24,335 ކިއު ިބކް މީޓަރު ކޮނުމާއި، 394 މީޓަރުގެ ސަރަޙައްދެއްގައި އެއްގަމުތޮށި ލުމަަށް ވަނީ ހަމަޖެހިފައެވެ. އަދި 407 މީޓަރުގެ ސަރަޙައްދެއްގައި ބޭރުތޮށި ލުމާއި، 56 މީޓަރުގައި ގްރޮއިންސް ޖެހުމާއި، 100 މީޓަރުގެ ރިވެޓްމެންޓް ޖެހުމަށްވެސް ވަނީ ހަމަޖެހިފައެވެ. މީގެ އިތުރަށް 1970 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި، ބަނދަރުސަރަޙައްދުގައި ބައްތި ހަރުކުރުމުގެ މަސައްކަތް މިމަޝްރޫޢޫގެ ތެރޭގައި ހިމެނެއެވެ. މި މަޝްރޫޢަކީ 56.97 މިލިއަން ރުފިޔާގެ މަޝްރޫޢެކެވެ. މި މަޝްރޫއު ނިންމުމަށް ހަމަޖެހިފައިވަނީ 360
ދުވަހުގެ ތެރޭގައެވެ.
މާޅޮސް ބަނދަރުގެ އަމަލީ މަސައްކަތް ފެށުމުގެ ރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމް ދެއްކެވި ވާހަކައިގައި ވިދާޅުވީ މިބަނދަރު ތަރައްޤީކޮށް ނިމުމުން މިބަނދަރުވެގެންދާނީ އެމްޓީސީސީން ތަރައްޤީ ކުރާ އެންމެ ބޮޑު އެއް ބަނަދަރަށް ކަމަށެވެ. އަދި އަމާޒަކީ ކަނޑައަޅާފައިވާ މުއްތުގެ ތެރޭގައި ބަނދަރުގެ މަސައްކަތް ނިންމުން ކަމަށް އާޒިމް ވިދާޅުވިއެވެ. އެމްޓީސީސީން މިހާރުވެސް ރާއްޖޭގެ އެކި ސަރަހައްދުތަކުގައި 54 މަޝްރޫޢެއްގެ މަސައްކަތް ކުރިއަށް ގެންދާ ކަމަށްވެސް އާޒިމް ވިދާޅުވިއެވެ.
މާޅޮހުގައި މިހާރު އޮތް ބަނދަރަކީ 2006 ވަނަ އަހަރު އޭރުގެ ސަރުކާރުން ހަދާފައިވާ ބަނދަރެއް ކަމަށާއި، ބަނދަރު ހެދިތާ މަގިނަ ދުވަސް ތަކެއް ނުވެ ބަނދަރު ހަލާކުވެ ބަނދަރުގެ ބޭނުން އެކަށީގެންވާ ގޮތުގައިވަނީ ނުކުރެވިފައެވެ. އަދި ބަނދަރު ކުޑަކަމުން ބަނދަރު ތޮއްޖެހި އާބަނދަރަކަށް ރައްޔިތުން އެދެމުންދާތާ އަހަރުތަކެއް ވެގެން ގޮސްފައިވާކަން އެރަށުގެ ރައްޔިތުން ފާހަގަކުރެއެވެ.
މާޅޮހަކީ އާބާދީއަކީ 750 މީހުން ދިރިއުޅޭ ރަށެކެވެ.