ހަވީރުގެ ވަގުތުތަކުގައި މުދާ އުފުލުން މަނާކުރި ގަޑިތަކަށް ލުޔެއް

މި ރަމަޝާންމަހުގެ ހަވީރުގެ ވަގުތުތަކުގައި މާލޭގައި ވިޔަފާރި އުޞޫލުން އެއްގަމު އުޅަދުގައި މުދާ އުފުލުން މަނާކުރި ގަޑިތަކަށް ލުޔެއް ދީފިއެވެ.

މޯލްޑިވްސް ޓްރާންސްޕޯޓް އޮތޯރިޓީން މިމަހުގެ 7 ވަނަ ދުވަހު ކުރި އިޢުލާންގައިވާ ގޮތުން ހަވީރު 3:00 އިން ފެށިގެން ރޭގަނޑު 9:00 އާއި ދެމެދު އެއްވެސް ބާވަތެއްގެ އުޅަނދެއްގައި ވިޔަފާރި އުޞޫލުން މުދާ އުފުލުމަކީ މަނާކަމެކެވެ. އެހެންނަމަވެސް މިހާރު މިވަނީ ގަޑި ކުޑަކޮށްފައެެވެ. އެގޮތުން ޓްރާންސްޕޯޓް އޮތޯރިޓީން އެންމެ ފަހުން ނެރުނު އިޢުލާންގައިވާގޮތުން އެއްވެސް ބާވަތެއްގެ އުޅަނދެއްގައި ވިޔަފާރި އުޞޫލުން އުފުލުން މަނާ ގަޑިއަކީ ހަވީރު 4.00 އިން ފެށިގެން ރޭގަނޑު 8.00އާ ދެމެދެވެ.

މިހާރު އޮތް ގޮތުން ހެނދުނު 9:00 އިން ފެށިގެން ހަވީރު 4:00 އަށް އަދި ރޭގަނޑު 8:00 އިން ފެށިގެން ހެނދުނު 6:00 އަށް ހުރިހާ ބާވަތެއްގެ މުދާ، ހުރިހާ ގިންތިއެއްގެ މުދާ އުފުލާ އުޅަނދެއްގައި އުފުލޭނެކަމަށް ޓްރާންސްޕޯޓް އޮތޯރިޓީން ހާމަކުރެއެވެ.

ޓްރާންސްޕޯޓް އޮތޯރިޓީން ވިދާޅުވީ މިގަޑިތަކުގައި އުޅަނދުތައް ބުރިޖަށް އަރަންވާނީ މާލެ ދެކުނުފަރާތުން ބޮޑުތަކުރުފާނު މަގުން ކަމަށެވެ. މި އުސޫލަށް ޝައްވާލްމަހުގެ 7 ދުވަހުގެ ނިޔަލަށް އަމަލުކުރަން ޖެހެއެވެ.