ސްޕެއިންގެ މަގްބޫލު ޓްރެވަލް އެޕް، ޕާސްޕޯޓަރ އެޕް އާއެކު އެމްއެމްޕީއާރުސީން ކެމްޕެއިނެއް ފަށައިފިއެވެ.
މި ކެމްޕެއިނުގެ ދަށުން ޕާސްޕޯޓަރ އެޕް މެދުވެރިކޮށް ރާއްޖެ އިޝްތިހާރުކުމަށްޓަކައި އެޤައުމުގެ މަޝްހޫރު 4 އިންފްލުއެންޒަރުން ރާއްޖޭގައި ޗުއްޓީއެއް ހޭދަކުރާނެއެވެ.
މަޝްހޫރު ޓްރެވަލް އެންޑް ލައިފްސްޓައިލް އިންފްލުއެންސަރުން ކަމަށްވާ އައިޑާ ޑޮމެނެކް ޕަސްކުއަލްއާއި، އަލްބާ ޕައުލް ފެރަރ އާއި ޕައުލާ ގޮންޒާލެޒް ނުނެޒް އަދި ޖޮނަތަން ބެޓްރަން ވިއޭގޯ މި މަހުގެ 13 އިން 20 އަށް ރާއްޖޭގައި ތިބުމަށް ވަނީ ހަމަޖެހިފައެވެ.
ޕާސްޕޯޓަރ އެޕަކީ ގިނަ އަދަދެއްގެ މީހުން ބޭނުންކުރަމުންދާ ފަތުރުވެރި މަންޒިލްތަކާއި ފަތުރުވެރިން ގުޅުވައިދޭ ޕްލެޓްފޯމެކެވެ. ސްޕެއިން މާކެޓުގައި މި އެޕް ވެފައިވަނީ ޓްރެވަލް ކެޓަގަރީ އެންމެ ގިނައިން ޑައުންލޯޑް ކުރެވޭ އެޕަށެވެ. ހަމައެހެންމެ މިއެޕްވަނީ ފޮޓޯގްރަފީއާއި ޓްރެވަލްގެ އެކި ދާއިރާތަކުން ގިނަގުނަ އެވޯޑްތައްވެސް ހާސިލްކޮށްފައެވެ. ފަސް ލައްކައަށް ވުރެގިނަ މީހުން މިއެޕް ބޭނުންކުރަމުން ގެންދާއިރު އިންސްޓަގްރާމުގައިވެސް 82000 އަށްވުރެ ގިނަ މީހުން މި އެޕް ފޮލޯކުރެއެވެ.
ޕާސްޕޯޓަރ އެޕްގެ ޕޯސްޓް ތަކަށް ގިނަބައެއްގެ ސަމާލުކަން ލިބޭއިރު ކޮންމެ ޕޯސްޓަކަށް ހަތަރު ލައްކަ އާއި ގާތްކުރާ އަދަދަކަށް ލައިކްސް ލިބެމުންދެއެވެ. މި އެޕް މެދުވެރިކޮށް ރާއްޖެ އިޝްތިހާރުކުރުމަށް ކުރިއަށްގެންދާ ހަރަކާތުގެ ދަށުން، އެއް ހަފްތާގެ ދަތުރުގައި މި ޓީމް ރާއްޖޭގައި ތިބުމަށް ހަމަޖެހިފައިވަނީ ކޮކޫން މޯލްޑިވްސް، ފުށިފަރު މޯލްޑިވްސް އަދި ކުރަމަތި މޯލްޑިވްސްގައެވެ.
އެމްއެމްޕީއާރުސީން ވިދާޅުވީ މިދަތުރުގައި ކޮންމެ ރިސޯޓަކަށް ހާއްސަ ތަޖުރިބާތައްކޮށް، ސޯޝަލް މީޑިއާ އަދި ޕާސްޕޯޓަރ އެޕްގައި އިޝްތިހާރުކުރެވިގެން ދާނެކަމަށެވެ.
މި ދަތުރުގެ ހާއްސަ ތަޖުރިބާތަކާއި ތަފާތު ހަރަކާތްތައް އެކުލެވޭ ގޮތަށް ޕާސްޕޯޓަރ އެޕްގައި ހަތަރު އައިޓިނަރީ އެއް ތައްޔާރު ކުރެވިގެން ދާނެއެވެ. ހަމައެއާއެކު ހަތަރު އިންފްލުއެންޒަރުންގެ ސޯޝަލް މީޑިއާގައި އަދި ޕާސްޕޯޓަރގެ ޕްރޮފައިލްގައިވެސް ރާއްޖެ އިޝްތިހާރު ކުރުމަށްވަނީ ހަމަޖެހިފައެވެ. މި ކެމްޕެއިން ގެ ސަބަބުން 9 މިލިއަނަށް ވުރެ ގިނަ މީހުނަށް ރާއްޖެ އިޝްތިހާރު ވެގެންދާނެކަމަށް އެމްއެމްޕީއާރުސީން ލަފާކުރެއެވެ.
ސްޕެއިންއިން ކޮންމެ އަހަރަކު ވެސް ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތް ކުރެއެވެ. 2019 ވަނަ އަހަރު 36064 ސްޕެއިންގެ ފަތުރުވެރިން ރާއްޖެ އައިސްފައިވެއެވެ. މިދިޔަ އަހަރުގެ ޖުލައިމަހު ދިވެހިރާއްޖޭގެ ބޯޑަރު އަލުން ހުޅުވާލުމާއިއެކު އެންމެ ގިނައިން ރާއްޖެއަށް ފަތުރުވެރިން ޒިޔާރަތްކުރި ގައުމުތަކުގެ ތެރޭގައި ސްޕެއިން ވަނީ ހިމެނިފައެވެ. މިގޮތުން 2021 ވަނަ އަހަރުގެ ފެބްރުއަރީގެ ނިޔަލަށް 4307 ސްޕެއިންގެ ފަތުރުވެރިން ވަނީ ރާއްޖެ ޒިޔާރަތްކޮށްފައެވެ.