މިއަހަރުގެ ފަތުރުވެރިކަމުގެ ލޯ ސީޒަންގައި އެހެން އަހަރުތަކަށްވުރެ ގިނައިން ރާއްޖެއަށް ފަތުުރުވެރިން އަންނާނެކަމަށް ލަފާކުރެވޭކަމަށް މިނިސްޓަރ އޮފް ޓޫރިޒަމް އަބްދުﷲ މަޢުސޫމް ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަަކަދައްކަވަމުން ޓޫރިޒަމް މިނިސްޓަރ މަޢުސޫމް ވިދާޅުވީ ރާއްޖޭގެ ފަތުރުވެރިކަން ދުނިޔެއިން ވަރަށް ބޮޑަށް ބަލައިގަނެފައިވާ ކަމަށާއި، ރާއްޖެއަށް ޗުއްޓީއަށް އައުމަށް ގިނަ އަދަދެއްގެ ފަތުރުވެރިން ބޭނުންވެފައި ތިބި ކަމަށެވެ. އެގޮތުން މިދިޔަ އަހަރުތެރޭ ކޯވިޑާއި ގުޅިގެން ޤައުމުތަކުގެ ބޯޑަރުތައް ބަންދުކުރުމާއި، ދަތުރުކުރުމުގައި ހުރި ދަތިތަކާއި އެކު ރާއްޖެއަށް އަންނަން ބޭނުންވި ނަމަވެސް ނާދެފައި ތިބި ގިނަ އަދަދެއްގެ ފަތުރުވެރިން މިއަހަރުތެރޭ ރާއްޖެއަށް އަންނާނެ ކަމަށް ލަފާކުރެވޭކަމަށް މިނިސްޓަރ ވިދާޅުވިއެވެ. މިއާއެކު މިއަހަރުގެ ލޯ ސީސަން އެހެން އަހަރުތަކާއި ތަފާތުވާނެ ކަމަށް ލަފާކުރެވޭ ކަމަށް މިނިސްޓަރ ވިދާޅުވިއެވެ.
" މިފަހަރު ޔޫކޭގެ ލުއިތައް ދޭނެ ޕްލޭންތައް އާއްމުކުރިިއިރު، ޖޫން ޖުލައި ހިސާބު ހުޅުވާލާނެ ވާހަކަ އިޢުލާން ކުރާނެ ވާހަކަ ބުނެފަ އޮތީމަ، އަޅުގަނޑުމެންނަށް ޓުއަރ އޮޕަރޭޓަރުން ޙަބަރުދިން ޖޫން ޖުލައި ހިސާބުގެ ބުކިންގްސްތައް ޓަސްލާފަ މައްޗަށް ދިޔަ ވާހަކަ، އެހެންވީމަ މި އުއްމީދުކުރަނީ މިއަހަރުގެ ލޯ ސީސަން، ލޯ ސީސަން އެކޭ ކިޔާކަށް ނުޖެހޭނެ،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިދުވަސްކޮޅު އިންޑިއާގައި ކޯވިޑްގެ ކޭސްތައް އިތުރުވެ އެޤައުމުން ރާއްޖެއަށް އަންނަ ފަތުރުވެރިންގެ އަދަދުތައް މަދުވެފައިވާކަމަށެވެ. މިއާއެކު އެޤައުމުން ރާއްޖެއަށް އަންނަ ފަތުރުވެރިންގެ އަދަދުތައް މިހާރު ދަށްވެފައިވާކަމަށް މިނިސްޓަރ ވިދާޅުވިއެވެ. ވެކްސިނާއެކު ފަތުރުވެރިކަމަށް އަންނަ ކުރިއެރުންތަކާއި ގުޅޭގޮތުންވެސް މިނިސްޓަރ ވަނީ ވާހަކަދައްކަވާފައެވެ. އެގޮތުން، ވިޒިޓް، ވެކްސިނޭޓް، ވެކޭޝަން ނުވަތަ 3 ވީ ޓޫރިޒަމަކަށް ރާއްޖެ ހުޅުވާލުމަށް މަސައްކަތްކުރަމުންދާއިރު، މިއާއެކު ރާއްޖެއަށް އަންނާނެ ފަތުރުވެރިންގެ އަދަދުތައް އިތުރުވެގެންދާނެކަމަށް މިނިސްޓަރ ވިދާޅުވިއެވެ.
"3 ވީ ޓޫރިޒަމް ވަރަށް ބޮޑަށް ވައިގަ ހިފައިފި، ރާއްޖޭގައި ވެކްސިން ޓޫރިޒަމް ފަށަން އުޅޭ ވާހަކަ ދުނިޔޭގެ އެކި ހިސާބުތަކުގައި އެބަ ދައްކާ މިހާރު، ސަރުކާރުން އެންމެ މުޙިއްމު އަހައްމިއްޔަތެއް ދެއްވަނީ ރާއްޖޭގެ އާބާދީއަށް ވެކްސިން ދިނުމަށް އެއަށްފަހު މި ޕްރޮގްރާމް ފަށާނީ،" މިނިސްޓަރ ވިދާޅުވިއެވެ.
މިނިސްޓަރ ފާހަގަކުރެއްވި ގޮތުގައި ރާއްޖޭގެ ފަތުރުވެރިކަން ވެކްސިނާއެކު ނުލައިވެސް ވަރަށް ބާރަށް ކުރިއަށް ދިޔަކަމަށެވެ. އެހެން ކަމުން 3ވީ އާއި އެކުވެސް ފަތުރުވެރިކަމަށް އިތުރު ކުރިއެރުންތަކެއް ލިބިގެންދާނެކަމަށް ޤަބޫލުކުރައްވާކަމަށް މިނިސްޓަރ ވިދާޅުވިއެވެ.